सुनसरी र सप्तरी डुबानमा, सयौं परिवारको बिचल्ली

इटहरी/राजविराज: लगातार पानी परिरहेका कारण स्थानीय खोलामा बाढी आउँदा सुनसरी र सप्तरीका दर्जनौं बस्ती डुबानमा परेका छन् । बाढीका कारण सुनसरी र सप्तरीमा सयौं परिवारको बिचल्ली भएको छ ।

सुनसरीका सिमरिया, तनमुना, छिटाहा, साहेबगन्ज, हरिनगरा, कप्तानगन्ज, देवानगन्ज, राजगन्ज सिनुवारी र लौकहीलगायत गाविसका दुई सय घर डुबानमा परेको सुनसरीका प्रहरी प्रमुख एसपी पोषराज पोखरेलले बताए । उनका अनुसार हरिपुर र श्रीपुर गाविसका केही बस्तीसमेत डुबानमा परेका छन् ।

बूढीखोलाको बाढीले राजगन्ज सिनुवारी— ९ का ५० घर डुबानमा परेको स्थानीय पीडित दीपेन्द्र चौधरीले बताएका छन् । खोलामा आएको बाढी बस्तीमा पसेपछि स्थानीय बासिन्दाको कन्तबिजोग भएको छ । सुनसरीकै छिटाहा, तनमुना र सिमरिया गाविसका एक सय घर डुबानमा परेको छिटाहाका भुवनेश्वर यादवले जानकारी दिए । यादवले पाँच दिनदेखि बस्ती डुबानमा परे पनि स्थानीय प्रशासनले पीडितको उद्धार नगरेको गुनासो गरे ।

साहेबगन्ज गाविसका केही वडा डुबानमा परेको स्थानीय इन्द्रकुमार मेहताले बताए । उक्त गाविसका हरेकजसो घरमा पानी जमेपछि बस्नै समस्या भएको सिमरियाका गणेश मण्डलले बताए । बस्तीमा बाढी पसेपछि छिटाहा र चिमडी गाविसका ५० परिवारले घर छाडेको स्थानीय अजुर्न मेहताले बताए ।

सुनसरीमा बूढीखोला, मरियाखोला, धनउष्णा खोला, गाड्न खोला र सुनसरी खोलाको बाढी बस्तीमा पसेपछि दक्षिण क्षेत्रका आधा दर्जनभन्दा बढी गाविसका बस्तीलाई क्षति पुर्‌याएको एसपी पोखरेलले बताए ।

 

सुनसरीको मरिया खोलामा आएको बाढीले बगाउँदा १० वर्षीय सालिम अन्सारीको मृत्यु भएको छ । रामनगरभुटाहा–३ स्थित मामाघरमा बस्दै आएका सुनसरी नरसिंह १ का दाउद आलमका छोरा सालिमको शुक्रबार दिउँसो खोलामा डुबेर मृत्यु भएको एसपी पोखरेलले बताए ।

यस्तै लगातार झरी परेका कारण सप्तरी सदरमुकाम राजविराज डुबानमा परेको छ । खाँडो खोलामा आएको बाढी पसेर राजविराज डुबानमा परेको हो । भलुवाही खोलामा पानीको सतह बढेर राजविराजका एक सय घरमा पानी पसेको छ ।

खाँडो खोलामा आएको बाढीले सकरपुराका वडा नम्बर १, २, ३, ४ र ५ का दर्जनौं घर डुबानमा परेका छन् । जिल्ला प्रशासन कार्यालय सप्तरीले सकरपुरा, तिलाठीका घर डुबानमा परेपछि त्यहाँका बासिन्दालाई सुरक्षित स्थानमा आश्रय लिन आग्रह गरेको छ । उक्त गाविसका अधिकांश बासिन्दा विद्यालय तथा अग्लो स्थानमा गएर ओत लागेका छन् ।

पातो गाविसका एक सय घर र कुनौलीका ५० घर डुबेका छन् भने जिता नदीको बाढीले महदेवा गाविसका एक सय घर, बथनाहाका ५० घर र भगतपुरका २५ घर डुबेको प्रहरीले जनाएको छ । महुली खोलामा आएको बाढीले भारदह र पोर्ताहा गाविसका ५० घरमा पनि पसेको छ ।

तेरहौतास्थित दुधेला खोलामा आएको बाढीले बाँध भत्काएर तेरहौताको वडा नम्बर ३, ८ र ९ को खेतमा पानी पस्दा हजारौं बिघा खेतीयोग्य जग्गा डुबानमा परेको स्थानीय विजयकुमार भगतले बताए । तेरहौता ९ का २५ घर डुबानमा परेका छन् ।

भारदहबाट हनुमाननगर हुँदै सदरमुकाम आउने राजविराज–भारदह सडकखण्डअन्तर्गत तोपामा पक्की सडकसमेत डुबेको छ । तोपामा सडकबाटै पानी बग्न थालेपछि सवारीसाधन आवागमन प्रभावित बनेको छ । तोपा गाउँ जलमग्न भएको प्रहरी नायव उपरीक्षक दानबहादुर कार्कीले बताए ।

सदरमुकाम राजविराजलाई भारतीय सीमा बजार कुनौलीसँग जोड्ने राजविराज–कुनौली सडकखण्डअन्तर्गत खाँडो खोलाले तिलाठीमा सडक कटान गरेको छ । प्रहरीले कोशीको पश्चिमी तटबन्ध नजिकका बासिन्दालाई पनि सचेत र सुरक्षित रहन आग्रह गरेको छ ।

प्रमुख जिल्ला अधिकारी बलदेव गौतमले बाढी प्रभावित क्षेत्रका बासिन्दाको उद्धारमा सुरक्षाकर्मी परिचालन गरिने बताए ।

सप्तकोसीमा बहाव उच्च

पूर्वी पहाडी जिल्लामा लगातार वर्षा भइरहेका कारण सप्तकोसी नदीमा पानीको बहाव यो वर्षकै उच्च भएको छ । सप्तकोसीमा पानीको बहाव उच्च भएपछि त्यस आसपासका बासिन्दा त्रसित बनेका छन् ।

पाँच दिनदेखि पहाडी जिल्लामा निरन्तर पानी परेपछि कोसीमा पानीको बहाव उच्च भएको सुनसरीका प्रहरी प्रमुख एसपी पोषराज पोखरेलले बताए । सप्तकोसीमा शनिबार साँझ पानीको बहाव प्रतिसेकेन्ड दुई लाख ५० हजार एक सय २५ पुगेको छ । दिउँसो पानीको बहाव प्रतिसेकेन्ड दुई लाख ४२ हजार क्युसेक थियो । सप्तकोसीमा पानीको वहाव शुक्रबार राति प्रतिसेकेन्ड दुई लाख २२ हजार एक सय २५ क्युसेक थियो ।

सप्तकोसीमा पानीको वहाव बढेपछि सुनसरी, उदयपुर र सप्तरीका सर्वसाधारण आतंकित बनेका छन् । पानीको बहाव बढे पनि कोसी ब्यारेजका ५६ ढोकामध्ये ३३ वटामात्र ढोका खोलिएका छन् । भारत सरकारको नियन्त्रणमा रहेको कोसी ब्यारेजमा पानीको बहाव उच्च हुँदासमेत सबै ढोका नखोलिएका कारण आसपासका सर्वसाधारण त्रसित भएको कोसीपीडित संघर्ष समितिका सचिव बाबुराम कार्कीले बताए ।

सप्तकोसीमा पानीको बहाव उच्च भएपछि सुनसरीको वराहक्षेत्र, महेन्द्रनगर, प्रकाशपुर र हरिपुर गाविसमा नेपाल प्रहरी र सशस्त्र प्रहरीको संयुक्त उद्धार टोली तयारी अवस्थामा राखिएको एसपी पोखरेलले बताए । पानीको बहाव उच्च हुँदा समेत कोसी ब्यारेजका सबै ढोका नखोलिएपछि बाढीले सुनसरी, उदयपुर र सप्तरीका खेतीयोग्य जमिनसमेत कटान गर्न थालेको महेन्द्रनगरका दयाराम रेग्मीले बताए ।

२०६५ भदौ २ गते सप्तकोसीले पूर्वी तटबन्ध भत्काएर कटान गर्दा पानीको बहाव एक लाख ६८ हजार क्युसेक थियो । कोसी कटानका कारण सुनसरीको हरिपुर, हरिपुर, प्श्चिम कुशाहा र लौकही गाविसका पाँच हजारभन्दा बढी घरपरिवार विस्थापित भएका थिए ।