तीन करोडको सडक तीन साता पनि टिकेन

हेटौंडा: तीन करोड रुपैयाँ खर्चेर डिभिजन सडक कार्यालय हेटौंडाले कालोपत्रे गरेको सडकमा तीन साता नबित्दै खाल्डाखुल्डी पर्न थालेको छ । पूर्व–पश्चिम राजमार्गअन्तर्गत हेटौंडाको रातोमाटेदेखि राप्ती पुलसम्म चार किमि सडकमा पुरानो पिचमाथि नयाँ पिच ‘ओभर ले' गरिएको थियो । रातोमाटे क्षेत्रमा अझै स्तरीकरणको काम बाँकी छ ।

वर्षे झरीमा हतारहतार कालोपत्रे गरिएकाले तीन साता नबित्दै विभिन्न स्थानमा खाल्डाखुल्डी परेको हेटौंडा— ९ का माधव श्रेष्ठले बताए । ‘सडक कालोपत्रे गरेको तीन साता नबित्दै भत्कियो', उनले भने, ‘सरकारी बजेट सिध्याउने काममात्र भएको छ ।' सडकमा खाल्डाखुल्डी पर्दा सडक दुर्घटना बढेको हेटौंडा–४ का रामकुमार मगरले बताए । कर्रा, पशुपतिनगर र बजार क्षेत्रको सडकमा खाल्डाखुल्डी परेको उनले बताए ।

एक महिनायता यस क्षेत्रमा साना सवारी दुर्घटनामा परी दुईजनाको ज्यान गएको जिल्ला ट्राफिक प्रहरी प्रमुख कृष्ण थापाले बताए । ‘सडक पिच भएको देखेपछि द्रुत गतिमा सवारी चलाउने गरिन्छ', उनले भने, ‘खाल्डाखुल्डी याद नगरी चलाउँदा दुर्घटना बढेको हो ।' हेटौंडाको रातोमाटो, कर्रा र राप्ती पुल क्षेत्रमा बढी सवारी दुर्घटना हुने गरेको छ ।

सडक स्तरीकरणको ठेक्का पाएको आशीष निर्माण सेवा प्रालि काठमाडौंले निर्माणकार्य अझै बाँकी रहेको जनाएको छ । निर्माण कम्पनीका प्रमुख विजय गौलीले भने, ‘रातोमाटे क्षेत्रमा अझै स्तरीकरणको काम सकिएको छैन, यस बीचमा बनेका खाल्डाखुल्डी हामी मर्मत गर्छौं ।' झरीमा स्तरीकरणको काम गर्नुपरेकाले समस्या भएको उनले बताए ।

डिभिजन सडक कार्यालय हेटौंडाका इन्जिनियर राजेश यादवले एक वर्षसम्म ठेकेदार कम्पनीले मर्मत गर्नुपर्ने बताए । ‘करिब ५० लाख रुपैयाँ पैसा अझै हामीले भुक्तानी गरेका छैनौं', उनले भने, ‘सम्झौताअनुसारको काम भए नभएको अनुगमन गर्छौं ।'