प्रचण्डले भने, सहमतिबाटै अघि बढ्न चाहन्छौं
काठमाडौँ: नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले नयाँ परिस्थितिमा नयाँ आधारमा अगाडि बढ्ने बताएका छन् ।
आइतबार नेपाल कम्युनिस्ट पार्टी(नेकपा)का संस्थापक सदस्य नरबहादुर कर्माचार्यको तेस्रो स्मृति दिवसमा आयोजित कार्यक्रममा बोल्दै प्रचण्डले भने, ‘नयाँ राजनीतिक पििरस्थितमा नयाँ आधारमा अगाडि बढ्नुपर्छ । नयाँ आधारमा मधेसकेन्द्रित दल, आदिवासी, जनजाति र थारु समुदायको माग सम्बोधन हुनुपर्छ ।’
माओवादी पार्टी मुख्यालय पेरिसडाँडामा आयोजित कार्यक्रमलाई सम्बोधन गर्दै उनले आन्तरिक एकता सुदृढ गरेर मुलुकको राष्ट्रियतालाई समृद्ध गर्न सकिनेमा समेत जोड दिए ।
आगामी राजनीतिक कार्यदिशा नयाँ संविधानप्रति असन्तुष्ट राजनीतिक दललाई सन्तुष्ट बनाउने हुनुपर्ने समेत प्रचण्डको भनाइ छ ।
प्रचण्डले कसैलाई चिढ्याएर र उनीहरुको मानमर्दन गरेर मुलुक कहीँ पनि पुग्न नसक्ने स्पष्ट पारे । नेपालको संविधानको प्रभावकारी कार्यान्वयन नै आजको प्रमुख कार्यभार हो भन्दै नेता दाहालले भूकम्पपछिको पुनःनिर्माण र शान्ति प्रक्रियाका बाँकी कार्यभार पूरा गर्दै राष्ट्रिय समस्या समाधान गर्न नयाँ बन्ने सरकार लागिपर्ने उल्लेख गरे ।
स्मृति सभामा नेताहरु नारायणकाजी श्रेष्ठ, हरिबोल गजुरेललगायतले नेकपा स्थापनादेखि कम्युनिस्ट आन्दोलनका क्रममा कर्माचार्यले खेल्नुभएको भूमिका उल्लेखनीय रहेको उल्लेख गरे । रासस
प्रतिक्रिया दिनुहोस !
