भारतले तीन चिनियाँ पत्रकारको भिसा समय थपेन
नयाँदिल्लीः भारत सरकारले ३ जना चिनियाँ पत्रकारको प्रवेशाज्ञा (भिसा) समय बढाउन अस्वीकार गरेको छ ।
उनीहरू चिनियाँ सरकारी संवाद समिति सिन्ह्वाका तर्फबाट भारतमा बसी रिपोर्टिङ गर्दै आएका थिए । उनीहरूमध्ये सिन्ह्वाका दिल्ली ब्युरो प्रमुख वु कियाङ र मुम्बईबाट रिपोर्टिङ गर्दै आएका ताङ लू तथा मा कियाङ छन् । उनीहरूले पत्रकारिताका नाममा अवाञ्छित काम गर्ने गरेको बताइएको छ ।
उनीहरूका गतिविधिमाथि भारतीय सुरक्षा संस्थाले उनीहरूमाथि निगरानी गर्दै आएको बताइएको छ । उनीहरू तीनैजनाको प्रवेशाज्ञा जनवरीमा नै सकिएको थियो ।
पटक पटक गरी बढाइएको प्रवेशाज्ञा ३१ जुलाईमा सकिएको थियो । त्यसपछि भने भारत सरकारले उनीहरूको प्रवेशाज्ञा बढाउन मानेन । चीन सरकारले उनीहरूको साटो अरू पत्रकार पठाउन तयार भएको जानकारी दिएको छ ।
यसको भारतको एनएसजी (परमाणु आपूर्तिकर्ता समूह) सदस्यतामा चीनले गरेको विरोधसँग कुनै सम्बन्ध नभएको चिनियाँ सरकारले स्पष्ट पारेको छ ।
यस विषयलाई लिएर यी दुई देशबीच तनाव बढ्न सक्ने आशंका गरिएका छन् । एनएसजीसँग यसको सम्बन्ध नभएको बताइए पनि चीनले भारतलाई उक्त समूहको सदस्यता नदिन विशेष सक्रिय भएको थियो । अमेरिका, फ्रान्स लगायतका देशले यस समूहका लागि समर्थन गर्दै आएका थिए ।
प्रतिक्रिया दिनुहोस !
