प्रधानमन्त्री ओलीको राजीनामापछि भारतमा खुसी मनाइयो
काठमाडौँ: प्रधानमन्त्री केपी शर्मा ओलीले राजीनामा दिएपछि भारतमा खुसीयाली छाएको छ । भारतका सञ्चार माध्यमले केपी ओलीले राजीनामा दिनु भारतका लागि राम्रो समाचार भएको उल्लेख गरेका छन् ।
कतिपय भारतका सञ्चारमाध्यमले ओलीले राजीनामा दिनु भारतको जित भएको समेत बताएका छन् । एनडीटीभी डट कममा प्रधानमन्त्री ओलीको राजीनामालाई भारतीय नीतिको प्रमाणका रुपमा चर्चा गरिएको छ।
भारतका सञ्चार माध्ययमले प्रधानमन्त्री ओली चीनतर्फ निकट हुँदा भारतीय प्रधानमन्त्री नरेन्द्र मोदी र उनका सुरक्षा सल्लाहकार अजित डोभलको आलोचना भइराखेकाबेला आएको ओलीको राजीनामाले भारतलाई खुशी मिलेको उल्लेख गरेका छन् ।
‘नेपालका मधेसी समुदायका तर्फबाट भारतले ओलीमाथि हस्तक्षेप गर्यो र उनी राजीनामा दिन बाध्य भए,’ एनडीटीभी डट कममा लेखिएको छ ।
त्यस्तै, टाइम्स अफ इन्डियाले ओलीको पतन भारतका लागि खुसी शीर्षकमा समाचार प्राथमिकतासाथ छापेको छ । ‘ओलीले नेपाललाई भारतविरोधी राज्य बनाउन खोजेका थिए, जुन सफल भएन र उनी विदा भएका छन्,’ समाचारमा लेखिएको छ । 
हिन्दुस्तान दैनिकले ओलीको बहिर्गमनसँगै नेपालको राजनीतिमा भारतको प्रभाव बढ्ने उल्लेख गरेको छ । ओलीको बहिर्गमन भारतका लागि खुसी भन्दै अब नेपालको राजनीतिमा भारतको पुनरागमनको संकेत गरेको छ ।
‘नेपालको एकताको बातावरण बन्ने छ र माइक्रो मेनेजमेन्छ गर्ने चीनको प्रयास असफल भएको छ’, हिन्दूस्तान दैनिकले लेखेको छ ।
प्रतिक्रिया दिनुहोस !
