ओलीको राजीनामापछि मुलुक अस्थिरतातर्फ : राप्रपा नेपाल

काठमाडौं : राप्रपा नेपालले प्रधानमन्त्री केपी ओलीको राजीनामापछि मुलुक राजनीतिक अस्थिरतातर्फ मोडिनसक्ने चिन्ता व्यक्त गरेको छ ।

राप्रपा नेपाल केन्द्रीय कार्य समितिका मंगलबार र बुधबार बसेको बैठक अचानक रुपमा भएको सरकार परिवर्तनले देशमा पुनः राजनीतिक अस्थिरता बढने, संबिधान कार्यान्वनमा जटिलता खडा हुने, आर्थिक बिकासको गति अवरुद्ध हुने तथा राष्ट्रिय हित र स्वार्थमा आंच पुग्न जाने संभावनाप्रति चिन्ता प्रकट गरेको छ ।

बैठकले साउन १६ गतेभित्र दुवै राप्रपा एकीकरण गर्ने निर्णय पनि गरेको छ । देशमा बलियो राष्ट्रवादी प्रजातान्त्रिक शक्ति निर्माण गर्ने क्रममा राप्रपा नेपाल र राष्ट्रिय प्रजातन्त्र पार्टीका बीचमा एकीकरण गर्न बैठकले सैद्धान्तिक सहमति प्रदान गरेको छ । यस प्रयोजनका निमित्त दुवै पार्टीका वार्ताटोलीले सहमतिका आधारमा तयार गरेको एकीकरणको नीति र आधारपत्रलाई बैठकले अनुमोदन गरेको छ । साउन १६ गते भित्र एकीकरण कार्य सम्पन्न गर्न तथा एकिकृत पार्टीको चुनावचिन्ह गाई कायम गर्ने वारे प्रयत्नशील रहन समेत बैठकले मार्गदर्शन गरेको पार्टीका प्रवक्ता राजाराम श्रेष्ठले बताए ।

साउन १६ भित्र एकीकरण हुन नसकेको अवस्थामा आबश्यक निर्णय गर्न बैठकले कार्य सम्पादन समितिलाई अधिकार प्रत्यायोजन गरेको छ । बैठकले सरकारमा पार्टीको सहभागिताको समीक्षा गर्दै राष्ट्रिय स्वाभिमान र स्वाधिनताको सम्बद्र्धन, नेपाली जनताको निर्णायकत्वको रक्षा, राष्ट्रिय हितमा आंच नपुराई कुटनैतिक प्रयासबाट अघोषित नाकाबन्दिको अन्त्य, दुवै छिमेकीसँग पारस्परिक समानता र हितमा आधारित सम्बन्धको बिकास एवं अन्तर्राष्ट्रिय क्षेत्रमा नेपालको प्रतिष्ठाको अभिवृद्धिका निमित्त सरकारमा रहेर पार्टीले खेलेको भूमिकाको बैठकले उच्च मुल्यांकन गरेको छ ।

राष्ट्रिय हितको सम्बद्र्धन, संबिधानको कार्यान्वन, भूकम्प पछिको पुननिर्माण र दीर्घकालिन आर्थिक बिकासको क्षेत्रमा केपी ओलीको नेतृत्वमा राप्रपा नेपाल समेत सहभागि रहेको सरकारबाट प्रभावकारी कार्य भैरहेको अवस्थामा सरकार परिवर्तन हुनु देश र जनताको हितमा नरहेको बैठकले ठहर गरेको छ ।

सरकार गठन भएको नौ महिनाको बीचमा नै सरकार परिवर्तन हुनुले देशमा पुनः राजनैतिक अस्थिरता बढने, संबिधान कार्यान्वनमा जटिलता खडा हुने, आर्थिक बिकासको गति अवरुद्ध हुने तथा राष्ट्रिय हित र स्वार्थमा आंच पुग्न जाने संभावनाप्रति बैठकले गंभीर चिन्ता प्रकट गरेको छ । नंया संबिधान जारी भैसके पछि पनि राजनैतिक अस्थिरता रहेबाट जाने सन्देश तथा पर्ने नकरात्मक प्रभावप्रति गंभीर बन्न प्रमुख राजनैतिक दलहरुसंग बैठकले आह्वान गरेको पार्टीले जारी गरेको विज्ञप्तीमा उल्लेख छ ।

देशको परिवर्तित राजनैतिक सन्दर्भमा पार्टीको सिद्धान्त र नीतिको महत्व, औचित्य र सान्दर्भिकता अझ टडकारो हुंदै गएको बैठकले महसुश गरेको छ । यस वास्तविकतालाई दृष्टिगत गर्दै नेपालको संबिधान र संबैधानिक व्यवस्थासंग सहकार्य गर्दै आफ्ना मान्यताहरु स्थापित गर्न सशक्त ढंगबाट क्रियाशील रहने पार्टीको कार्यदिशालाई आगामि दिनमा निरन्तरता दिइन प्रवक्ता श्रेष्ठले बताए ।

देशको राष्ट्रिय अखण्डता माथि प्रश्न चिन्ह खडा गर्ने प्रवृत्ति र समुह निर्वाधरुपले क्रियाशील भैरहेको तथा त्यसलाई नियन्त्रण गर्ने तर्फ प्रभावकारी कार्य नभएकोप्रति राप्रपा नेपालको बैठक गम्भीर सरोकार व्यक्त गरेको छ । मुलुकमा हाल बिकसित राजनैतिक घटनाक्रम र अस्थिरताबाट विखण्डनकारी तत्वले फाईदा उठाउन सक्ने हुंदा त्यस तर्फ ध्यानदिन राप्रपा नेपाल सम्बद्ध पक्षको ध्यानाकर्षण गरेको छ ।

पार्टीका सहप्रवक्ता मोहन श्रेष्ठका अनुसार संबिधानले धर्म परिवर्तनलाई दण्डनीय तुल्याएता पनि अझै पनि देशको विभिन्न भागहरुमा संगठित र योजनावद्ध रुपमा लोभ लालच, त्राश र भ्रम सिर्जना गरी धर्म परिवर्तन गराउने तथा सनातन धर्मलाई कमजोर बनाउने कार्य जारी रहेको निश्कर्ष बैठकले निकालेको छ ।

संबिधानले नै सनातन धर्मको संरक्षण गर्नु राज्यको दायित्व हुने उल्लेख गरिए तापनि यसरी निर्वाध रुपले धर्म परिवर्तन भैरहेको प्रति चिन्ता र खेद प्रकट गर्दै तत्काल धर्म परिवर्तन माथि नियन्त्रण गर्न राप्रपा नेपाल सरकारसंग माग गर्दछ । हिन्दुत्वप्रति जनचेतना अभिवृद्धि गर्न पार्टीले हिन्दुत्व जागरण अभियानलाई निरन्तरता दिने निर्णय पनि राप्रपा नेपालले गरेको छ। आगामि कार्तिक महिनाको पहिलो हप्तामा अन्तर्राष्ट्रिय सनातन धर्मसभाको आयोजना गर्ने निर्णय बैठकले गरेको छ । अन्तर्राष्ट्रिय धर्मसभा आयोजनाको निमित्त पार्टी अध्यक्ष कमल थापाको अध्यक्षतामा आयोजक समिति गठन गरिएको छ ।