थाई नेपाली समाजलाई सम्मान

काठमाडौंः यो वर्ष ‘सेवा पुरस्कार-नेपाल'बाट थाई नेपाली समाज सम्मानित भएको छ । भूकम्प पीडित मेलम्चीको माझी गाउँको पुनःनिर्माणको कदर गर्दै कर्मयोगी बद्रीविक्रम थापा स्मृति सेवा गुठीले उक्त पुरस्कार एवं सम्मान थाई नेपाली समाजलाई प्रदान गरेको हो ।

कार्यक्रमका प्रमुख अतिथि एवं गणतन्त्र नेपालका प्रथम राष्ट्रपति डा. रामवरण यादवले समाजका उपाध्यक्ष कुमार कार्कीलाई ५१ हजार राशिसहित कदरपत्र प्रदान गरेका थिए । थाई नेपाली समाजले २०७२ सालमा गएको भूकम्पबाट पीडित सिन्धुपाल्चोकको मेलम्चीस्थित माझी गाउँको पुनःनिर्माण गरेको छ । समाजले त्यहाँका बासिन्दालाई घर निर्माण गरी सहयोग पु¥याएको छ ।

पूर्वराष्ट्रपति यादवले प्रवासमा रहेर नेपालको सेवा पुयाएको भन्दै समाजको सह्राना गरेका थिए । देशलाई असल मान्छेको सधैं खाँचो रहेको उनको भनाइ थियो । यादवले नेपाली मिलेर जानुपर्नेमा जोड दिएका थिए । आफू राष्ट्रपति हुँदाको बेला स्मरण गर्दै उनले भने, ‘मैले मधेसी र पहाडी मिलेर जाऔं भनेको थिएँ । देशमा विभाजन नहोस् भनेर त्यस्तो भनेको थिएँ ।' आफ्नो भनाइको गलत व्याख्या गर्ने प्रयास गरिएको भन्दै खिन्नता व्यक्त गरे ।

समाजका उपाध्यक्ष कार्कीले आफू जहाँ बसे पनि नेपाली भएको र नेपाललाई सहयोग गर्न सधैं तत्पर भएको बताए । जिन्दगीमा कहिल्यै पनि नेपाल नआएको भए पनि गत वर्षको भूकम्पले नेपाली पीडित भएको सुनेर तुरुन्तै सहायता राशि लिएर उनी नेपाल आएका थिए ।

नेपालमा कष्ट परेको बेला आफूहरू चुप बस्न नसक्ने भन्दै उनी निकै भावुक बनेका थिए । उनले सम्मानबाट आफूलाई हौसला मिलेको भन्दै कृतज्ञता प्रकट गरेका थिए । यसैगरी गुठीका सदस्य सचिव एवं चिन्तक चिन्तामणि योगीले यो बेला पहाडी र मधेसी, यो वा त्यो भनेर विभाजन हुनु दुःखद भएको बताउँदै सबै नेपाली एकजुट हुनुपर्नेमा जोड दिए ।

कार्यक्रममा हरि मञ्जु श्री, प्रा. डा. सुरेन्द्र केसी, भीमबहादुर कार्कीलगायतले बोलेका थिए । बद्रीविक्रम चरित्र निर्माण पुरस्कार हिन्दु विद्यापीठ दाङका छात्र निशान्त वलीलाई प्रदान गरिएको थियो ।