अन्तर्राष्ट्रिय मिडियामा यसरी छाए ओली

अविश्वास प्रस्ताव आएपछि राजीनामा दिएका नेपालका ३८ औं प्रधानमन्त्री केपी शर्मा ओलीको चर्चा कम थिएन नेपालमा । उनले सुरु गरेका केही राम्रा कामको प्रशंसा गर्दै नेपाली युवाले ‘ओलीका लागि हैन भोलिका लागि' भन्ने नारा पनि निकालेका थिए । तर, नेपाली कांग्रेस र माओवादीले समर्थन फिर्ता लिएपछि ओलीले राजीनामा दिने क्रममा गरेको भाषण निकै चर्चित बन्यो । नेपालमा मात्रै हैन, अन्तर्राष्ट्रिय मिडियामा पनि उनी निकै छाए । केही उदाहरणः

राम्रो काम गरेकामा दण्डित गरियो, टाइम्स अफ इन्डिया

आफूलाई एक सय ७७ वर्ष पुरानो मिडियाका रूपमा पहिचान बनाएको बताउँछ ‘द टाइम्स अफ इन्डिया', जसअनुसार सन् १८३८ को नोभेम्बर ३ मा यसको स्थापना भएको हो । भारतको एक प्रभावकारी मिडियाका रूपमा स्थापित भएको मिडियाले नेपालको राजनीतिलाई निकै चासोका रूपमा हेर्दै आएको छ ।

यसले प्रधानमन्त्री ओलीले राजीनामा गरेपछि ‘मैले राम्रो काम गरेबापत मलाई दण्डित गरिएको हो' भन्ने हेडलाइनसहितको समाचार प्रकाशित गरेको थियो । साथै समाचारमा ओलीले कांग्रेस र माओवादीलाई आफ्नो सरकारविरुद्ध षड्यन्त्र गरेको आरोप लगाएको, ओलीले गरेको प्रतिबद्धता पूरा नगरेको उल्लेख गरेको छ ।

ओलीले नेपाल–भारत सम्बन्ध सामान्य अवस्थामा फर्काएको र ओलीकै भाषामा मुलुकले ठूलो मूल्य चुकाउनुपर्ने धारणा पनि सो पत्रिकाले उल्लेख गरेको छ ।

काम गर्न असफल भएको आरोप, न्युयोर्क टाइम्स

राजनीतिक गतिरोध अन्त्य गर्न तथा बाधा अड्काउ फुकाउका लागि बाटो खोलिदिने र प्रधानमन्त्री तहबाट राजीनामा गर्ने घोषणा ओली आफैंले गरे पनि राजीनामा नदिएको र त्यसपछि प्रतिपक्षी दलको कडा आलोचना ओलीले खेपेको अमेरिकी पत्रिका न्युयोर्क टाइम्सले लेखेको छ ।

त्यस्तै उनको नौमहिने कार्यकालमा भूकम्पपछिको पुनःनिर्माण र भारतसँगको सम्बन्धबारे चर्चा भएका विषयहरू पनि उल्लेख गरेको छ । उनलाई दुई ठूला दल माओवादी र नेपाली कांग्रेसले ओलीको सरकार काम गर्न असफल भएकोलगायत ओलीको कार्यकालमा भारतका लागि नेपाली राजदूत दीपकुमार उपाध्यायलाई सरकारविरोधी आरोप लगाएर फिर्ता बोलाइएको पनि उल्लेख गरिएको छ ।

२८७ दिनका प्रधानमन्त्री, हिन्दुस्तान दैनिक

भारतको अर्को पत्रिका हिन्दुस्तान दैनिकले ओलीलाई कुल दुई सय ८७ दिन प्रधानमन्त्री बनेको बताएको छ । उनले विश्वासको मतदान हुनुअघि नै राजीनामा दिएको भनेर प्रकाशित गर्नुका साथै प्रचण्डलाई सरकार गिराउने खेलमा लागेको भनेर गाली गरेको भन्ने पनि उल्लेख गरेको छ ।

यसले ओेलीलाई विरोधीहरूलाई भड्काएको टिप्पणी गरेको छ । ओलीले पदमा बस्नु या हट्नु महत्त्वपुर्ण कुरा नभएको भन्ने अभिव्यक्ति दिँदै लोकतन्त्र सफल बनाउन र संविधान कार्यान्वयन गर्न चाहेको धारणा राखेकोलाई महत्त्व दिएको छ ।

ओलीको वृत्तान्त, अलजजिरा

मध्यपूर्वी न्युज टेलिभिजन अलजजिराले भने हार निश्चित भएपछि मात्रै ओलीले पदत्याग गरेको टिप्पणी गरेको छ । यसले ओलीको जीवनचर्चा प्रसारण गर्दै सन् १९५२ को फ्रेबुअरीमा जन्मिएको, १९७० मा नेपाल कम्युनिस्ट पार्टीमा स्थानीय कम्युनिस्ट नेताबाट प्रभावित भएर राजनीतिमा लागेको आदि उल्लेख गरेको छ ।

संसद्मा ओलीले राखेका धारणालाई कोट गर्दै चौध वर्ष जेलमा बिताएको, दुई दशकभन्दा लामो समय राजनीतिमा बिताएको आदि उल्लेख गरेको छ । ओलीले नयाँ संविधानले नेपालमा स्थिरता ल्याउँछ कि ल्याउँदैन भनी गरेको प्रश्नलाई पनि महत्त्वका साथ स्थान दिएको छ । सरकारमा रहँदा ओलीले निकै आलोचना खेपेको पनि भन्न भ्याएको छ ।

मधेसीका माग बेवास्ताको आरोप, रोयटर्स

रोयटर्सले उल्लेख गरेअनुसार गणतान्त्रिक नेपालले सेप्टेम्बरमा जब नयाँ संविधान घोषणा गर्‌यो, त्यसमा मधेसी जनताका विषयलाई बेवास्ता गरिएको भनिएको छ ।

मधेसी दलहरूले संघीय राज्यमा उनीहरूका लागि उचित स्थान नदिएको र उनीहरूको क्षेत्र टुक्र्याएको आरोप लगाई विरोध गरिरहेकोलाई रोयटर्सले प्राथमिकता दिएको छ । ओली प्रधानमन्त्री बन्ने समयमा तराईको मुद्दा सुनुवाइ गर्ने र भूम्पका कारण घरबारविहीन भएकालाई सहयोग गर्ने विश्वास दिलाए पनि उनले त्यस्तो नगरेको भन्ने आरोप लागेको बताइएको छ ।

हिन्दुस्तान टाइम्समा नाकाबन्दी चर्चा

संसद्ले अविश्वास प्रस्तावमा मतदान गर्नुभन्दा केही मिनेट अगाडिमात्रै प्रधानमन्त्री ओलीले राजीनामा दिएको हिन्दुस्तान टाइम्सले बताएको छ । यसले संसद्मा आउनुभन्दा पहिला नै राष्ट्रपतिलाई भेटेर राजीनामा गरेको प्रसंग पनि कोट्याएको छ ।

संसद्का सबैजसो सदस्यले ओलीलाई विश्वास नगर्ने वास्तविकता पनि मनन गरेको टिप्पणी गरेको छ । ओली सरकारले मधेसीका मुद्दालाई सुनुवाइ नगरेको आरोप लगाएको छ । ओलीले भारतले लगाएको अनौपचारिक नाकाबन्दीको विषय संसद्मा उठाएको उल्लेख गरेको छ ।

समर्थन फिर्तापछि राजीनामा, सांघाई दैनिक

सांघाई दैनिकमा भनिएको छ, माओवादीले समर्थन फिर्ता लिएपछि ओली राजीनामा गर्न बाध्य भएका हुन् । अविश्वास प्रस्ताव आएपछि राजीनामासँगै नेपालमा पक्कै पनि राजनीतिक अस्थिरता बढेको सांघाई दैनिकको अनुमान छ । ओलीले पावर सेएरिङका लागि वचन दिए पनि त्यसलाई पालना नगरेको पनि उल्लेख गरेको छ ।

१० वर्षसम्म जनयुद्धमा होमिएकाका लागि काम नगरेको भन्ने आरोप लागेको छ । अब प्रचण्डले कांग्रेस र अन्य पार्टीको साथमा नयाँ सरकारका लागि कसरत गर्ने बताइएको छ ।