पर्यटन बोर्डको आधा बजेट प्रवद्र्धनमा

काठमाडौंः नेपाल पर्यटन बोर्डको चालू आर्थिक वर्ष २०७३/७४ को कुल बजेटको आधा प्रवद्र्धनमा खर्च गरिने भएको छ । बोर्डले नीतिगत रूपमा स्वीकृत गरिसकेको चालू आवको ९० करोड रुपैयाँको बजेटमा आधाभन्दा बढी रकम प्रवद्र्धनको क्षेत्रमा खर्च गर्ने तय भएको बोर्ड सञ्चालक समिति सदस्य राजेन्द्रप्रसाद सापकोटाले जानकारी दिए ।

सापकोटाका अनुसार बोर्डले मार्केटिङ तथा प्रवद्र्धनको क्षेत्रमा ४५ करोड रुपैयाँभन्दा बढी रकम विनियोजन गरेको छ । यो बजेटमा अन्तर्राष्ट्रिय सञ्चार माध्यम बीबीसी वा सीएनएनमध्ये विज्ञापन बजाउन एउटामा १० करोड रुपैयाँ खर्च गरिने उल्लेख छ । नेपालका लागि प्रमुख पर्यटकीय बजार रहेका छिमेकी गन्तव्य भारत र चीनमा तीनतीन करोड रुपैयाँ खर्च गर्ने तय भएको सापकोटाले बताए । उनका अनुसार बोर्डले यी दुई छिमेकी गन्तव्यमा मिडिया क्याम्पेनिङ तथा सोसल मिडिया प्रवद्र्धन गर्न खर्च गर्नेछ ।

बोर्डले चालू आवको बजेटमा आन्तरिक भ्रमण वर्ष २०७३ लाई पनि प्राथमिकतामा राखेको छ । बोर्डले यो अभियानका लागि डेढ करोड रुपैयाँ विनियोजन गरेको छ । यो रकमबाट आन्तरिक गन्तव्यको प्रवद्र्धन, विकास तथा मिडिया फामट्रिपसहितका कार्यक्रम गरिने बोर्डले जानकारी दिएको छ ।

पशुपति दर्शन प्याकेजको तयारी

बोर्डले चालू आवमा हिन्दू धर्मका अनुयायीलाई दृष्टिगत गरेर पशुपति दर्शन प्याकेज ल्याउने तयारी गरेको छ । यो प्याकेज विशेष गरी भारतीय पर्यटकलाई दृष्टिगत गरेर ल्याइने भएको छ । नेपाल वायुसेवा निगम प्रयोग गरेर काठमाडौं आउने भारतीयलाई यो प्याकेजबाट आकर्षित गर्ने योजना अगाडि सारिएको सापकोटाले जानकारी दिए ।

यस्तो योजनामा निगमको प्रचारसमेत हुने, बोर्डले नेपालको प्रवद्र्धन गर्ने र पशुपतिलाई पनि केन्द्रमा राखेर कार्यक्रम गर्दा प्रभावकारी हुने अनुमान छ ।

यस्तो प्याकेजमा पशुपति क्षेत्र विकास कोष, वायुसेवा निगम र पर्यटन बोर्डको संयुक्त प्रयासमा आकर्षक पूजा प्याकेज दिन सकिने उल्लेख छ । यसरी दिइने पूजा प्याकेजमा लाग्ने पैसा छुट दिने वा अन्य सुविधा दिने भन्नेबारे छलफल बाँकी रहेको बोर्डले जानकारी दिएको छ ।

गत वर्ष ७० प्रतिशत बजेट खर्च

नेपाल पर्यटन बोर्डले गत वर्षमा विनियोजन बजेटमध्ये ७० प्रतिशत खर्च गरेको छ । यो जानकारी बोर्डका प्रमुख कार्यकारी अधिकृत दीपकराज जोशीले गत बुधबार संसद्को अन्तर्राष्ट्रिय सम्बन्ध र श्रम समिसिमक्ष दिएका हुन् । उनका अनुसार बोर्डले गत आवका लागि प्रवद्र्धनात्मक बजेटतर्फ पर्यटन सम्पदा तथा विकासमा २२ करोड, बजारीकरणमा १८ करोड, प्रचारप्रचारमा १९ करोड रुपैयाँसहित ८४ करोड ८० लाख रुपैयाँको बजेट तय गरेको थियो ।

पर्यटन बोर्डले नीतिगत रूपमा स्वीकृत गरिसकेको चालू आवको ९० करोड रुपैयाँको बजेटमध्ये आधाभन्दा बढी रकम प्रवद्र्धनको क्षेत्रमा खर्च गर्ने भएको छ ।

यसमध्ये हालसम्म ७० प्रतिशत खर्च भइसकेको विवरण तयार भएको र बाँकी विवरण आउने क्रममा रहेको उनले जानकारी दिए ।गत वर्ष सञ्चालक समितिबाट स्वीकृति पाउन ढिलो भएको कारण समयमा खर्च गर्न नपाएको बोर्डले जानकारी दिएको छ । बजेट स्वीकृत हुन ढिलो हुँदा खर्च प्रभावित भएको जोशीले बताए । उनका अनुसार गत आवको बजेट गत माघमा मात्रै स्वीकृत भएको थियो ।

बोर्डलाई ६ महिनाअगाडि संसद्को अन्तर्राष्ट्रिय सम्बन्ध र श्रम समितिले १० लाखभन्दा कमका खुद्रे आयोजनाका नाममा बजेट विनियोजन नगर्न निर्देशन दिएको थियो । सोही निर्देशनमा केन्द्रित रहेर बोर्डले चालू आर्थिक वर्षको बजेट विनियोजन गरेको छ ।
पर्यटन बोर्डले पर्र्यटक सेवा शुल्कबाट संकलन भएको रकमबाट वार्षिक कार्यक्रम सञ्चालन गर्ने गरेको छ । नेपालमा आउने पर्यटकले फर्कने बेलामा पर्यटक सेवा शुल्क तिर्छन् ।