सरकार गठनअघि नै मधेससँग सहमति गर्ने प्रयास
काठमाडौं : कांग्रेस र एमाले सरकार गठन गर्नुअघि मधेसका माग र मुद्दा सम्बोधन गर्ने बारेमा एक खालको समझदारी गर्ने प्रयासमा कांग्रेस र माओवादी जुटेका छन्।
कांग्रेस र माओवादीले शनिबार बिहान मधेसी मोर्चासहितको गठबन्धनसँग वार्ता गरेका छन् । सिंहदरबारमा भएको बैठकमा कांग्रेस, माओवादी र मधेसी मोर्चाका नेताहरु सहभागी थिए । सरकार गठन, मधेस आन्दोलनको सम्बोधन र संविधान संशोधन, सिमांकन, स्थानीय चुनावलगायतका विषयमा छलफल भएको थियो ।
बैठकमा कांग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल र मोर्चाबाट महन्थ ठाकूरलगायतका नेताहरु सहभागी थिए ।
मधेस आन्दोलन र मुद्दाबारे सहमति खोज्न तीनवटै पक्षबाट तीनतीन जना रहने गरी नौ सदस्यीय कार्यदल गठन गर्ने सहमति भएको छ । तर कार्यदलमा रहने नेताहरुको नाम चयन हुन बाँकी छ । बैठकपछि तराई मधेस लोकतान्त्रिक पार्टीका नेता हृयदेश त्रिपाठीले छलफल सकारात्मक ढंगले अघि बढेको बताए । सरकारमा जाने नजाने भन्ने बारेमा अहिले नै छलफल नभएको र यो प्राथमिकताको विषय पनि नभएको बताए ।
कांग्रेस र माओवादीसँगको छलफलपछि आन्तरिक गृहकार्य र रणनीतिका लागि मधेसी मोर्चासहित गठबन्धनको बैठक बसेको छ।
प्रतिक्रिया दिनुहोस !
