नेतामाथिको आक्रमणको विरोधमा पासाङल्हामु मार्ग बन्द
त्रिशूलीःतीन दलका केन्द्रीय नेतामाथि कुटपिट गर्नेमाथि कारबाहीको माग गर्दै आइतबार बिहानैबाट रसुवामा प्रदर्शन भएको छ । प्रदर्शनकारीले पासाङल्हामु मार्ग बन्द गरेका छन् ।
स्थानीय निकाय पुर्नसंरचनाको विषयमा रसुवाको धुन्चेमा शनिबार साँझ मुख्य दलका केन्द्रीय नेता सहभागी छलफलमा आक्रमण गर्नेलाई कारबाहीको माग गर्दै रसुवामा प्रदर्शन भएको हो । रसुवावासीले पासाङल्हामु मार्गको कालिकास्थान र राम्चेमा नाराजुलुश गर्दै सडक मार्ग ठप्प पारेका छन् ।
स्थानीयवासीले दोषीलाई पक्राउ गरेर कारबाहीको दायरामा नल्याएसम्म रसुवा बन्द गर्ने बताएका छन् । ‘दोषीलाई कारबाही नभएसम्म आन्दोलन रोकिदैन,’ राम्चे गाविसका प्राविधिक सहायक ठाकुर अधिकारीले भने । पीडितका आफन्तले आक्रमणकारीलाई प्रहरीले संरक्षण दिएको गुनासो गरेका छन् ।
नेपाल रेडक्रस सोसाइटी रसुवाका सभापतिसमेत रहेका बाबुलाल तामाङको नेतृत्वमा आएको २० जनाको टोलीले विनाकारण आक्रमण गरेको घाइते माओवादी केन्द्रका केन्द्रीय सदस्य माधव लामिछानेको भनाइ छ ।
घटनाका दोषीको पहिचान भइसकेको तर, तत्काल पक्राउ गर्न नसकिएको रसुवा प्रहरी प्रमुख डिएसपी फणिन्द्र प्रसाईंले बताए । आक्रमणमा गम्भीर घाइते नेकपा एमाले वैकल्पिक केन्द्रीय सदस्य माधव अर्याल र नेपाली कांग्रेसका महाधिवेसन प्रतिनिधि जनकजीवन उपाध्यायको काठमाडौँको ग्राण्डी अस्पतालमा उपचार भइरहेको छ भने अन्यको रसुवा अस्पताल धुन्चेमा उपचार भइरहेको छ ।
आक्रमणको एमालेले भत्सना गरेको छ । आइतबार एमाले सचिव एवम् प्रचार विभाग प्रमुख योगेश भट्टराईले विज्ञप्ति निकालेर घटनाको विरोध गर्दै दोषीमाथि कारबाहीको माग गरेका छन् ।