नेपाल-चीन अर्थ सचिवस्तरीय वार्ता काठमाडौंमा
![नेपाल-चीन अर्थ सचिवस्तरीय वार्ता काठमाडौंमा](https://annapurnapost.prixacdn.net/media/albums/579ea8d604f211.22389851_UKz4S5ZgbE.jpg)
काठमाडौं: नेपाल-चीन अर्थ सचिवस्तरीय बैठकमा भाग लिन चिनियाँ उपवाणिज्यमन्त्री गाओ यान भदौ पहिलो साता काठमाडौं आउने भएकी छन् । अर्थसचिव स्तरको संयुक्त आर्थिक तथा व्यापार समितिको बैठकमा भाग लिन उप वाणिज्यमन्त्री नेतृत्वको प्रतिनिधिमण्डल नेपाल आउन लागेको परराष्ट्र मन्त्रालयले जनाएको छ । बैठकमा नेपाली पक्षको नेतृत्व अर्थ मन्त्रालयका सचिव लोकदर्शन रेग्मीले गर्नेछन् ।
चीनको आर्थिक सहयोग, भूकम्पपछिको पुनर्निर्माणमा चिनियाँ सहयोग, प्रधानमन्त्री केपी शर्मा ओलीको चीन भ्रमणमा भएका सहमति र सम्झौताको कार्यान्वयन, चिनियाँ लगानीका कम्पनीले झेल्नुपरेका समस्यालगायतका विषयमा बैठकमा छलफल हुनेछ ।
अरनिको राजमार्ग स्तरोन्नतिका लागि चीनले घोषणा गरेको १४ अर्ब रुपयाँ नेपालले उपयोग गर्न नसकेको विषयमा समेत बैठकमा छलफल हुने अधिकारीले बताए । पूर्वराष्ट्रपति डा. रामवरण यादवको चीन भ्रमणमा चीनले उक्त रकम घोषणा गरेको थियो । उक्त राजमार्गको स्तरोन्नतिका लागि चिनियाँ पक्षले सम्भाव्यता अध्ययन गरिसकेको छ ।
चीनले २०७२ फागुनमा नेपाललाई दिने वार्षिक अनुदान सहयोगमा पाँच गुणाले बढाएर ८०० मिलियन आरएमबी पुर्याएको थियो । चीनले नेपाललाई बर्सेनि १५० मिलियन आरएमबी अनुदान उपलब्ध गराउँथ्यो ।
ओलीको चीन भ्रमणमा भएका सहमति र सम्झौता कार्यान्वयनका विषयमा बैठकमा समीक्षा हुने अर्थ मन्त्रालयका वैदेशिक सहायता समन्वय महाशाखाका प्रमुख बैकुण्ठ अर्यालले जानकारी दिए ।
माओवादी केन्द्रका अध्यक्ष पुष्पकमल दाहाल नेतृत्वमा बन्न लागेको सरकारले ओली नेतृत्वको सरकारले चीनसँग गरेका सन्धिसम्झौताको कार्यान्वयनलाई प्राथमिकता नदिने हो कि भन्ने आशंकाबीच यो बैठक तय भएको छ ।
नेपाल र चीनबीच ऐतिहासिक पारवहन यातायात सम्झौता, पोखरा विमानस्थल निर्माणसहित विभिन्न महत्त्वपूर्ण १० सम्झौतामा हस्ताक्षर भएको थियो ।
अर्थ मन्त्रालयले द्विपक्षीय बैठकमा चिनियाँ पक्षसँग उठाउनुपर्ने एजेन्डाका विषयमा जानकारी गराउन परराष्ट्र, वाणिज्य, आपूर्ति, भौतिक योजनालगायतका मन्त्रालयलाई पत्राचार गरेको छ ।
चीनसँग पुनर्निर्माण सम्झौता हुने
अर्थ मन्त्रालय वैदेशिक सहायता समन्वय महाशाखाका उपसचिव प्रेम उपाध्यायका अनुसार अर्थसचिव स्तरीय बैठकमा दुई देशबीच पुनर्निर्माण सम्झौता हुने भएको छ । चीनले भूकम्पपछिको पुनर्निर्माण सम्मेलनका क्रममा नेपाललाई तीन बिलियन आरएमबी अनुदान दिने घोषणा गरेको थियो ।
‘चीनले २०१६ देखि २०१८ सम्मका लागि पुनर्निर्माणका लागि तीन बिलियन आरएमबी दिने घोषणा गरेको छ । तर औपचारिक सम्झौता हुन सकेको थिएन । अर्थ सचिवस्तरीय बैठकमा सम्झौता हुने निश्चित छ', उनले भने ।
भूकम्पपछिको पुनर्निर्माण सम्मेलनमा बाचा भएअनुसार चीनले जुलाई २०१६ मा १० मिलियन डलर नगद नेपाललाई पहिलो किस्तामा उपलब्ध गराएको थियो । सन् २०१४ मा संयुक्त आर्थिक तथा व्यापार समितिको बैठक यसअघि बेइजिङमा भएको थियो ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)