बाबुरामले प्रचण्डलाई भने, 'म्यादी प्रधानमन्त्रीले केही काम गर्नसक्दैन'
दाङ : नयाँ शक्ति नेपालका संयोजक डा. बाबुराम भट्टराईले म्यादी प्रधानमन्त्रीले केही काम गर्ननसक्ने बताएका छन् ।
दाङमा आयोजित कार्यक्रमलाई सम्बोधन गर्दै उनले भने, म्याद तोकेर बनाइने सरकारले केही काम गर्नसक्दैन । यस्तो सरकारलाई कसैले पत्याउँदैन । भट्टराईले प्रधानमन्त्री बन्न लागेका माआवादी केन्द्रका अध्यक्ष पुष्पकमल दाहाल प्रचण्डलाई लक्षित गर्दै भने, 'यस्तो म्यादी प्रधानमन्त्रीले कसरी काम गर्नसक्छ ? छिमेकी र अन्तराष्ट्रिय समुदायले पनि पत्याउँदैनन् ।'
पुरानै संसदीय परम्परा कायम रहेसम्म सत्ताका लागि यस्तो चलखेल भइरहने र राजनीतिलाई सधै यसलाई अस्थिर बनाउने चिन्ता व्यक्त गरे ।
राजनीतिक स्थिरता र सत्ताको फोहोरी खेल अन्त्य गर्नका लागि प्रत्यक्ष निर्वाचित राष्ट्रपति वा प्रधानमन्त्रीको मोडलमा जानुपर्ने बताउँदै उनले भने, राजनीतिक स्थिरता र समृद्धिको औषधि नै प्रत्यक्ष निर्वाचित कार्यकारी प्रमुख हो । यो नहुँदासम्म हामी सरकार परिवर्तनमै अल्झिरहन्छौं ।