सर्वोच्चमा बल्ल १० इजलास !

काठमाडौं: नवनियुक्त ११ जना न्यायाधीश थपिएसँगै सर्वोच्च अदालतमा लामो समयपछि १० वटा इजलास गठन भएको छ । सोमबार १० वटै इजलासमा मुद्दाको सुनुवाइ भयो । २०६७ सालअघि मात्र सर्वोच्चमा १० वटा इजलास सञ्चालन भएका थिए ।

संसदीय सुनुवाइ विशेष समितिबाट सर्वोच्च अदालतको न्यायाधीशमा अनुमोदन गरिएका ११ जनाले सोमबार राष्ट्रपति विद्यादेवी भण्डारीबाट नियुक्ति तथा प्रधानन्यायाधीश सुशीला कार्कीसँग शपथ लिएपछि १० वटा इजलास तोकिएको हो । बीचमा न्यायाधीश अभावका कारण चारपाँचवटा इजलासमात्र सञ्चालन भइरहेको थियो ।

नवनियुक्त न्यायाधीश दीपककुमार कार्की, केदारप्रसाद चालिसे, शारदाप्रसाद घिमिरे, हरिकृष्ण कार्की, विश्वम्भरप्रसाद श्रेष्ठ, ईश्वरप्रसाद खतिवडा, डा. आनन्दमोहन भट्टराई, अनिलकुमार सिन्हा र प्रकाशमानसिंह राउत दौरासुरुवाल, कालो कोट र कालै भादगाउँले टोपीमा तथा मीरा खड्का र सपना प्रधान मल्ल साडी र कालो कोटमा 'न्यायमूर्ति' को आसनमा थिए ।

न्यायाधीशको चाप बढेपछि भूकम्पले क्षति पुगेको पुरानो सर्वोच्च अदालत भवनमा समेत थप चारवटा इजलासको प्रबन्ध गरियो । '६ वर्षपछि आज एकैसाथ १० वटा इजलास लागेका छन् । अब मुद्दाको चाप स्वतः घटेर छिटो न्याय प्राप्तिको अपेक्षा गर्न सकिन्छ', सर्वोच्चका प्रवक्ता नहकुल सुवेदीले अन्नपूर्णसँग भने, 'नियुक्ति र शपथलगत्तै १२ बजेदेखि नै मुद्दामा सुनुवाइका लागि इजलास लाग्यो ।'

सुवेदीका अनुसार अहिले सर्वोच्चमा झन्डै २४ हजार मुद्दा थाती छन् । त्यसमध्ये करिब १० हजार मुद्दा दुई वर्ष नाघेका हुन् भने पाँच वर्ष नाघेका मुद्दा दुई हजार छन् । सर्वोच्चको रेकर्डअनुसार प्रधानन्यायाधीश कार्कीले एकैसाथ दुई सय ८० मुद्दाको पेसी तोकेकोमा ३४ मुद्दामा फैसला र ५० वटामा आदेश भयो भने एक सय ३१ हेर्न नभ्याइनेको सूचीमा परे ।

 

शपथ लिएर सर्वोच्च पुगेपछि नवनियुक्त न्यायाधीशलाई प्रधानन्यायाधीश कार्की र अन्य न्यायाधीश तथा कर्मचारीले बधाई तथा शुभकामना दिएका थिए । प्रायजसो नवनियुक्त न्यायाधीशलाई पुरानासँगै मिश्रित इजलास तोकिएको थियो ।

प्रधानन्यायाधीश कार्कीले न्यायाधीश मीरा र सपनाको संयुक्त इजलास तोकेकी थिइन् । उक्त इजलासमा महिला संवेदनशीलता जोडिएका मुद्दा परेका थिए । जबर्जस्ती करणी मुद्दासहित ठगी, ज्यान मार्ने उद्योग, अनियमित रूख कटान, कर्तव्य ज्यानजस्ता मुद्दा तोकिएको थियो ।

उक्त इजलासबाट कर्तव्य ज्यान मुद्दाबाहेक अरूमा सुनुवाइ अघि बढाउन नपर्ने गरी अदालती भाषामा 'निस्सा नहुने' आदेश भयो । यता न्यायाधीश चोलेन्द्रशमशेर राणा र हरिकृष्ण कार्कीको इजलासमा नेपाल बार एसोसिएसनका अध्यक्ष शेरबहादुर केसीले बिधुवा महिलाको करार बदरसम्बन्धी मुद्दामा बहस गरे । यसअघिको बार निर्वाचनमा कार्कीसँग केसी अध्यक्षमा पराजित भएका थिए ।

बहस गर्दैगर्दा इजलासमा हार्दिकताको वातावरण देखिएको थियो । केसीले कार्कीलाई शुभकामना दिए । करारसम्बन्धी उक्त विवादमा इजलासले तल्लो अदालतबाट मिसिल झिकाउने आदेश दियो । प्रधानन्यायाधीशसहित सर्वोच्चमा सोमबार एकैपल्ट २० जना न्यायाधीश हुँदा रमाइलो वातावरण थियो । न्यायाधीश संख्या एकैपल्ट ह्वात्तै बढेका कारण मुद्दाका मिसिल व्यवस्थापनमा धपेडी परेको गुनासो कर्मचारीले गरे ।