जोकोभिच र हालेपलाई उपाधि

टोरन्टोः रोजर्स कप टेनिस प्रतियोगिताको उपाधि विश्व नम्बर एक खेलाडी नोभाक जोकोभिचले जितेका छन् । सर्बियन खेलाडी जोकोभिचले सोमबार बिहान भएको फाइनलमा जापानका केई निसिकोरीलाई सोझो सेटमा हराउँदै उपाधि हात पारेका हुन् । २९ वर्षीय जोकोभिचले रोजर्स कपको उपाधि जितेको यो चौथो पटक हो । उनले सन् २०१२ पछि पहिलो पटक रोजर्स कपको उपाधि चुमेका हुन् ।

जोकोभिचले यसअघि सन् २००७, सन् २०११ र सन् २०१२ मा यो प्रतियोगिताको उपाधि जितेका थिए । सबैभन्दा बढी पटक रोजर्स कपको उपाधि जित्ने खेलाडी भने चेक गणतन्त्रका इभान लेन्डल हुन् । तात्कालीन चेकोस्लोभाकियाबाट प्रतिनिधित्व गर्दै लेन्डलले ६ पटक यो प्रतियोगिताको उपाधि चुमेका थिए । ५६ वर्षीय लेन्डल हाल चर्चित खेलाडी एन्डी मुरेका प्रशिक्षक हुन् ।

वर्षको सातौं उपाधि जित्ने क्रममा जोभोभिचले तेस्रो वरीयतामा आसिन जापानी खेलाडी निसिकोरीलाई ६–३, ७–५ अंकले हराए । पहिलो सेटमा सहज जित निकालेका जोकोभिचले दोस्रो सेटमा भने निसिकोरीको कडा चुनौतीको सामना गर्नु परेको थियो । जोकोभिचले कम उमेरमै एकपछि अर्को गर्दै अधिकांश ठूला प्रतियोगिताको उपाधि हात पारिसकेका छन् ।

ओलम्पिकमा समेत स्वर्ण पदक जितिसकेका जोकोभिचले निसिकोरीसँगको फाइनल खेल रोचक भएको बताए । ‘यो उपाधिले मलाई थप खुसी दिएको छ । पहिलो सेटमा राम्रै खेलेँ तर, दोस्रो सेट भने प्रतिस्पर्धात्मक बनेको थियो’, खेलपछि जोकोभिचले भने । १२ पटक एकल ग्रान्डस्लामको उपाधि जितेका जोकोभिचले सन् २००८ को बेइजिङ ओलम्पिकमा स्वर्ण हात पारेका थिए ।

रोजर्स कपको सेमिफाइनलमा जोकोभिचले फ्रान्सका १० औं वरीयता प्राप्त खेलाडी गेल मोनफिल्सलाई ६–३, ६–२ को सोझो सेटमा हराउँदै फाइनलको यात्रा तय गरेका थिए । जापानी स्टार निसिकोरीले भने सेमिफाइनलमा स्विट्जरल्यान्डका दोस्रो वरीयता प्राप्त खेलाडी स्टान वावरिन्कालाई ७–६ (८–६), ६–१ अंकले हराउँदै जोकोभिचसँगको भिडन्त पक्का गरेका थिए ।

यसैगरी महिला एकलतर्फको उपाधि रोमानियाकी सिमोना हालेपले जितेकी छन् । पाँचौं वरीयताकी हालेपले आइतबार राति नै भएको फाइनल भिडन्तमा अमेरिकी प्रतिद्वन्द्वी माडिसन किजलाई ७–६ (७–२), ६–३ अंकले हराउँदै उपाधि हात पारेकी हुन् । हालेपले १० औं वरीयताकी किजलाई पन्छाउने क्रममा पहिलो सेटमा कडा चुनौतीको सामना गर्नु परेको थियो । २४ वर्षीया हलेपले हालसम्म १४ वटा महŒवपूर्ण उपाधि जितिसकेकी छन् ।

‘टोरन्टोमा खेल्दा मलाई आफ्नै घरेलु कोर्टमा खेलिरहेको अनुभव हुन्छ । खेलभर धेरै समर्थकले मेरो हौसला बढाइरहे । म यो उपलब्धिलाई कहिल्यै भुल्न सक्दिनँ’, हालेपले भनिन् । फाइनलमा पराजित भएकी किजले हालेप उपाधिको सच्चा हकदार भएको प्रतिक्रिया दिइन् । ‘मैले सकभर हालेपलाई रोक्ने प्रयास गरेकी थिएँ । पहिलो सेटमा सोचेको जस्तै भयो तर, दोस्रो सेटमा उनी अझ आक्रामक रूपमा प्रस्तुत भइन् । यसपटक मैले विगतको भन्दा धेरै राम्रो खेलेकी छु । रियो ओलम्पिकका लागि पनि यो प्रतियोगिताले धेरै सहयोग गरेको छ’, किजले भनिन् ।