बुढीगण्डकीले सिर्दिबासका १० घर बगायो

गोरखाः निरन्तरको बर्षाले गोरखाको सिर्दिबास १ जगतको १० घर बगाएको छ । बुढीगण्डकीले धार परिवर्तन गरी गाउँतिर कटान गर्न थालेपछि जगतको बगरटोल नै विस्थापित भएको स्थानीय लक्ष्मण घलेले जानकारी दिए ।

‘तीनदिन यता १० घर बगायो’ उनले भने, ‘हामी माथि भिरपाखामा त्रिपाल टाँगेर बसेका छौं ।’ उनका अनुसार आइतबार पूर्णबहादुर गुरुङको घर बगाएको थियो ।

त्यसयता बेलबहादुर लामा, अभिषेक लामा, कृष्णबहादुर लामा, विशाल हिमाली घले, दिलमाया गुरुङ, विशाल गुरुङ, कमानसिँह घले, मानबहादुर गुरुङ र धनबहादुर गुरुङको घर बगाएको छ । सोमबार राती विशाल हिमाली घलेको घर बगाएको उनले बताए । ‘मेरो छोराका तीन होटल थिए, हिजो राती सबै बगायो,’ उनले भने, ‘अरु दुई होटल पनि बगायो ।’

जगत मनास्लु ट्रेकिङ क्षेत्रको मुख्य बजार हो । यहाँ मनास्लु क्षेत्रमा उडान गर्ने हेलिकोप्टरले तेल भर्ने बिसौनी पनि थियो । ‘बुढिगण्डकीले हेलिप्याड पनि लग्यो’ अर्का स्थानीय राजेन्द्र कार्कीले भने, ‘गण्डकीले घर भत्काउन थालेपछि गाउँलेले घरको काठपात, जस्ताहरु डोरीले बाँधेर तान्दै जोगाएका छन् । त्यही जस्ता र काठपातले टहरो बनाएर पखेरामा बसेका छन् ।’

जगतको माथिल्लो टोलमा २५ घर छन् । त्यहाँसम्म भने गण्डकी पुग्न सकेको छैन । बगरटोल नयाँ बस्ती हो । यहाँ करिब १५ बर्षयता बसोबास गर्न सुरु गरेका हुन् ।

गाउँ नै खाली हुने गरी बुढीगण्डकी पसेपछि गाउँलेको आलाप विलाप भएको अर्का स्थानीय सरिता घले बताउछिन् । ‘गाउँलेको बिलाप भयो । सरकारले देखेन,’ उनले भनिन्, ‘अस्ति साउन १२ गतेदेखि गण्डकी गाउँतिर आएको हो । धमाधम घर बगाएको छ । तर हाम्रो कुरा सरकारले थाहा पनि पाएन ।’

‘प्रहरी दिनदिनै आउँछन्,’ उनले भनिन् ‘उनीहरुले पनि के गर्ने हो र ? तपाइँहरुलाई खतरा छ । यहाँ नबस्नु मात्र भनेर जान्छन् ।’
बुढीगण्डकी गाउँमा पसेपछि स्थानीयबासी त्रासमा छन् । ‘रातभरि निद्रा लाग्दैन,’ सरिता भन्छिन्, ‘गाउँलेहरु उठ्दै गण्डकीतिर लाइट बालेर हेर्दै रात बिताउँछन् ।’

सदरमुकामबाट ३० कोश दुरीमा रहेको जगत हिमालपारि पर्ने गाउँ हो । यो बर्ष बाटो बिग्रिएका कारण खच्चड हिड्न सकेको छैन। सामान ढुवानीको एक मात्र बिकल्पको रुपमा रहेको खच्चड पनि नहिड्दा त्यहाँ खानेकुराको अभाव छ ।