अमेरिकामा नेपाली विज्ञ र वैज्ञानिकको भेला
अमेरिकाः सिकागोमा जम्मा भएका नेपालीमूलका विज्ञ र वैज्ञानिकहरूले नेपाललाई सहयोग गर्नसकिने अनेकौं सम्भाव्यताहरू औंल्याएका छन् ।
अमेरिकाका विभिन्न विश्वविद्यालय र अनुसन्धान संस्थामा कार्यरत नेपालीले यस्ता सम्भाव्यता औंल्याएका हुन् ।
सहभागीले यूएस-नेपाल पोलिसी रिसर्च सेन्टरको एकदिने सम्मेलनका क्रममा नीति र प्रविधिको विकासमा नेपाललाई प्रशस्तै सहयोग गर्न सकिने बताएका छन् ।
सम्मेलनमा नेपालको खस्कँदो आर्थिक वृद्धिदर, समस्या र समाधानका बारेमा डा.सुरेन्द्रराज देवकोटा, स्वास्थ्य विज्ञान र शिक्षा नीतिका बारेमा डा. केशव पौडेल, भूकम्पपछिको पुनर्निर्माणमा सहकार्य र सम्भाव्यताबारे डा. आमोद पोख्रेल, नेपाल र अमेरिकाको उच्च शिक्षाका बारेमा डा.अर्जुन बञ्जाडे, विद्युतीय संकेतको निकास बारे डा. यादव पण्डित र अमेरिकामा नेपाली आप्रवासी, चुनैति र सम्भावनाबारे डा.देशराज सोन्योकले ‘टु द प्वइन्ट-अफ द प्वइन्ट' प्रस्तुति गरेका थिए ।
विद्युतीय प्रविधिको प्रस्तुति अपनाइएको सम्मेलनमा डा. राजेन्द्र पंज्ञेनी, डा. दीपक कोइराला, दीनबन्धु भट्ट, मदन संग्रौला र किरण थापाले पनि विभिन्न विषयमा प्रस्तुति गरेका थिए ।
पूर्वमहान्यायाधिवक्ता यज्ञमूर्ति बन्जाडे र लेखक शिव प्रकाशले नेपालको खस्कँदो राजनीतिक अवस्था र सम्मेलनबारे प्रकाश पारेका थिए । नेपालका लागि अवैतनिक कन्सुलर जेनरल मार्भिन ए बस्ट्रिन नेपाली स्कलरको यो उत्साहलाई आफ्नो पूर्ण सहयोग रहने वचन दिए ।
उत्साही नेपाली युवा विज्ञ र वैज्ञानिकहरूको एकदिने सम्मेलनले डा. आमोद पोख्रेललाई आगामी दुई वर्षका लागि अध्यक्षमा चयन गरेको छ । सदस्यसचिवमा डा. अर्जुन बन्जाडे चुनिएका छन् ।
सदस्यमा कविता खरेल, जगदम्बा अधिकारी, दीनबन्धु भट्ट, डा. राजन पन्त र डा. देशराज सोन्योक चुनिएका छन् ।
प्रतिक्रिया दिनुहोस !
