चार एपीसी चीनबाट सीधै सुडान लैजाने तयारी

काठमाडौंः प्रहरी प्रधान कार्यालयले चारवटा आर्मोड पर्सोनेल क्यारियर (एपीसी) चीनमा खरिद गरी सीधै सुडान लैजाने तयारी गरेको छ । यसका लागि डीआईजी नेतृत्वको टोली चीन पुगेर फर्किएको छ ।

प्रहरी मुख्यालयका डीआईजी रोमेन्द्रसिंह देउजा नेतृत्वको टोली आइतबार चीन पुगेको थियो । संयुक्त राष्ट्रसंघ (यूएन) ले सुडानको मिसन फिर्ता गर्ने चेतावनी दिएपछि प्रहरी मुख्यालयलाई चार एपीसी सुडान पुर्‍याउनुपर्ने बाध्यता आइपरेको छ । सुडान खटिएको एफपीयू मिसनमा आठवटै एपीसी पठाए पनि चारवटा बिग्रिएर थन्किएपछि यूएनले पुनः चारवटा एपीसी पठाउन नेपाल प्रहरीलाई पत्राचार गरेको थियो ।

देउजाको टोलीमा एसपी नरोत्तम प्रधान, गृह मन्त्रालयका शाखा अधिकृत माधव शर्मासँगै मुख्यालयको एमटी शाखा, सञ्चार र हतियार शाखाका प्रतिनिधि सहभागी थिए । एपीसी खरिदका लागि गत वर्ष वैशाखमै प्रहरी मुख्यालयले बोलपत्र आह्वान गरेको थियो । चार कम्पनीले आवेदन दिएका थिए । लोकल एजेन्ट डाइनेस्टीमार्फत सिंगापुरको साप सर्भिस कम्पनीले एपीसीको ठेक्का पाएको थियो । साउथ सुडान र सुडानको डार्फरमा नेपाल प्रहरीको फर्म पुलिस युनिट (एफपीयू) खटिँदै आएको छ ।

झन्डै १५ करोड मूल्यको हाराहारीमा पर्ने चारवटा एपीसी सुडान पठाएपछि यूएनले शतप्रतिशत रिम्बर्समेन्ट नेपाल प्रहरीलाई तिर्नेछ । तयारी अवस्थामा रहेको एपीसी चीनबाट सीधै सुडान लैजान सुडान सरकार र यूएनको अनुमति लिनुपर्छ । त्यसका लागि प्रहरी मुख्यालयले गृह मन्त्रालयलाई आइतबार पत्र पठाएको छ । गृहले परराष्ट्र मन्त्रालयलाई यसबारे जानकारी गराएर मार्गप्रशस्त गरिदिन अनुरोध गरिसकेको छ ।

‘चारवटा एपीसी सुडान पुगेपछि यूएनले फर्काउनै लागेको एफपीयू मिसन रोकिने भयो । जसरी पनि हामीले चारवटा पठाउनुपर्ने बाध्यता छ’, डीआईजी देउजाले अन्नपूर्णसँग भने, ‘कानुनी प्रक्रिया मिलाउँदा धेरै ढिला भयो । बैंकले प्रतितपत्र खोल्न नमान्दा पनि धेरै झन्झट बेहोरियो । बल्लतल्लत एउट बैंकले मानेपछि प्रक्रिया पूरा भयो । अहिले पठाउन लागिएको एपीसी राम्रो र गुणस्तरको छ ।'

अहिले एफपीयू, इन्डिभिज्युअल र प्रोफेसनल गरी तीनवटा विधामा नेपाल प्रहरीका तीन सय ७५ जना द्वन्द्वग्रस्त मुलुकमा खटिँदै आएका छन् ।डीआईजी देउजाले पछिल्लो एपीसी खरिद प्रक्रियामा कसैले खोट लगाउने ठाउँ नभएको दाबी गरे । उनले भने, ‘सबै प्रक्रिया पुर्‍याएर खरिद गरेका छौं । पहिलेको जस्तो काण्ड दोहोरिँदैन ।'

सुडानमै एपीसी प्रकरणमा भ्रष्टाचार गरेको अभियोगमा पूर्वआईजीपी रमेशचन्द ठकुरी, ओमविक्रम राणा, हेमबहादुर गुरुङलगायत प्रहरी अधिकृत अहिले विशेष अदालतमा भ्रष्टाचार मुद्दा खेपिरहेका छन् ।