नेसनल माइक्रोको सेयर आकर्षण

काठमाडौं: नेसनल माइक्रोफाइनान्स वित्तीय संस्थाको आईपीओ भर्न सर्वसाधारणको घुईंचो लागेको छ । गत आइतबारदेखि निष्कासन खुला भएको यो माइक्रोफाइनान्सको सेयर सेयर भर्ने म्याद बुधबारसम्म छ । संकलन केन्द्र धेरै राखिएकाले विगतमा जस्तो यसपटक आवेदकले धेरै दुःख भने पाएका छैनन् ।

पर्याप्तमात्रामा संकलन केन्द्र राखिएको छ । फारम पनि सजिलै पाइएको आवेदकहरूको भनाई छ । सेयरको दोस्रो बजार बढेका बेला आइपीओ (साधारण सेयर) मा पनि चाप बढ्ने गर्छ । माइक्रोफाइनान्सको सेयरमा लगानीकर्ताको अझ बढी आकर्षण रहँदै आएको छ । विगतमा सर्वसाधारणले धेरै सास्ती खेप्नुपरेपछि यसपटक संकलन केन्द्र पर्याप्तमात्रामा बढाइएको हो ।

उपत्यकामा नेपाल इन्भेस्टमेन्ट बैंकको केन्द्रीयसहित शाखा कार्यालय तथा एनआईबीएल क्यापिटलमा आवेदन फारम बुझाउन पाउने व्यवस्था छ । यो सेयरमा सोमबारसम्म दुई अर्ब ४० करोड रुपैयाँको सेयर आवेदन परिसकेको छ । तेस्रो दिनको भने मंगलबार साँझसम्म पनि अन्तिम तथ्यांक आउन बाँकी रहेको बिक्री प्रबन्धक एनआईबीएल क्यापिटल लिमिटेडले जानकारी दिएको छ । यस दिन अझ बढी रकमको आवेदन परेको अनुमान छ ।

एनआईबीएल क्यापिटल लिमिटेडका महाप्रबन्धक मेखबहादुर थापाले धेरै संकलन केन्द्र राखिएकाले आवेदकलाई सहज भएको बताए । सोमबारसम्म दुई अर्ब ४० करोड हाराहारीमा आवेदन परेको छ । मंगलबारको विवरण साँझसम्म आएको छैन’, उनले भने ।

लगानीकर्ताले न्यूनतम ५० कित्तादेखि अधिकतम १० हजार कित्तासम्मका लागि आवेदन दिन पाउनेछन् । एक सय रुपैयाँ अंकित मूल्यको तीन लाख कित्ता सेयर सर्वसाधारणका लागि बिक्री खुला गरिएको हो ।

धादिङबेसीमा केन्द्रीय कार्यालय रहेको राष्ट्रियस्तरको यो माइक्रोफाइनान्सको अधिकृत पुँजी ५० करोड रुपैयाँ र जारी पुँजी १० करोड रुपैयाँ छ । आईपीओ निष्कासनपछि कम्पनीको चुक्ता पुँजी पनि १० करोड रुपैयाँ पुग्नेछ ।

नेपाल इन्भेस्टमेन्ट बैंक, कुमारी बैंक, श्री इन्भेस्टमेन्ट एन्ड फाइनान्स कम्पनी, पश्चिमाञ्चल डेभलपमेन्ट बैंकको लगानी छ । सिनर्जी फाइनान्स, बिजनेस युनिभर्सल डेभलपमेन्ट बैंक र काठमाडौं फाइनान्सले पनि यसमा लगानी गरेका छन् । बिजनेस युनिभर्सल अहिले सिद्धार्थ बैंकसँग मर्जमा गइसकेको छ ।

संकलन केन्द्र धेरै राखिएकाले विगतमा जस्तो यसपटक आवेदकले धेरै दुःख भने पाएका छैनन् । फारम पनि सजिलै पाइएको आवेदकको भनाइ छ ।

आर्थिक वर्ष २०७२/७३ मा चार करोड आठ लाख ५५ हजार रुपैयाँ खुद नाफा कमाएको छ । अघिल्लो आर्थिक वर्ष २०७१/७२ मा कमाई जम्मा एक करोड तीन लाख ९७ हजार रुपैयाँमात्र थियो । यो वित्तीय संस्थाको रिजर्भ कोषमा पनि पाँच करोड पाँच लाख चार हजार रुपैयाँ पुगिसकेको छ ।

नेसलन माइक्रोफाइनान्सले १० करोड २५ लाख ३० हजार रुपैयाँ निक्षेप संकलन गरी ८७ करोड ७६ लाख ४२ हजार रुपैयाँ कर्जा प्रवाह गरेको छ । खुद ब्याज आम्दानी आठ करोड ४८ लाख ४५ हजार रुपैयाँ पुगेको अपरिस्कृत वित्तीय विवरणमा देखाइएको छ ।

आर्थिक वर्ष २०७४/७५ सम्ममा ३४ करोड रुपैयाँ सेयर पुँजी र जगेडा कोषमा १५ करोड ७७ लाख ३६ हजार रुपैयाँ पुर्याउने प्रक्षेपण गरेको छ । । तीन लाख कित्ता सेयरमध्ये १२ हजार कित्ता कर्मचारी र १५ हजार कित्ता सामूहिक लगानी कोषका लागि छुट्याइएको छ ।