बाउजा अर्जेन्टिनाको नयाँ प्रशिक्षक
ब्युनोस आयर्सः विश्वकप उपविजेता अर्जेन्टिनाको राष्ट्रिय फुटबल टोलीको प्रशिक्षकमा एडुगार्डो बाउजा नियुक्त भएका छन् । बाउजा यसअघि ब्राजिलको क्लब साओ पाउलोमा आबद्ध थिए ।
कोपा अमेरिका सेन्टेनारियोलगत्तै जेरार्डो मार्टिनोले राजीनामा दिएपछि अर्जेन्टिनाको प्रशिक्षक पद रिक्त थियो । पछिल्लो तीन वर्षमा अर्जेन्टिना कोपा अमेरिकामा दुई पटक र विश्वकपमा एकपटक फाइनलसम्म पुगे पनि उपाधिबाट विमुख भएको थियो ।
गत जुनमा भएको कोपा अमेरिकाको फाइनलमा अर्जेन्टिना साबिक विजेता चिलीसँग लगातार दोस्रो संस्करणमा उपाधि भिडन्तमा पराजित भएको थियो । मार्टिनोको उत्तराधिकारीका रूपमा बाउजाबाहेक एट्लेटिको म्याड्रिडका डिएगो सिमोन र टोट्टनहामका माउरिसियो पोचेटिनोलाई पनि बलियो प्रत्यासीका रूपमा हेरिएको थियो । बार्सिलोनालाई एक वर्ष प्रशिक्षण दिएका मार्टिनोले सन् २०१४ को विश्वकपपछि अर्जेन्टिनाको प्रशिक्षण जिम्मेवारी पाएका थिए ।
विश्वकपको फाइलनलमा आफ्नो टोली जर्मनीसँग १-० गोलले पराजित भएपछि अलेजान्द्रो साबेलाले अर्जेन्टिनाको प्रशिक्षक पद छाड्नु परेको थियो । पछिल्लो समय उपाधि जित्न नसकेकै कारण प्रशिक्षकहरूले अर्जेन्टिनाको पद छाड्नु परेको छ । ५८ वर्षीय बाउजाका लागि अहिले धेरै चुनौती छन् । स्टार स्ट्राइकर लियोनल मेसीले गत कोपा अमेरिकाको फाइनलपछि अप्रत्याशित रूपमा अन्तर्राष्ट्रिय फुटबलबाट संन्यास लिएका कारण अर्जेन्टिनामा यी स्ट्राइकरको अभाव खड्कनेछ ।
अर्जेन्टिनाको हरेक राम्रा प्रदर्शनमा मेसीको भूमिका महत्वपूर्ण रहँदै आएको थियो । अर्जेन्टिना यतिबेला सन् २०१८ को विश्वकपको छनोट खेल्दैछ । अर्जेन्टिनाको आगामी खेल सेप्टेम्बरमा रहेको छ । ६ खेल खेलिसकेको अर्जेन्टिना ११ अंकसहित तालिकाको तेस्रो स्थानमा छ ।
१० टोलीको सहभागिता रहेको दक्षिण अमेरिकी छनोटबाट शीर्ष चार टोली सोझै विश्वकपमा छनोट हुनेछन् भने पाँचौं स्थानमा आउने टोलीले अन्तर महादेशीय प्ले अफ खेल्नु पर्नेछ ।
तालिकाको शीर्षस्थानमा रहेको उरुग्वे र दोस्रो स्थानमा रहेको इक्वेडरको समान १३÷१३ अंक छ । सन् १९८१ पछि नौ वर्ष अर्जेन्टिनी टोलीमा रहेका पूर्वरक्षक बाउजाले तीनपटक मात्र अन्तर्राष्ट्रिय फुटबलमा मैदानमा ओर्लने मौका पाएका थिए । सन् १९९० को विश्वकपमा अर्जेन्टिना फाइनलमा पुगे पनि बाउजाले एक खेल पनि खेल्ने मौका पाएका थिएनन् ।
उनको प्रशिक्षण जीवन भने सन् १९९८ देखि सुरु भएको थियो । आफूले तीन सयभन्दा बढी खेल खेलेको रोसारियो सेन्ट्रलबाटै उनले आफ्नो व्यावसायिक प्रशिक्षण जीवन सुरु गरेका थिए । अर्जेन्टिनाले सिनियर अन्तर्राष्ट्रिय फुटबलमा सन् १९९३ यता कुनै पनि ठूला उपाधि जित्न सकेको छैन ।
प्रतिक्रिया दिनुहोस !
