खनाल र अर्यालको संसदीय सुनुवाइ सम्पन्न
काठमाडौं: व्यवस्थापिका-संसद्, संसदीय सुनुवाइ विशेष समितिले बुधबार थप दुई प्रस्तावित राजदूतको संसदीय सुनुवाइ गरेको छ ।
समितिले परराष्ट्र सेवामा रहेका प्रस्तावित राजदूतमध्ये रमेशप्रसाद खनाल र झविन्द्रप्रसाद अर्यालको बुधबार संसदीय सुनुवाइ गरेको हो । सरकारले खनाललाई जर्मनी र अर्याललाई इजिप्टका लागि राजदूतमा प्रस्ताव गरेको छ ।
दुबैजना परराष्ट्र मन्त्रालयका सहसचिव हुन् । समितिले मंगलबार पाँचजनाको सुनुवाइ गरेको थियो । परराष्ट्र सेवामा रहेकामध्ये बेल्जियमका लागि राजदूतमा प्रस्तावित लोकबहादुर थापाको भने बिहीबार बिहानको बैठकमा संसदीय सुनुवाइ गर्ने समितिले कार्यसूची तय गरेको छ ।
संसदीय सुनुवाइका क्रममा प्रस्तावित राजदूत खनाल र अर्यालले आ-आफ्नो कार्ययोजना र सोच प्रस्तुत गर्दै जर्मनी र इजिप्टको नेपालसँगको सम्बन्धलाई आफ्नो कार्यकालमा नयाँ उचाइ प्रदान गर्ने प्रतिबद्धता जनाएका छन् ।
जर्मनी नेपालको ठूलो विकास साझेदारमूलुक हो । जर्मनी र नेपालको संयुक्त लगानीमा यहाँ करिब १४ उद्योग सञ्चालनमा छन् । नेपालबाट जर्मनीमा खासगरी पश्मिना र जडीबुटी निर्यात हुँदै आएको छ । पछिल्लो समय जर्मनबाट बर्सेनि १० हजारको हाराहारीमा पर्यटन नेपाल आउने गरेकामा आफ्नो कार्याकालमा त्यसलाई बढाएर ५० वर्ष पुर्याउने प्रस्तावित राजदूतले अठोट व्यक्त गर्नुभयो ।
सरकारले परराष्ट्र सेवाभन्दा बाहिरबाट थप १४ जनालाई राजदूतका लागि प्रस्ताव गरेको छ ।
प्रतिक्रिया दिनुहोस !
