एएफसी कपको तयारीमा थ्रीस्टार
काठमाडौंः रुस्लान थ्रीस्टार क्लबले मंगोलिसामा अगस्ट २१ तारिखबाट सुरु हुने एएफसी कपको प्ले अफ छनोटका लागि तयारी तीव्र बनाएको छ । टोलीले तीन सातादेखि तयारी सुरु गरेको हो ।
२०७१ सालको लिग विजेताको रूपमा थ्रीस्टारले एएफसी कप प्ले अफ छनोट खेल खेल्ने मौका पाएको हो । थ्रीस्टारले एएफसी कपका लागि मेघराज केसीलाई प्रशिक्षकमा नियुक्त गरेको थियो । टोलीको सहयाक प्रशिक्षकमा रवीन्द्र शिलाकार छन् ।
प्रशिक्षक केसीको सल्लाहमा थ्रीस्टारले एएफसी कपका लागि २० खेलाडीलाई टोलीमा अनुबन्ध गरेर प्रशिक्षण र तयारी सुरु गरेको हो । टोलीको गोलरक्षकमा एलन न्यौपाने, विनय श्रेष्ठ र अभिषेक बराल छन् । रक्षकमा रञ्जित धिमाल, देवेन्द्र तामाङ, पिटर सेगुन, विजय धिमाल, सरोज दाहाल र विष्णु सुनार छन् । मिडफिल्डरमा विक्रम लामा, नीराजन खड्का, प्रकाश बुढाथोकी, सुनिल बल, विजय गुरुङ र विष्णु गुरुङ छन् ।
स्ट्राइकरमा बुद्ध राज लिम्बु (चेम्जोङ), असीमजंग कार्की, रोशन मल, मार्टिन्स कायोडे अजायी र सुशान श्रेष्ठ रहेका छन् । टोलीमा रहेका दुई विदेशी खेलाडी पिटर सेगुन र मार्टिन्स कायोडे नाइजेरियाका हुन् ।
एएफसी प्लेअफ छनोटमा थ्रीस्टार समूह ‘बी' मा रहेको छ । समूहमा आयोजक मंगोलियाको इर्चिम फुटबल क्लब र कम्बोडियाको नागावोर्लड फुटबल क्लब छन् । थ्रीस्टारले पहिलो खेल अगस्ट २१ तारिखमा आयोजक इर्चिमसँग खेल्नेछ । दोस्रो खेलान अगष्ट २३ मा नागावोर्लडसँग प्रतिस्पर्धा गर्नेछ । तीन समूहमा विभाजन गरिएको प्लेअफ छनोट चरणमा नौ टोलीको सहभागिता रहेको छ ।
प्रत्यके समूहको उत्कृष्ट टोली अर्को चरणमा प्रवेश गर्नेछ । एएफसी कपको प्ले अफ खेल्ने थ्रीस्टार नेपालको पहिलो टोली हो । यसअघि लिग विजेताको रूपमा थ्रीस्टार दुई पटक एएफसी प्रेसिडेन्ट कपको अन्तिम चरणमा पुगेको थियो ।
एएफसी कपको तयारीका लागि थ्रीस्टारले साउन २१ गते विभागीय टोली एपीएफसँग मैत्रीपूर्ण फुटबल खेल्नेछ । मैत्रीखेल एन्फा मैदान सातदोबाटोमा हुनेछ ।
प्रतिक्रिया दिनुहोस !
