अमेरिकाको झन्डा फेल्प्सले बोक्ने 

रियो दी जेनेरियोः कीर्तिमानी ओलम्पियन माइकल फेल्प्सले रियो ओलम्पिकको उद्घाटनमा अमेरिकी टोलीको नेतृत्व गर्दै झन्डा बोक्ने भएका छन् । ओलम्पिक खेलकुदको मार्च पास्टमा फेल्प्सले राष्ट्रिय टोलीको नेतृत्व गर्ने अवसर पाएको यो पहिलोपटक हो । अमेरिकाको राष्ट्रिय ओलम्पिक कमिटीलेले रियो दी जेनेरियोस्थित माराकाना रंगशालामा शुक्रबार हुने उद्घाटन समारोहमा पौडीबाज फेल्प्सले झन्डा बोक्ने जनाएको हो ।

फेल्प्स ओलम्पिक खेलकुदमा सर्वाधिक स्वर्ण र पदक जित्ने खेलाडी हुन् । उनले ओलम्पिक खेलकुदमा १८ स्वर्णसहित कुल २२ पदक जितेका छन् । सन् २०१२ को लन्डन ओलम्पिक खेलकुदपछि सन्न्यास लिएका ३१ वर्षीय फेल्प्सले त्यसको केही समयपछि अन्तर्राष्ट्रिय प्रतियोगितामा फर्कने निर्णय सार्वजनिक गरेका थिए । सन्न्यास फिर्तीकै बेला फेल्प्सले रियो ओलम्पिक खेल्ने इच्छा पनि व्यक्त गरेका थिए ।

‘झन्डा बोक्ने जिम्मेवारी पाएकोमा सम्मानित महसुस गरेको छु । त्यसमा पनि अमेरिकाको झन्डा बोक्न पाउनु विशेष खुसीको कुरा हो', फेल्प्सले भनेका छन् । उनले ओलम्पिक खेल्न लागेको यो पाँचौंपटक हो । उनले राष्ट्रिय टोलीको सदस्यको मतदानका आधारमा झन्डा बोक्ने जिम्मेवारी पाएको जनाइएको छ ।

फेल्प्सले सन् २००८ को ओलम्पिकमा आठवटा स्वर्ण पदक जित्दै एउटै ओलम्पिकमा सर्वाधिक स्वर्ण पदक जित्ने खेलाडीको कीर्तिमान बनाएका थिए । १५ वर्षको उमेरमा सन् २००० को सिड्नी ओलम्पिकमा सहभागिता जनाएका फेल्प्सले त्यति बेला पदक जित्न नसके पनि ओलम्पिक खेलकुदमा सहभागी हुने ६८ वर्षयताकै सबैभन्दा कान्छा पुरुष खेलाडीको कीर्तिमान बनाएका थिए ।

उनी सन् २००४ को एथेन्स ओलम्पिकमा ६ स्वर्ण र दुई कांस्य पदक जित्न सफल भएका थिए । उनले सन् २०१२ को लन्डन ओलम्पिकमा पनि चार स्वर्ण र दुई रजत पदक जितेका थिए । ‘सिड्नीमा म टोलीमा पर्न चाहन्थेँ । एथेन्समा मेरो उद्देश्य राष्ट्रका लागि स्वर्ण पदक जित्नु थियो । बेइजिङमा आएर त्यसअघि कुनै पनि खेलाडीले गर्न नसकेको उपलब्धि हात पार्न चाहन्थेँ । लन्डनमा मेरो उद्देश्य इतिहास बनाउनु थियो ।

रियो ओलम्पिकमा म उद्घाटन समारोहमा हिँड्न चाहन्छु', उनी भन्छन्, ‘अमेरिकालाई सबैभन्दा उत्कृष्ट स्तरमा प्रतिनिधित्व गर्न चाहन्छु र परिवारलाई खुसी बनाउन चाहन्छु । यो कुरा पदक जित्नेभन्दा ठूलो विषय हो ।' ओलम्पिक खेलकुदको उद्घाटनमा अमेरिकाको झन्डा बोक्ने फेल्प्स दोस्रो पौडी खेलाडी हुनेछन् । यसअघि सन् १९७६ को ओलम्पिकको उद्घाटन समारोहमा पौडीबाज गेरी हलले अमेरिकाको झन्डा बोकेका थिए । फेल्प्सले रियो ओलम्पिकमा तीनवटा व्यक्तिगत स्पर्धामा प्रतिस्पर्धा गर्दैछन् ।