लेस्टरमाथि बार्सिलोना हाबी
लन्डनः स्पेनिस लिग च्याम्पियन बार्सिलोनाले बुधबार राति भएको प्रिसिजन मैत्रीपूर्ण खेलमा इङ्लिस प्रिमियर लिग च्याम्पियन लेस्टर सिटीलाई ४-२ गोलले हराएको छ । स्पेनिस लिगको उपविजेता र युरोपियन च्याम्पियन रियल म्याड्रिडले जर्मन लिग च्याम्पियन बायर्न म्युनिखलाई १-० गोलले हरायो भने इङ्लिस प्रिमियर लिग क्लब चेल्सीले इटालीको एसी मिलानलाई ३-१ गोलले पराजित गर्यो ।
इन्टरनेसनल च्याम्पियन्स कपअन्तर्गत स्विडेनमा भएको खेलमा बार्सिलोनाका मुनिर एल हड्डाडीले दुई तथा लुइस स्वारेज र राफा मजिकाले एक एक गोल गरे । लियोनल मेसीले उपलब्ध गराएको पासमा २० वर्षीय स्पेनिस स्ट्राइकर हड्डाडीले २६औं मिनेटमा खेलको पहिलो गोल गरेका थिए ।
स्वारेजले ३४औं मिनेटमा टोलीको अग्रता दोब्बर बनाए । स्वारेजले उपलब्ध गराएको पासमा हड्डाडीले ४५औं मिनेटमा बार्सिलोनालाई ३-० गोलको स्थितिमा पुर्याएका थिए । तर, दोस्रो हाफमा लेस्टरले पुनरागमनको प्रयास गरेपछि खेल रोमाञ्चक बनेको थियो ।
दोस्रो हाफको सुरुआतमा मैदान छिर्ने अवसर पाएका २३ वर्षीय नाइजेरियन स्ट्राइकर अहमद मुसाले दुई गोल गरेपछि लेस्टरले ६६औं मिनेटमा खेल २-३ गोलको स्थितिमा पुर्याएको थियो । लेस्टरले दोस्रो हाफको सुरुआतमै सात खेलाडी परिवर्तन गरेको थियो ।
पहिलो हाफमा जम्न नसकेका जेमी भार्डी, रियाद माहरेजलगायत लेस्टरका खेलाडीले मध्यान्तरपछि खेल्ने मौका पाएनन् । दोस्रो हाफमा लेस्टरका वैकल्पिक खेलाडीबीच राम्रो तालमेल देखियो । मुसाले मैदान उत्रिएको एक मिनेटलगत्तै गोल गरेका थिए ।
आफूसँगै मैदान छिरेका वैकल्पिक खेलाडी सिन्जी ओकाजाकीले उपलब्ध गराएको पासमा उनले गोल गरेका थिए । अर्का वैकल्पिक खेलाडी जेफरी स्लुपको पासमा मुसाले ६६औं मिनेटमा गोल थपेका थिए । तर ७८औं मिनेटमा मैदान छिरेका मजिकाले ८४औं मिनेटमा गोल गरेपछि बार्सिलोना पुन बलियो बनेको थियो । प्रिसिजनको आफ्नो पहिलो खेलमा बार्सिलोनाले स्कटिस च्याम्पियन सेल्टिकलाई ३-१ गोलले हराएको थियो ।
नेमारको अनुपस्थितिपछि टोलीबाट खेल्ने मौका पाएका मुनिरले उक्त खेलमा पनि एक गोल गरेका थिए । बार्सिलोनाले अबको खेलमा लिभरपुलसँग प्रतिस्पर्धा गर्नेछ । लेस्टरले भने अघिल्ला खेलमा सेल्टिकसँग १-१ गोलको बराबरी खेलेको थियो भने पीएसजीसँग ४-० गोलले पराजित भएको थियो । अमेरिकामा भएको खेलमा बायर्नविरुद्ध रियलका डानिलोले गोल गरे ।
प्रतिस्पर्धात्मक खेलको ७९औं मिनेटमा डानिलोले गोल गरेका थिए । रियल अघिल्ला खेलमा पेरिस सेन्ट जर्मनसँग ३-१ गोलले पराजित भएको थियो भने चेल्सीलाई ३-२ गोलले हराएको थियो । रियलका क्रिस्टियानो रोनाल्डो चोटका कारण प्रिसिजन खेलमा सहभागी छैनन् । अमेरिकामा भएको अर्को खेलमा एसी मिलानविरुद्ध चेल्सीका ओस्करले दुई र बट्रान्ड ट्राओरले एक गोल गरे । मिलानका जियाकोमो बोनाभेन्टुराले गोल गरे ।
ट्राओरले २५औं मिनेटमा चेल्सीलाई अग्रता दिलाएका थिए । तर, मिलानले ३८औं मिनेटमा खेल बराबरीमा ल्याएको थियो । ५९औं मिनेटमा मैदान छिरेका वैकल्पिक खेलाडी ओस्करले ७०औं मिनेटमा पेनाल्टीमा गोल गरेका थिए भने ८७औं मिनेटमा थप गोल गरे । चेल्सीले अघिल्ला खेलमा रियलसँग हार बेहोरेको थियो भने लिभरपुललाई हराएको थियो ।
प्रतिक्रिया दिनुहोस !
