एभरेस्ट बैंक र यूकेएड सक्षमबीच सम्झौता
काठमाडौंः एभरेस्ट बैंक र यूकेएड सक्षमबीच वित्तीय सेवा पहुँचअन्तर्गत एभरेस्ट बैंक सेवा परियोजनाका लागि सम्झौता भएको छ ।सम्झौतापत्रमा एभरेस्ट बैंकका प्रमुख कार्यकारी अधिकृत एके अहलुवालिया र यूकेएड सक्षम एक्सेस टु फाइनान्सका टिम लिडर बलजित बोहराले हस्ताक्षर गरेका छन् ।
नेपाल राष्ट्र बैंकका डेपुटी गभर्नर शिवराज श्रेष्ठ कार्यक्रमका प्रमुख अतिथि रहेको उक्त कार्यक्रममा अर्थ मन्त्रालयका उपसचिव किसान सिंह बस्नेत, डीएफआईडी नेपालका निजी क्षेत्र विकास सल्लाहकार रवि रायमाझी तथा राष्ट्र बैंक र एभरेस्ट बैंकका उच्चपदस्थ अधिकारीको उपस्थिति रहेको बैंकले जनाएको छ ।
सम्झौतापश्चात्, एभरेस्ट बैंकले बैंकिङ सेवा नपुगेका विभिन्न क्षेत्रमा शाखारहित बैंकिङमार्फत बैंकिङ सेवामा सर्वसाधारणलाई अभ्यस्त गराउने जनाएको छ । यसले वित्तीय साक्षरता कार्यक्रममार्फत जनचेतना अभिवृद्धि गर्नुका साथै व्यक्तिगत, कृषि सहकारी तथा साना लघु उद्यमीको वित्तीय आवश्यकता पूरा गर्ने बैंकले जनाएको छ ।
बैंकका अनुसार यो सुविधा देशका सुदूरपश्चिम, मध्य पश्चिम र पश्चिम क्षेत्रका २७ जिल्लामा पुग्नेछ । बैंकले शाखारहित बैंकिङको नौलो आयामका रूपमा ट्याब्लेट बैंकिङ पनि सुरु गरेको जनाएको छ । बैंकले हाल आफ्ना ६१ वटा शाखा, पाँच एक्सटेन्सन काउन्टर, २४ राजस्व संकलन काउन्टर र ८३ एटीएम तथा बृहत् बाह्य सञ्जालमार्फत बैंकिङ सेवा प्रदान गर्दै आइरहेको जनाएको छ ।
प्रतिक्रिया दिनुहोस !
