निगमले भदाै २ देखि दुबई उडान थाल्ने
काठमाडौंः नेपाल वायुसेवा निगमले भदौ २ गतेदेखि संयुक्त अरब इमिरेट्सको दुबईमा सीधा उडान गर्ने भएको छ । यससम्बन्धी तयारी पूरा भएको निगमले जानकारी दिएको छ ।
निगमले वैदेशिक रोजगारीको आकर्षक गन्तव्य दुबईमा साताको तीन उडान गर्नेछ । निगमका महाप्रबन्धक सुगतरत्न कंशाकारका अनुसार निगमले करिब पाँच वर्षपछि पुनः दुबई उडान सुरु गर्न लागेको हो ।
निगमले एयरबसको एक सय ५६ सिटे ए३२० जहाजमार्फत आइतबार, मंगलबार र बिहीबार काठमाडौंबाट दुबई उडान गर्ने भएको छ । दुबईबाट दैनिक उडानको माग आए पनि जहाज अभावका कारण तत्काल माग पूरा गर्न नसकिने कंशाकारको भनाइ छ । दुबईपछि निगमले छिटै चीनको ग्वाङझाओमा पनि उडान गर्ने तयारी गरिरहेको निगमका प्रवक्ता रामहरि शर्माले जानकारी दिए ।
निगमले यूएईमा सेवा दिएका यात्रुमध्ये कम्तीमा ५० प्रतिशत पर्यटक हुने अनुमान गरेको छ । पाँच वर्षअघि निगमले दुबईमा साताको चार उडान गर्दै आएको थियो । दुबईमा निगमले २०४१ माघमा उडान सुरु गरेको थियो ।
नयाँ जहाज थप नगर्ने र भएका जहाज ग्राउन्डेड बन्दै गएपछि निगमले गन्तव्य कटौती गर्दै आएको थियो । निगमसँग अन्तर्राष्ट्रिय उडानतर्फ अहिले दुई एयरबस र एउटा बोइङ जहाज सञ्चालनमा छन् ।
निगमले एक वर्षभित्रै दुईवटा वाइडबडी जहाज ल्याउने गरी काम गरिरहेको जनाएको छ । एसियामा सबैभन्दा महँगो हवाई गन्तव्यका रूपमा चिनिने नेपालमा निगमलाई पर्याप्त जहाज उपलब्ध नगराएसम्म हवाई सेवा प्रतिस्पर्धी नबन्ने भन्दै कंशाकारले व्यवस्थापनको प्रयासमा अर्थ र पर्यटन मन्त्रालय सकारात्मक रहेको जानकारी दिए ।
निगमले ६ महिनाभित्र वाइडवडी जहाज खरिदको सम्झौता गर्ने जनाएको छ ।
प्रतिक्रिया दिनुहोस !
