रियो ओलम्पिकको भव्य उद्घाटन

एजेन्सीः विश्व खेलकुदको महाकुम्भ ग्रीष्मकालीन ओलम्पिक खेलकुदको ३१औं संस्करण शुक्रबार रातिबाट औपचारिक रूपमा ब्राजिलमा सुरु भएको छ । ब्राजिलको रियो दी जेनेरियो सहरस्थित माराकाना स्टेडियममा आयोजित उद्घाटन समारोहमा सहभागी देशको मार्चपास्टसहित ब्राजिलले आफ्नो देशको अथाह संस्कृति झल्काउने प्रस्तुतिहरू देखाएको थियो ।

माराकाना स्टेडियममा दुई घन्टाभन्दा बढी समय चलेको उद्घाटन समारोहमा ब्राजिलले आफ्नो सांस्कृतिक र जातीय विविधता झल्काउने झाँकी विश्वभरका दर्शक र समर्थकलाई देखायो ।

उद्घाटन समारोहमा दुई सय ६ देशका खेलाडीले मार्चपास गरेका थिए । यस ओलम्पिकका पहिलोपटक शरणार्थी टोलीलाई समेत समावेश गरिएको छ । ओलम्पिकमा शरणार्थी कोटाबाट सहभागिता जनाएका १० जना खेलाडीले छुट्टै टोलीका रूपमा सहभागी भएका हुन् ।

७५ हजार दर्शक क्षमता भएको मारकाना स्टेडियमको भएको उक्त समारोहमा ओलम्पिक टर्च ब्राजिलका प्रख्यात फुटबलर पेलेले बोक्ने कार्यक्रम तय गरिए पनि उनी कमजोर स्वास्थ्यको कारण देखाउँदै उपस्थित हुन सकेनन् । पेलेको अनुपस्थितिमा ओलम्पिक टर्च ब्राजिलका चर्चित म्याराथन धावक भान्डरलेई कोरडेइरो डे लिमाले बोकेका थिए । ७५ वर्षीय पेलेले आफ्नो स्वास्थ्य अवस्था कमजोर रहेकाले चाहेर पनि उपस्थित हुन नसकेको बताएका छन् । उनले यो निर्णय आफ्नो व्यक्तिगत भएको समेत बताएका छन् ।

उद्घाटन समारोहमा ब्राजिलियन चलचित्र निर्देशक फर्नान्डो मेरिलेस नेतृत्वको टोलीले विशेष कार्यक्रम पस्किएको थियो । समारोहमा सहभागी हुन विभिन्न राष्ट्रका राष्ट्रप्रमुख, सरकारप्रमुखदेखि लिएर विशिष्ट पाहुना माराकाना स्टेडियम पुगेका थिए । समारोहमा संयुक्त राष्ट्रसंघका महासचिव बान की मुन, नेदरल्यान्ड्सका राजा विलेम एलेज्यान्डर, फ्रान्सेली राष्ट्रपति फ्रांकोइज होल्यान्ड, अर्जेन्टिनी राष्ट्रपति माउरिसियो माक्री, अमेरिकी विदेश सचिव जोन केरीलगायत विशिष्ट पाहुनाको उपस्थिति थियो ।

ओलम्पिकको औपचारिक उद्घाटन शुक्रबार राति गरिए पनि खेलकुद स्पर्धा भने दुई दिनअघिदेखि नै सुरु भइसकेको थियो । बुधबारदेखि पुरुष र महिला फुटबल सुरु भएका थिए । यसैगरी उद्घाटनअघि नै आर्चरीलगायत अन्य खेलको समेत सुरुआत भइसकेको थियो । अगस्ट २१ सम्म सञ्चालन हुने रियो ओलम्पिकमा विश्वका दुई सय ६ देशका ११ हजार दुई सय ३९ जना खेलाडीले सहभागिता जनाएका छन् ।

ओलम्पिकमा यो अहिलेसम्मकै ठूलो सहभागिता हो । कोसोभो र दक्षिण सुडानले पहिलोपटक रियो ओलम्पिकमार्फत ओलम्पिक खेलकुदमा भाग लिएका छन् । सहभागी खेलाडीले विभिन्न २८ खेलका कुल तीन सय ६ स्पर्धामा प्रतिस्पर्धा गर्नेछन् । रियो ओलम्पिक दक्षिण अमेरिकामा आयोजना गरिएको पहिलो ओलम्पिक पनि हो । जिका भाइरस र राजनीतिक अस्थिरताले गाँजेको ब्राजिलले ओलम्पिकमा सुरक्षा र पाहुनाको सत्कारका लागि कुनै कसर राखेको छैन ।

नेपालको झन्डा फुपूले बोकिन३१औं रियो ओलम्पिकको मार्च पास्टमा नेपाली टोलीको नेतृत्व जुडो खेलाडी फुपूल्हामु खत्रीले गरेकी छन् । मार्च पास्टमा नेपालको राष्ट्रिय झन्डा फुपूल्हामुले बोकेकी हुन् । जुडोको महिला ६३ केजीमा प्रतिस्पर्धा गर्न लागेकी फुपूको खेल मंगलबार परेको छ । खत्री १२औं दक्षिण एसियाली खेलकुद (साग)की स्वर्ण पदक विजेता हुन् ।

रियो ओलम्पिकमा नेपालबाट पाँच खेलमा सात खेलाडीले प्रतिस्पर्धा गर्दैछन् । जुडोकी खत्रीसँगै तेक्वान्दोमा निशा रावल, एथलेटिक्सका हरिकुमार रिमाल र सरस्वती भट्टराई तथा पौडीमा शिरीष गुरुङ र गौरिका सिंहले प्रतिस्पर्धा गर्नेछन् । यसैगरी आर्चरीमा नेपालका जितबहादुर मोक्तानले शुक्रबार नै रेङकिङ राउन्डमा प्रतिस्पर्धा गरेका थिए । ७० मिटर व्यक्तिगत रिकर्भमा प्रतिस्पर्धा गरेका जितबहादुर रेङकिङ राउन्डमा ६०औं स्थानमा आएका थिए । जितबहादुरले नकआउट राउन्डमा मंगलबार प्रतिस्पर्धा गर्नेछन् । ओलम्पिकमा नेपालले आर्चरी खेलमा भाग लिएको यो पहिलोपटक हो ।

रियो ओलम्पिकमा नेपालबाट आर्चरी, जुडो र तेक्वान्दोमा वाइल्ड कार्डमार्फत तथा एथलेटिक्स र पौडीमा अनिवार्य कोटामार्फत सहभागिता सुनिश्चित गरेको थियो । एथलेटिक्सतर्फ हरिकुमारले पुरुष पाँच हजार मिटरमा भाग लिनेछन् ।

रिमाल १२औं सागका कांस्य पदक विजेता हुन् । एथलेटिक्समै सरस्वतीले महिला १५ सय मिटरमा प्रतिस्पर्धा गर्नेछिन् । यसैगरी पौडीतर्फ शिरीषले एक सय मिटर फ्रिस्टाइलमा प्रतिस्पर्धा गर्नेछन् । पौडीमै गौरिकाले एक सय मिटर ब्याकस्ट्रोकमा प्रतिस्पर्धा गर्नेछिन् । गौरिका १२औं सागकी एक रजत र तीन कांस्य पदक विजेता हुन् ।