नेविसंघ आफ्नो पक्षमा ल्याउन देउवा र पौडेल सक्रिय

काठमाडौं: झन्डै नौ वर्षदेखि महाधिवेशन हुन नसकेको कांग्रेसको सबैभन्दा ठूलो भ्रातृ संस्था नेपाल विद्यार्थी संघको महाधिवेशन आइतबार सुरु हुने भएको छ ।

राजधानीको भृकुटीमण्डपमा दिउँसो १ बजे सुरु हुने महाधिवेशनमा सहभागी हुन देशभरका जिल्ला कार्यसमिति र क्याम्पसबाट प्रतिनिधि राजधानी आइसकेका छन् । अधिवेशनले नयाँ विधानअनुसार एक सय ५१ सदस्यीय कार्यसमिति चयन गर्नेछ ।

अधिवेशनको कांग्रेस सभापति शेरबहादुर देउवाले उद्घाटन गर्नेछन् भने पार्टीका सबै प्रभावशाली नेताहरू अतिथिका रूपमा सहभागी हुनेछन् । संघको नेतृत्व आफ्ना पक्षमा ल्याउन सभापति देउवा र नेता रामचन्द्र पौडेल सक्रिय भएका छन् ।

नेविसंघलाई पार्टीको सबैभन्दा बलियो र प्रभावकारी संगठनका रूपमा हेरिने भएकाले पनि यसको नेतृत्वमा नेताहरूको विशेष चासो हुने गरेको छ । पार्टीले विभिन्न परिस्थितिमा गर्ने आन्दोलनको अग्र स्थानमा हुने नेविसंघलाई कांग्रेसको नर्सरी पनि भन्ने गरिन्छ ।

लामो समयदेखि संघको महाधिवेशन हुन नसकेकाले नेतृत्वका लागि यसपटक झन्डै दर्जन विद्यार्थी नेताहरूले दाबी गरेका छन् । धेरैले नेतृत्व दाबी गरेपछि नेताहरू नै कसलाई समर्थन गर्ने भन्नेमा अन्योलमा छन् ।

संघको अध्यक्ष भएपछि आउँदो संसदीय निर्वाचनमा उम्मेदवारको बलियो दाबेदार हुने भएकाले पनि विद्यार्थी नेताहरू नेतृत्व हत्याउन लागि परेका हुन् ।

अहिले पार्टीको प्रभावशाली पदमा रहेका अधिकांश नेताहरू विगतमा संघको नेतृत्वबाटै आएका हुन् । स्वयं पार्टी सभापति देउवा पनि संघका तत्कालीन अध्यक्ष हुन् ।

जिल्ला र केही क्याम्पसका प्रतिनिधिको विवाद अझै सल्टिएको छैन । अधिवेशन उद्घाटन गर्ने र सँगसँगै विवाद पनि मिलाउँदै जाने नीति पार्टीले लिएको छ ।

यसअघि बसेको कांग्रेस केन्द्रीय कार्यसमिति बैठकले संघको विवाद समाधान गरी महाधिवेशन गराउन नेता प्रकाशशरण महतको संयोजकत्वमा पाँच सदस्यीय निर्देशन समिति गठन गरेको थियो । समितिले विवाद समाधान गर्दै लगेको छ ।

चन्दा सहयोग नलिन पार्टीको निर्देशन

नेविसंघको तीनदिने अधिवेशनका लागि पौने दुई करोड खर्च हुने भएको छ । आर्थिक समितिले तीन दिनसम्मको खर्च एक करोड ७८ लाख ८० हजार रुपैयाँ लाग्ने अनुमानित खर्च विवरण पेस गरेको छ । तर एक रुपैयाँ पनि कसैसँग पनि चन्दा वा आर्थिक सहयोग नलिन पार्टीले कडा निर्देशन जारी गरेको छ ।

महाधिवेशनका लागि लाग्ने सबै खर्च कांग्रेसले नै बेहोर्ने भएको छ । 'कोहीसँग पनि एक रुपैयाँ पनि चन्दा नलिन पार्टीले कडा निर्देशन जारी गरेको छ', संघका प्रवक्ता यूपी लामिछानेले भने, 'सबै खर्च पार्टीले आफैं बेहोर्ने भएको छ ।'

प्रतिनिधिहरूलाई सुन्धारा, नयाँ बसपार्क, ठमेल र तिलगंगामा आवासको व्यवस्था गरिएको छ । देशभरबाट झन्डै ३४ सय हाराहारीमा प्रतिनिधिहरू महाधिवेशनमा सहभागी हुनेछन् ।

पार्टीले महाधिवेशनका लागि कसैसँग सहयोग नलिन निर्देशन जारी गरे पनि नेतृत्वका आकांक्षीहरू आर्थिक सहयोग संकलनमा सक्रिय छन् । उम्मेदवारहरूले विगत एक सातादेखि नै भड्किलो प्रचार गर्दै आएका छन् । अध्यक्षमा शनिबारसम्म १८ जनाले उम्मेदवारी घोषणा गरेका छन् ।

अध्यक्षको उम्मेदवारी घोषणा गर्नेमा जितजंग बस्नेत, नैनसिंह महर, रत्न कार्की, राजीव ढुंगाना, सरोज थापा, दीपक भट्टराई, मनोजमणि आचार्य, आनन्दराज त्रिपाठी, लक्ष्मण आचार्य, क्षितिज भण्डारी, कुन्दनराज काफ्ले, शुभराम बस्नेतलगायत छन् । उम्मेदवारी दर्ता गर्ने समयसम्म यो संख्या घटेर दुई वा तीनमा सीमित हुने बताइएको छ ।

अनशन बसेका नेता गम्भीर बिरामी

नेपाल विद्यार्थी संघको महाधिवेशन नियमसंगत तरिकाले हुनुपर्ने माग राख्दै 'आमरण अनशन' बसेका दुई विद्यार्थी नेता बिरामी परेपछि अस्पताल भर्ना भएका छन् । आमरण अनशनमा रहेका संघका पूर्वकेन्द्रीय सदस्य गणेश सापकोटा र नेता रत्नहरि ढुंगेललाई उच्च रक्तचाप र मिर्गौलामा समस्या आएपछि बागबजारस्थित मोडल अस्पतालमा उपचार थालिएको हो ।

अस्पतालका प्रमुख भरत प्रधानका अनुसार उनीहरूलाई अस्पतालको क्याबिनमा भर्ना गरी उपचार थालिएको छ । उनीहरू आठ दिनदेखि नेपाली कांग्रेसको कार्यालय सानेपामा अनशन बसेका उनीहरूको स्वास्थ्य अवस्था कमजोर बन्दै गएको उपचारमा संलग्न चिकित्सकको भनाइ छ ।

उनीहरूले विधानविपरीत ल्याइएको प्रतिनिधि खारेज गर्नुपर्ने, वास्तविक प्रतिनिधिमात्र कायम गर्नुपर्ने, अधिवेशन गर्न बाँकी ठाउँमा अधिवेशन गर्नुपर्नेलगायत माग अघि सार्दै आठ दिनअघि अनशन सुरु गरेका थिए । अनशन बसेका विद्यार्थीका तर्फबाट जारी विज्ञप्तिमा माग पूरा नहुन्जेल अस्पतालको शय्याबाट संघर्ष गर्ने दृढता व्यक्त गरिएको छ ।