मनाङ मर्स्याङ्दीलाई उपाधि
काठमाडौंः मनाङ मस्र्याङ्दी आर्चरी क्लब र म्याग्दी मगर समाज ए पाँचौं खुला रनिङ सिल्ड तारा खेल (धनुषबाँण) प्रतियोगितामा संयुक्त रूपमा अग्रस्थानमा रहेका छन् ।
थकाली सेवा समितिमा शुक्रबार भएको टिम स्पर्धामा आठ डोरका खेल समाप्तिसँगै मनाङ र म्याग्दीले समान ८८ अंक जोडेका छन् । १० डोरको खेलमा दुई डोरका खेल बाँकी रहँदा उपाधि लागि दुवै मुख्य प्रतिस्पर्धी बनेका छन् ।
मनाङ शीर्ष स्थानमा रहँदा प्रेम थापा र कमल पुर्जाले अचुक निसान लगाउँदै शतप्रतिशत अंक जोड्ने क्रममा समान १६–१६ योगदान दिएका छन् । ठागु गुरुङले एक अंक गुमाउँदै समान १५ अंकको योगदान दिए । मनाङकै लागि नोर्बु गुरुङ र अजय शेरचनले समान १४ अंक जोड्दा केश पुर्जाले १३ अंक जोडे ।
त्यस्तै म्याग्दीले शीर्ष स्थान ओगट्ने क्रममा काजी रोक्काले सबै प्रहार जोगाउँदै सर्वाधिक १६ अंंक बटुले । प्रेम पुन, मनप्रसाद पुन र हरि पुनले एक–एक सटमात्रै खेर फाल्दै समान १५ अंकको योगदान दिए । म्याग्दीकै लागि भूपेन्द्र पुनले १४ र झक पुनले अंक बटुल्दा टिमको कुल ८८ अंक बन्यो ।
थासाङ स्पोटर्स क्लबको आयोजना भएको खेलमा छन्त्याल समाज ८५ अंक जोड्दै तेस्रो स्थानमा रहन सफल भएको छ । आयोजक थासाङ स्पोटर्स क्लब ८४ अंकसहित चौथो स्थानमै सीमित रहेको छ ।
आयोजकका मीन गौचन भने शतप्रतिशत सफलता हात पार्दै विशिष्ट धनुधरका लागि प्रतिस्पर्धामा छन् । उनले व्यक्तिगततर्फ पनि सर्वोत्कृष्ट धनुधरको उपाधि जितेका थिए । शुक्रबारै सम्पन्न हुने प्रतियोगिता बाँकी दुई डोरको खेल कृत्रिम प्रकाशमा जारी छ ।
नेपालको पौराणिक खेल धनुषबाँण प्रतियोगिता टिम स्पर्धामा १२ टिमको सहभागिता रहने छ । एक टिममा सातजना खेलाडी समावेश गरिए पनि एक पटकमा ६ जना खेलाडीले मात्र प्रतिस्पर्धा गर्न पाउनेछन् । कुल एक सय २० अंकका लागि प्रत्येकले १० डोरमा २० तिर निशानामा लगाउने प्रयास गर्नेछन् ।
प्रतिक्रिया दिनुहोस !
