हिजाबका कारण विभेद
![हिजाबका कारण विभेद](https://annapurnapost.prixacdn.net/media/albums/nila-57a6b66ec05cb9.07999144_uoSWNzHGXQ.jpg)
सिकागोः संयुक्त राज्य अमेरिकामा ३२ वर्षीया मुस्लिम महिलाले अमेरिकी डिपार्टमेन्टल स्टोरमा भेदभाव गरिएको आरोप लगाएकी छन् । उनले हिजाब लगाएकै कारण आफूमाथि भेदभाव गरिएको भन्दै डिपार्टमेन्टल स्टोरबाट बाहिर निस्कनुपरेको बताएकी छन् ।
इन्डियानाको ग्यारी निवासी साराह सफीले आफूमाथि ‘फ्यामिली डलर' स्टोरमा हिजाब लगाएकै कारण अपमानित हुनुपरेको बताइन् । उनले हिजाब लगाएका कारण अनुहारको अधिकांश भाग छोपिएको र त्यहाँ मोबाइलबाट त्यसको भिडियो बनाएको बताएकी छन् । आफ्ना केटाकेटीले त्यो थाहा पाएको र आफू अपमानित भएको उनको भनाइ छ । सफी स्टोरमा कोइला किन्न गएकी थिइन् ।
उनले भनिन्, ‘स्टोरमा म १० पाइलामात्र भित्र छिरेकी थिएँ । पसलकी महिला चिच्याउँदै भनिन् — कि हिजाब फाल्नुहोस् वा स्टोरबाट बाहिर निस्कनुस् ।' उनले हिजाब आफ्नो धार्मिक पोसाक भएको बताउँदा पनि ती महिलाले मानिन् । पसलकी महिला आफ्नो भनाइमा अडिग भएपछि त्यहाँबाट बाहिर निस्केको उनले बताएकमी छिन् । त्यतिखेर भएको विवाद सफीले मोबाइलमा पनि रेकर्ड गरेको बताइन् ।
अल्लाह भनेपछि विमानबाट निकालियो
अमेरिका निवासी पाकिस्तानी मूलका एक दम्पतीले आफूले विमानमा अल्लाह भनेकै कारण डेल्टा एयरलाइन्सको विमानबाट निकालिएको दाबी गरेका छन् । विमानमा पसिना आएपछि ‘अल्लाह' भनेको र फोनमा एसएमएस पठाएको देखेपछि विमान चालक दलका एक सदस्यले अप्ठेरो महसुस गर्दै विमानबाट निकालेको उनीहरूको भनाइ छ ।
नाजिया र फैसल अलीले पेरिसबाट ओहायोको सिनसिनाटी जाने क्रममा अल्लाह उचचारण गरेकै आधारमा विमानबाट निकालिएको खुलासा गरेका छन् । उनीहरूले विमानका कर्मचारीमा इस्लामोफोबिया रहेको भन्दै आक्रोश व्यक्त गरेका छन् ।
३४ वर्षीया नाजियाले विमानमा बसेका बेला आफ्ना अभिभावकलाई विमानमा चढेको जानकारी दिन एसएमएस पठाएकी थिइन् । उनी डेल्टा एयरलाइन्सको विमानको सिटमा बसिसकेकी थिइन् । विमान चालक दलका एक सदस्यले पाइलटसँग मुस्लिम दम्पतीका कारण अप्ठेरो महसुस गरेको बताइन् ।
टाउकोमा स्कार्फ बाँधेकी ती महिलाले फोन प्रयोग गरेको र उनको अनुहारमा पसिना आइरहेको भन्दै उनले पाइलटलाई सजग बनाइन् । त्यसलगत्तै उनीहरूलाई विमानबाट निकालिएको थियो ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)