प्रचण्डले सचिवहरुलाई यसरी दिए कडा निर्देशन

काठमाडौँः प्रधानमन्त्री पुष्पकमल दाहाल ‘प्रचण्ड’ले नेपाल सरकारका सचिवलाई तीन दिनभित्र परिणाममूखी योजना पेश गर्न कडा निर्देशन दिएका छन् ।

आइतबार प्रधानमन्त्री कार्यालय सिंहदरबारमा प्रधानमन्त्री प्रचण्डले यस्तो निर्देशन दिएका हुन् । सचिवलाई निर्देशन दिदै प्रचण्डले भने, ‘समय थोरै र चुनौतिपूर्ण समय छ तर काम धेरै छन् । मन्त्रालयको प्राथमिकता र कार्ययोजना तोकेर तीन दिनभित्र मुख्य सचिवमार्फत् मलाई ठोस योजना दिनुपर्छ ।’

उनले परिणाम निकाल्ने कार्यतालिका आवश्यक भएकोमा जोड दिएका छन् । सँगै प्रधानमन्त्री प्रचण्डले योजनाको कार्यान्वयन समेत ग्राफमा हेर्न पाउनुपर्ने बताएका छन् । ‘परिणाम निकाल्ने कार्यतालिका चाहिन्छ । निर्मम बनेर परिणाम निकालौं । योजनाको कार्यान्वयन मैले ग्राफमा हेर्न पाउनुपर्छ ।’

सरकारका प्राथमिकताबारे स्पष्ट हुन पनि सचिवलाई प्रचण्डले निर्देशन दिए । ‘संविधानको स्वीकार्यता बढाएर कार्यान्वयन, भूकम्पको पुननिर्माण र नवनिर्माण, शान्ति प्रक्रियाको पूर्णता, सार्वजनिक सेवाको प्रभावकारिता एवम् सुशासन र समृद्धि सरकारका प्रमुख लक्ष्य हुन्, यसबारे सरकारका सबै संयन्त्र स्पष्ट भएर कार्यान्वयनमा जानुपर्छ,’ प्रचण्डले भने ।

प्रधानमन्त्रीले कर्मचारीलाई सरुवा, बढुवा, विदेश भ्रमण, सेमिनार, गोष्ठी जस्ता औपचारिक कार्यक्रम र व्यक्तिगत लाभमा नअल्झन समेत निर्देशन दिए । ‘प्रक्रियामुखी भन्दा परिणाममुखी बन्नुहोस् । गोल निर्धारण गर्नुहोस् र परिणाम निकाल्नुहोस्, ’ प्रधानमन्त्रीले भने, ‘मलाई नतिजा चाहिन्छ । आफ्नो, अरुको भनेर काम गर्दिन परिणाम निकाल्नेलाई पुरस्कृत गर्छु र दण्डहिनताको अन्त्य गर्छु ।’

प्रधानमन्त्रीले ४० लाख युवालाई देशमा रोजगार दिन नसकिएको भन्दै विमानस्थल, अध्यागमन, भन्सार र राहदानीमा कम्तिमा पनि सास्ती नदिन निर्देशन दिए । निर्देशनका क्रममा प्रधानमन्त्रीले पूँजीगत खर्चको सामथ्र्य बढ्ने गरी काम गर्न आग्रह गर्दै कर्मचारीमाथि राजनीतिक दबाब नहुने स्पष्ट पारे।