संगठित बन्ने योजनामा धरानको नाट्यकर्म
धरानः पुरानो नाट्य शहर धरानमा आरम्भ नाट्य डबलीले ‘नाट्यकर्म’ को व्यवस्थापन र प्रवद्र्धन गर्न संगठित अवधारणा अघि सारेको छ ।
धरानमा आरम्भले गरेको अन्तक्रियामा सम्भावित अवधारणामाथि विमर्श गरियो । ‘रङ्ग गोष्ठी’, ‘नाटक मेला’, ‘आधुनिक थिएटर’ लगायतका परिकल्पनामा पुराना नाट्य हस्तीहरु घोत्लिए ।
भाषाविद् प्राडा टंकप्रसाद न्यौपानेले प्रश्न गरे ‘रङगकर्मीको पुरानो शहर भनेर चिनिएको धरानलाई किन जीवन्त नबनाउने ?’ धरानको रङगकर्मलाई जीवन्त र उर्जा दिन पुनर्संगठित आरम्भ नाट्य डबलीले सूरु गरेको अभियान प्रशंसनीय रहेको भन्दै उनले प्रशंसा गरे । पत्रकार जसकुमार राईले धरानको रंगकर्मलाई विद्यालयस्तरबाट अघि बढाउनु पर्ने औँल्याए ।
आरम्भले थालनी गरेको कार्यमा सबैको सहकार्य आवश्यक रहेको बताउँदै कार्यक्रममा रंगकर्मलाई निरन्तरता दिन ‘नाटक मेला’ गर्ने प्रतिबद्धता व्यक्त गरिएको छ । आरम्भका अध्यक्ष गोपाल देवानले आफूहरु त्यसमा सक्षम भएको बताए ।
धरानको रङगकर्मलाई निरन्तरता दिन धरान उपमहानगरपालिकाले अनाम नाट्य समुहलाइ दिएको जग्गामा साझा सहभागितामा रहने गरी ‘थिएटर’ निर्माण गर्न छलफल अगाडि बढाउनु पर्ने समेत गोष्ठीको निष्कर्ष थियो ।
गोष्ठीमा वरिष्ठ पत्रकार तथा साहित्यकार राजकुमार कार्कीको विशेष आतिथ्यतामा साहित्यकार बद्री पलिखे, अग्रज पत्रकार हर्ष सुब्बालगायत र धरानका रङ्गकर्मीको उपस्थिति थियो ।
प्रतिक्रिया दिनुहोस !
