पौडी सुन्दरी गौरीकाको खेल ९ बजेर ४७ मिनेटमा

काठमाडौँः रियो ओलम्पिकमा सहभागी एघार हजार खेलाडीमध्ये सबैभन्दा कान्छी खेलाडी बनेकी नेपाली पौडीबाज गौरिका सिंहले ९ बजेर ४७ मिनेटमा प्रदर्शन गर्दैछिन् । उनले महिला एक सय मिटर ब्याक स्ट्रोकमा प्रतिस्पर्धा गर्नेछिन् ।

ओलम्पिक सुरुहुनुभन्दा एकसाता अघिदेखि गौरिकाको विषयमा विश्वभरका सञ्चार माध्यामले कान्छी खेलाडी र भूकम्पबाट जोगिएकी खेलाडी भन्दै प्राथकिताका साथ समाचार संप्रेशण गरिरहेका छन् । अन्तर्राष्ट्रिय ओलम्पिक कमिटी (आईओसी) ले ओलम्पिक खेलकुदमा प्रतिस्पर्धा गर्ने खेलाडीमध्ये गौरिका सबैभन्दा सानो उमेरको खेलाडी भएको पक्का गरेको थियो । रियो ओलम्पिकमा दुई सय ६ देशबाट सहभागी खेलाडीमा गौरिकाको चर्चा निकै चल्यो।

गौरिका आइतबार मात्र १३ वर्ष र दुई सय ५५ दिनकी भएकी छन् । बेलायतमा परिवारसँग बस्दै आएकी गौरिका रियो ओलम्पिकमा सहभागिता जनाउन उतैबाट रियो पुगेकी हुन् । भारतमा ६ महिनाअघि भएको १२ औं दक्षिण एसियाली खेलकुद (साग) मा सहभागिता जजनाउन पनि गौरीका बेलायतबाट भारत आएकी हुन् । भारतको सिलोङ र गुवाहाटीमा सम्पन्न सागमा गौरिकाले नेपाललाई एक रजत र तीन कांस्य सहित चार पदक दिलाएकी थिइन् । नेपाली पौडी खेलाडीले सागमा पदक जितेको पहिलो पटक थियो । गौरिकाले सन् २०१५ को जुनबाट मात्र नेपालको राष्ट्रिय प्रतियोगितामा प्रतिस्पर्धा गर्न थालेकी हुन् ।

उनले एक बर्षको बीचमा सातवटा राष्ट्रिय कीर्तिमान आफ्नो नाममा लेखाएकी छन् । उनले नेपालको तर्फबाट गत अगस्टमा रसियाको काजनमा भएको विश्व च्याम्पियनसिपमा पनि प्रतिस्पर्धा गरेकी छन्् । गौरिका रियो ओलम्पिकमा कान्छो खेलाडी भएको समाचार अन्तर्राष्ट्रिय सञ्चारमाध्यममा ब्यापक रुपमा स्थान पाएपछि गौरिकासँगै नेपालको समेत औलम्पिकका चर्चा भएको थियो ।

रियो ओलम्पिकमा पौडीमा नेपालबाट गौरिका र शिरिष गुरुङले भाग लिएका हुन् । पौडी खेलाडीले आइओसीको अनिवार्य कोटामार्फत सहभागिता सुनिश्चित गरेका हुन् । नेपालका बाँकी पाँच खेलाडीले भने वाइल्डकार्ड मार्फत भाग लिएका हुन् ।