सार्वजनिक यातायातका गुनासो गर्न एमएसएस
काठमाडौंः ट्याक्सी मिटरमा जान मानेन ? सर्वजनिक यातायातले भाडा बढी लियो ? आरक्षण सिटमा अरू नै बसेर यात्रा गरिरहेका छन् ? सार्वजनिक यातायातका छाडापनबाट तपाईं पीडित हुनुहुन्छ वा तपाईंका आँखाले देखेको छ भने अब त्यसको सरल समाधान गर्न सक्नुहुन्छ । ट्राफिक प्रहरीले यस्ता समस्या समाधान गर्न एसएमएस सेवा सार्वजनिक गरेको छ ।
९८५१२९५१०० नम्बरमा सेवाग्रहीले सन्देश पठाएर गुनासो गर्न सक्नेछन् । तपाईंका गुनासा सीधै उक्त नम्बरमा पठाउनुभयो भने तत्काल ट्राफिक प्रहरी कारबाहीमा उत्रिनेछ । उक्त नम्बरमा सार्वजनिकसँगै निजी सवारीसाधनका बेथितिका बारेमा सन्देश पठाउन सकिन्छ ।
एक सातादेखि उक्त नम्बर ट्राफिक एफएम र फेसबुकमार्फत सार्वजनिक गर्दा सयभन्दा बढी सन्देश आएका छन् । सन्देशमा ट्याक्सी चालक मिटरमा जान नमानेकोदेखि सार्वजनिक सवारीसाधनले बढी भाडा लिएका गुनासा आएका छन् ।
सन्देश पठाउँदा ट्याक्सी नम्बर, कहाँबाट कता जान लागेको र आफू कुन स्थानमा रहेको स्पष्ट खुल्ने जानकारी दिन महाशाखाले आग्रह गरेको छ । सार्वजनिक यातायातले बढी भाडा लिएको र आरक्षण सिटका बारेमा पनि गाडी नम्बर र कुन रुटमा चल्ने गाडीका बारेमा खुलाउनुपर्ने हुन्छ ।
उक्त एसएमएस सेवाअन्तर्गत विद्यार्थी परिचयपत्र देखाउँदा पनि विद्यार्थीले पाउने छुट सुविधा नदिएमा रुट र बस नम्बरसहित उल्लेख गरेर उजुरी दिने व्यवस्था महाशाखाले गरेको छ । सार्वजनिक यातायात सेवामा यात्रा गर्दा हैरानी भोग्नुपरेका विवरणसमेत सन्देशमा पठाउन सकिनेछ ।
एसएमएसमा प्राप्त भएपछि महाशाखाले बढी भाडा लिने बा १ ज १९७६, बा १ ज ७२७ र बा २ ज १३६७ नम्बरको ट्याक्सीलाई कारबाही गरेको छ । कपनबाट सुन्धारा जाने क्रममा यात्रुले यी तीनवटा ट्याक्सीलाई सोध्दा मिटरमा जान नमानेपछि उक्त मोबाइल नम्बरमा सन्देश पठाएका थिए । ट्राफिक प्रहरीले तत्कालै यी तीनवटा ट्याक्सीलाई कारबाही गरेको थियो ।
त्यसैगरी महाशाखाले लगनखेल-टीकाभैरव-चापागाउँ चल्ने गाडीले बढी भाडा लिएको उजुरी सन्देश प्राप्त गरेको थियो । सन्देशमा बा १ ख १०३३, बा १ ख ७८३, बा १ ख ८६४, बा १ ख ७१११, बा १ ख ३२९६, बा १ ख १०७३, बा १ ख ३२८७ नम्बरका गाडीले जम्मा ६ किलोमिटरको दूरीमा २० रुपैयाँ भाडा लिएको गुनासो गरिएको थियो ।
महाशाखाले यी सवारीसाधनलाई कारबाही गर्न यातायात व्यवस्था विभागमा पत्र पठाएको छ ।महाशाखा प्रमुख डीआईजी प्रकाश अर्यालले एसएमएस सेवामार्फत सार्वजनिक यातायातका बेथिति नियन्त्रण गर्ने प्रयास गरिएको बताए ।