नियम नमान्न सफारी चालकको आन्दोलन
![नियम नमान्न सफारी चालकको आन्दोलन](https://annapurnapost.prixacdn.net/media/albums/biratnagar-city-57a7f859067515.82691699_PiunaxNcxm.jpg)
विराटनगरः सरकारी नियम मान्दैनौं भन्दै सिटी सफारी (ई-रिक्सा) चालकले लगातार आन्दोलन गर्न थालेपछि विराटनगरमा घन्टौंसम्म सडक अवरुद्ध हुन थालेको छ ।
सरकारले बनाएको नियमविपरीतका माग राखेर विराटनगरमा सञ्चालनमा रहेका सफारी चालकले सवारी आवागमन प्रभावित हुने गरी आन्दोलन थालेपछि समस्या उत्पन्न भएको हो । आन्दोलनले घन्टौं ट्राफिक जाम हुनु थालेको छ । रुट परमिट सिस्टम र जाँचपास खारेजीलगायतका माग राखेर सफारी चालक सडक अवरुद्ध पारेर आन्दोलनमा उत्रिए पनि आन्दोलन मत्थर बनाउन सम्बन्धित निकायले चासो दिएका छैनन् ।
चालकहरूले आइतबार विराटनगर उपमहानगरपालिकाको कार्यालयमा दुई घन्टा धर्ना दिए । सिटी सफारीसहित पुगेका चालकले बिहान १० देखि १२ बजेसम्म दुई घन्टा धर्ना दिएका हुन् । सफारी उपमहानगरअगाडिको सडकमा राखेर चालकहरूले धर्ना दिएपछि सडक अवरुद्ध हुँदा मेन रोडमा सवारी आवागमन प्रभावित बन्यो ।
शुक्रबार पनि कोसी राजमार्गअन्तर्गत विराटनगरको बरगाछीमा सडकमा सटी सफारी राखेर दुई घन्टासम्म सडक अवरुद्ध पारिएको थियो । चालकहरूले नियम मिचेर ट्राफिक प्रहरीले गर्दै आएको कारबाहीको समेत विरोध गरेका छन् । उनीहरूले सानो गल्ती हुनेबित्तिकै कारबाही भोग्नु पर्दा आफूहरू समस्यामा परेको बताए ।
ट्राफिक प्रहरी र विराटनगर उपमहानगरपालिका कार्यालयको सिफारिसमा यातायात व्यवस्था कार्यालयले विराटनगरमा सञ्चालनमा रहेका सिटी सफारीलाई रुट परमिट दिएको थियो । रुट परमिटभित्र नकुद्ने सफारीमाथि ट्राफिक प्रहरीले कारबाही थालेपछि चालक आक्रोशित बनेका हुन् ।
विराटनगर उपमहानगरपालिका कार्यालयका अनुसार चालकहरूले नै रुट परमिट सिस्टम लगाउनुपर्ने माग गरेपछि सबै सफारीलाई परमिट दिइएको हो । तर अहिले त्यसकै विरोधमा चालकहरू आन्दोलनमा छन् ।
आफूहरूको माग पूरा नभए थप संघर्ष चर्काउने चेतावनी उनीहरूले दिएका छन् । चालकहरूले सोमबार विराटनगरस्थित यातायात व्यवस्था कार्यालय घेराउ गर्ने कार्यक्रम सार्वजनिक गरेका छन् । घेराउ कार्यक्रममा उपस्थित नहुने सिटी सफारीमाथि कारबाही गर्ने चेतावनीसमेत दिइएको छ । चालकहरूले लामो समयदेखि आफ्ना माग राख्दै आए पनि सम्बन्धित निकायले सुनुवाइ नगरेको आरोप लगाए ।
समाजवादी ई-रिक्सा मजदुर संघका केन्द्रीय सदस्य प्रेम पुरीले रुट परमिट सिस्टम खारेज हुनुपर्ने, चालक अनुमतिपत्र वितरण व्यवस्थित र सहज हुनुपर्ने, जाँचपास खारेज हुनुपर्ने, स्ट्यान्ड र पार्किङको व्यवस्था हुनुपर्ने आफूहरूको मुख्य माग रहेको बताए । उनले ट्राफिक ज्यादती बन्द हुनुपर्ने र राजमार्गमा सिटी सफारी सञ्चालन गर्न पाउनुपर्ने माग पनि राखिएको बताए ।
उनले राजमार्गमा सिटी सफारीलाई लगाइएको प्रतिबन्ध पनि फुकुवा हुनुपर्ने अडान राखे । बर्खाको समय भएकाले र विराटनगरमा निर्माणको काम भइरहेका कारण राजमार्ग छाडेर भित्री रुटमा सफारी सञ्चालन गर्न गाह्रो हुने पुरीको भनाइ छ ।
ट्राफिक प्रहरीले राजमार्गमा सफारी सञ्चालनमा रोक लगाएको छ । सवारी आवागमनलाई असर गर्ने र बढी दुर्घटना हुन थालेपछि राजमार्गमा सफारी सञ्चालनमा रोक लगाइएको मोरङ ट्राफिक प्रमुख प्रहरी निरीक्षक धनप्रसाद सिबाकोटीले बताए । ‘नियम मान्दैनौं भनेर सडक अवरुद्ध हुने गरी आन्दोलन गर्नु गलत हो । माग पनि उचित किसिमका छैनन्,' उनले भने, ‘नियम मिच्ने अधिकार कसैलाई छैन । नियम मिच्ने जो कोहीलाई कारबाही हुन्छ ।'
विराटनगर उपमहानगरपालिकाका कार्यकारी अधिकृत गोपालप्रसाद रेग्मीले सिटी सफारी चालकहरूको माग जायज नरहेको बताए । उनले भने, ‘पहिले रुट परमिट चाहियो भनेर उनीहरूले नै मागे । रुट परमिट कायम गरिएपछि खारेज हुनु पर्यो भन्नु कस्तो माग हो ? ' उनले केही माग सामान्य भए पनि केही मागहरू भने पूरा गर्न सक्ने अवस्थाका नरहेको बताए । विराटनगरमा दुई हजार पाँच सय सिटी सफारी सञ्चालनमा छन् ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)