पहिलो स्वर्ण अमेरिकी किशोरीलाई

रियो दि जेनेरियोः रियो ओलम्पिकको पहिलो स्वर्ण पदक अमेरिकी सुटर भर्जिनिया थ्रासरले जितेकी छिन् । १९ वर्षीया थ्रासरले १० मिटर एयर राइफल स्पर्धामा स्वर्ण पदक जित्दै पहिलो अन्तर्राष्ट्रिय सफलता हात पारेकी हुन् । चिनियाँ खेलाडी तथा पूर्वविश्व च्याम्पियन दु ली दोस्रो स्थानमा रहिन् । ली सन् २००६ की विश्व च्याम्पियन हुन् । साबिक विजेता चिनियाँ खेलाडी यी सिलिङले कांस्य पदकमा चित्त बुझाइन् ।

यसैगरी रुसका जुडो खेलाडी बेसलान मुद्रानोभले रियो ओलम्पिकमा देशका लागि पहिलो स्वर्ण पदक जितेका छन् । ६० केजी तौलस्पर्धामा उनले फाइनलमा साबिक विजेता येल्दोस स्मेतोभालाई हराए । निकै विवादपछि ओलम्पिकमा सहभागिताको अवसर पाएको रुसका दुई सय ७१ खेलाडीले यो प्रतियोगितामा प्रतिस्पर्धा गर्दैछन् ।

राज्य प्रायोजित डोपिङ भेटिएको आरोप लागेको रुसका केही खेलाडीलाई अन्तर्राष्ट्रिय ओलम्पिक कमिटी (आईओसी) ले ओलम्पिक खेल्न प्रतिबन्ध लगाएपछि उनीहरू सहभागी हुनबाट पाएनन् । जुडोकै महिला ४८ केजी तौलसमूहमा अर्जेन्टिनी खेलाडी पाउलो पारेटो पहिलो भइन् । उनी विश्व च्याम्पियन पनि हुन् । ३० वर्षीया पारेटोले फाइनलमा दक्षिण कोरियाकी बोकेयोङ जियोङलाई हराइन् । जारी प्रतियोगितामा अर्जेन्टिनाले जितेको यो पहिलो पदक हो ।

यसैगरी भारोत्तोलनमा थाइल्यान्डले स्वर्ण पदक जितेको छ । महिला ४८ केजी तौलसमूहमा थाइल्यान्डकी सोपिता तानासानले कुल दुई सय केजी भार उठाइन् । एक सय ९२ केजी तौल उठाएकी इन्डोनेसियाकी श्री वाइयुनी अगुस्तियानी दोस्रो भइन् । २१ वर्षीया तानासानले स्न्याचमा ९२ केजी र क्लिन एन्ड जर्कमा एक सय आठ केजी भार उठाएकी हुन् ।

ओलम्पिकमा भियतनामलाई पहिलो स्वर्ण

भियतनामले ओलम्पिक खेलकुदमा पहिलो पटक स्वर्ण पदक जितेको छ । पुरुष १० मिटर एयर पेस्तोलमा भियतनामका सुटर भिन हुवान होआङले स्वर्ण पदक जितेका हुन् । उनले दुई सय दुई दशमलव पाँच अंक प्राप्त गरे । उपाधिको दाबेदार मानिएका घरेलु खेलाडी फिलिप उले रजत पदक जिते । जारी प्रतियोगितामा ब्राजिलका लागि फिलिपले पहिलो पदक जितेका हुन् । उले दुई सय दुई दशमलव एक अंक हात पारे । एक सय ८० दशमलव चार अंक बटुलेका चीनका पाङ वेईले कांस्य पदक हात पारे ।

यसैगरी जापानका पौडीबाज कोसुके हागिनोले चार सय मिटर इन्डिभिजुअल मेड्ली स्पर्धामा स्वर्ण पदक जितेका छन् । गत संस्करणमा कांस्यमा सीमित रहेका हागिनोले चार मिनेट ०६.९५ सेकेन्ड समय निकाले । उक्त स्पर्धामा अमेरिकाका चेज कालिस चार मिनेट ०७.७५ सेकेन्ड समय निकालेर दोस्रो भए । जापानकै दैया सेतोले कांस्य पदक जिते ।

पुरुष चार सय मिटर फ्रिस्टाइल स्पर्धामा अस्ट्रेलियाका मार्क हर्टनले पहिलो स्थान हात पारे । उनले तीन मिनेट ४१.५५ सेकेन्डमा निर्धारित दूरी पूरा गरे । साबिक विजेतासमेत रहेका चिनियाँ खेलाडी सुन याङ तीन मिनेट ४१.६८ सेकेन्डसहित रजतमा सीमित भए । अन्तिम ५० मिटरमा हर्टनले सुनलाई उछिनेका थिए । इटालीका गाब्रियल डेट्टीले कांस्य पदक जिते ।

यसैगरी अस्ट्रेलियाले महिला एक सय गुना चार मिटर फ्रिस्टाइल रिलेमा पनि स्वर्ण पदक जितेको छ । अस्ट्रेलियाले तीन मिनेट ३०.६५ सेकेन्ड समय निकालेर विश्व कीर्तिमानसमेत बनायो । अस्ट्रेलियाली टोलीमा एमा म्याकियन, ब्रिटानी एल्मस्ली, ब्रोन्टी क्याम्पबेल र केट क्याम्पबेल थिए । उक्त स्पर्धामा अमेरिकाले रजत पदक जित्यो र भने क्यानडाले कांस्य हात पार्‍यो ।