ब्राजिल र अमेरिका क्वार्टरफाइनलमा

रियो दि जेनेरियो रियोः ओलम्पिकअन्तर्गत महिला फुटबलमा पूर्वउपविजेता ब्राजिल क्वार्टरफाइनलमा पुगेको छ । समूहगत चरणको आफ्नो दोस्रो खेलमा आइतबार स्विडेनलाई ५-१ गोलले पराजित गर्दै ब्राजिल अन्तिम आठमा पुगेको हो । ब्राजिलको जितमा मार्टा र बियट्रिजले दुईदुई गोलको योगदान गरे ।

अर्को एक गोल क्रिस्टिएनले थपिन् । बियट्रिजले २१ औं मिनेटमा घरेलु टोलीलाई अग्रता दिलाएकी थिइन् । मार्टाको पासमा क्रिस्टिएनले २४ औं मिनेटमा टोलीको अग्रता दोब्बर बनाइन् । मार्टा आफैंले ४४ औं मिनेटमा पेनाल्टीमार्फत गोल गरेपछि ब्राजिल मध्यान्तरअघि ३-० गोलले अगाडि रह्यो ।

त्यसपछि मार्टाले ८० औं र बियट्रिजले ८४ औं मिनेटमा गोल गरे । स्विडेनकी लोट्टा सेलिनले ८९ औं मिनेटमा गोल फर्काएकी थिइन् । समूहमा दुई खेलपछि ब्राजिलको ६ तथा चीन र स्विडेनको समान तीनतीन अंक छ । दक्षिण अफ्रिकाले खाता खोल्न सकेको छैन । ब्राजिलले पहिलो खेलमा चीनलाई ३-० गोलले हराएको थियो । समूहमा चार टोली छन् भने शीर्ष दुई टोलीसँगै तीनवटा समूहको उत्कृट दुई तेस्रो टोली पनि क्वार्टरफाइनलमा पुग्नेछन् ।

स्विडेन र चीनबीच प्रतिस्पर्धा हुन बाँकी नै छ । ब्राजिलले सन् २००४ र सन् २००८ को ओलम्पिक खेलकुदमा महिला फुटबलमा रजत पदक जितेका थियो । ब्राजिलले हालसम्म ओलम्पिक फुटबलमा स्वर्ण पदक जित्न सकेको छैन । अर्को खेलमा चीनले दक्षिण अफ्रिकालाई २-० गोलले हरायो । साबिक विजेता अमेरिकासँगै क्यानडा पनि क्वार्टरफाइनलमा पुगेको छ ।

समूहगत चरणको आफ्नो दोस्रो खेलमा फ्रान्सलाई १-० गोलले पराजित गर्दै अमेरिका अगाडि बढेको हो । अमेरिकाका लागि कप्तान कार्ली लियोडले गोल गरिन् । ६३ औं मिनेटमा लियोडले टोबिन हिथको प्रहार रिबाउन्ड भएपछि बनेको अवसरमा गोल गरेकी थिइन् । समूहमा अमेरिकाले दुई खेलबाट ६ अंक बटुल्यो । फ्रान्स र न्युजिल्यान्डको समान ३/३ अंक छ । कोलम्बिया भने अंकविहीन छ ।

अमेरिकाले पहिलो खेलमा न्युजिल्यान्डलाई २-० गोलले हराएको थियो । अमेरिकाले ओलम्पिक खेलकुदको महिला फुटबलमा हालसम्म चार पटक स्वर्ण पदक जितेको छ । गत संस्करणमा तेस्रो स्थान हात पारेको क्यानडाले जिम्बावेलाई ३-१ गोलले हरायो । क्यानडाको जितमा जेनिन बेकीले दुई र क्रिस्टिन सिनक्लेयरले एक गोल गरे । बेकीले सातौं र ३५ औं तथा सिनक्लेयरले १९ औं मिनेटमा गोल गरेका थिए ।

पहिलो पटक ओलम्पिक महिला फुटबलमा सहभागी जिम्बावेले अन्तिम समयमा एक गोल फर्काएको थियो । क्यानडाले दुई खेलबाट ६ अंक जोडेको छ । क्यानडाले पहिलो खेलमा अस्ट्रेलियालाई २-० गोलले हराएको थियो । समूहमा दुई खेलपछि जर्मनीको चार र अस्ट्रेलियाको एक अंक छ । जर्मनी र अस्ट्रेलियाबीचको अर्को खेल भने २-२ गोलको बराबरीमा सकियो ।