खतिवडाले दिए राजीनामा
काठमाडौँः राष्ट्रिय योजना आयोगका उपाध्यक्ष डा युवराज खतिवडाले राजीनामा दिएका छन् । खतिवडाले आजैदेखि लागु हुनेगरी राजीनामा गरेका हुन् ।
उपाध्यक्ष डा खतिवडाले प्रधानमन्त्री एवम् आयोगका अध्यक्ष पुष्पकमल दाहाललाई पत्र पठाएर राजीनामा दिइएका हुन् । “प्रधानमन्त्रीको कार्यव्यस्तताले गर्दा उहाँलाई भेट्न सकिएन, त्यसकारण पत्र पठाएर राजीनामा दिएको छु । नयाँ सरकारलाई काम गर्न सहज होस् भन्ने मनशायका साथ मैले मार्गप्रशस्त गरेको हुँ । अरु सदस्यले के गर्नुभयो, मलाई थाहा भएन”, डा खतिवडाले भने।
नौ महिनाको आफ्नो कार्यकालमा १४औैँ योजनाको आधारपत्र तयार पारिएको र सो आधारपत्र संविधान कार्यान्वयनमा नै केन्द्रित रहने उल्लेख गर्दै उनले सुरुआतका समयमा भारतको अघोषित नाकाबन्दीले पारेको प्रभाव कम गर्न केन्द्रित रहेको बताए ।
यस्तै दीर्घकालीन विकासको आधार तयार पार्न महत्वपूर्ण भूमिका निर्वाह गरिएको तथा सन् २०३० सम्मको विद्युत्को मागको प्रक्षेपण एवम् आयोगको आन्तरिक सुधारका काममा विशेष ध्यान दिइएको जानकारी उनले जानकारी दिए ।
उनल भने– “सन् २०३० सम्मको विकासको मार्गचित्र तयार भएको छ । त्यसले हाम्रो विकास कतातर्फ परिलक्षित हुन्छ भन्ने निर्धारण गर्दछ ।”
यस्तै राष्ट्रिय गौरवका आयोजना एवम् ठूला पूर्वाधारको काम अगाडि बढाउन तथा सार्वजनिक, निजी र सहकारीबीचको साझेदारी एवम् त्यसको आधारपत्र निर्माण गर्ने काम अन्तिम चरणमा पुगेकाले आगामी दिनमा आउने उपाध्यक्षलाई काम गर्न सहज हुने उहाँको भनाइ थियो ।
यस्तै सुरक्षा मुद्रण प्रणाली स्थापना गर्ने काम पनि अगाडि बढेकाले त्यसले मुलुकलाई फाइदा गर्ने डा खतिवडाले बताए ।
बजेट आउँदा समेत योजना नआउने प्रवृत्तिलाई हटाएर पहिला योजना र त्यसपछि बजेट आउने सुल्टो अवधारणालाई संस्थागत गरिएको दाबी गरे । क्षमता अभिवृद्धि एवम् विकास प्रक्रियाको मोटो खाका समेत बनाइएकोउनको भनाई थियो ।
आयोगमा (नेकपा)माओवादी केन्द्रका तर्फबाट नियुक्त सदस्यबाहेक अन्य सदस्यले पनि राजीनामा दिइसकेका छन् ।