अरुण तेस्रो प्रवेश मार्गका कारण तीन हजार परिवारलाई सास्ती

खाँदबारीः सडक कार्यालयले लागतकट्टा नगर्दा अरुण तेस्रो प्रवेश मार्ग आसपासका तीन हजारभन्दा बढी परिवारले सास्ती खेप्नुुपरेको छ । अरुण तेस्रो परियोजनाको प्रवेश मार्ग टुटेदेउराली-पिलुवाखोला-चैनपुर-सभाखोला-खाँदबारी छ्याङ्कुटी सडकखण्डमा सडकले व्यक्तिको जग्गालाई स्पष्ट लागतकट्टा नगर्दा किनबेच, नामसारीदेखि धितोसम्मका काम रोकिँदा सास्ती खेप्न बाध्य भएका छन् ।

लागत कट्टा गर्नुपर्ने कोसी राजमार्ग आसपासका जग्गाको २०४६ सालमा नापी भएको र मुुआब्जा लिइसकेको हो । यता व्यक्तिको जग्गा र सडकको जग्गालाई समेत मालपोतले रकम असुल गर्ने गरेको स्थानीयको गुनासो छ । यता सडक कार्यालयले भने सडकले नापी र मालपोत कार्यालयलाई जिम्मा दिएको भनेको छ । मालपोतमा फुकुवा नभएकाले अंशबन्डा, किनबेच र धितो राख्न नपाएको माम्लिङ ६ का यदु नेपालले बताए ।

यता माम्लिङ ६ का यदु नेपाल, डम्बर अधिकारी, माम्लिङ ८ का भक्तबहादुर गुरुङ, माम्लिङ ५ का प्रभाकर भण्डारीले जग्गाको धनीपुुर्जा लिइसकेका छन् भने बाँकीले पुर्जा पाएका छैनन् ।

मालपोत कार्यालयमा निवेदन दिएको बर्सौं बिते पनि धनी पुर्जा नपाएको र फुकुवा नभएको माम्लिङका तुलसा श्रपालीले बताए । सडकको नापी पहिलो भएको र कित्ता नापीपछि भएकाले समस्या भएको उनी बताउँछन् । सडक कार्यालयले भने मुआव्जा लिएको ३० मीटर जग्गा छुट्याएर मालपोतमा बुझाएको जनाउँछ । यता धनीपुर्जा नपाएपछि माम्लिङका मात्र पाँच सय बढी परिवार प्रत्यक्ष प्रभावित भएको छ ।

यस क्षेत्रका नागरिक अगुुवा भीम लिंखा अरुण तेस्रो परियोजनाको इलाइमेन्ट डिजाइनमा सानो बाटो भएकाले नक्सा हेरेर सडक छुट्ट्याएर व्यक्तिलाई धनीपुर्जा दिनुपर्ने माग गर्छन् । उनी भन्छन्, ‘बेकारमा जनतालाई दुःख दिनुहुन्न सरकारले ।

तत्काल विशेष टोली नै आएर लागतकट्टा गरी समस्या समधान गर्न माग गरे । यता मालपोत कार्यालय चैपनुरका मालपोत अधिकृत रामकुमारी खत्री नापीको समयमा पुर्जा नदिएको र ऐनले छूट जग्गाको सूचना नखुलाएकाले समस्या भएको बताए ।

उनी छूट दर्ता सूचना खुल्न साथ प्रक्रिया पुर्‍याएर धनीपुर्जा दिने बताइन् । मन्त्रिपरिषद्ले निर्णयले मन्त्रालयले सूचना खुलाउने प्रावधान छ । २०६९ मंसिरमा सूचना खुलाई २०७१ मंसिर २७ सम्म केही दर्ता भएको र दुई सय ५० बढी फाइल पेन्डिङमा छ बाँकी पाँच सय बढी परिवार धनीलाई पुर्जा दिन माम्लिङ क्षेत्रमा मात्र बाँकी रहेको उनले बताइन् । यता चैनपुर र खाँदबारी क्षेत्र कोसी राजमार्ग आसपासका दुुई हजार बढी परिवार यस्तै समस्यामा छन् । लगतकट्टा नहुँदा जग्गा प्रयोगविहीन बनेको छ ।

सडक कार्यालय, नापी र मालपोत कार्यालयले तत्काल समस्या समधान गरिदिन स्थानीयले माग गरेका छन् । सडक भए प्रयोग गर्न र व्यक्तिको भए धनीपुुर्जा पाऊँ भन्दै कार्यालयमा डेलिकेसनसमेत पुगेका छन् । तत्काल यसरी जग्गा व्यक्तिका नाममा पुुर्जा नदिने हो भने यस क्षेत्रमा भूमाफियाहरूको चलखेल हुुनसक्ने स्थानीय बताउँछन् ।