नविना लामा र ऐन महरको टकरावले अनेरास्ववियुमा तीन चिरा
![नविना लामा र ऐन महरको टकरावले अनेरास्ववियुमा तीन चिरा](https://annapurnapost.prixacdn.net/media/albums/Nabina-lama-Ain-Mahar-57ab222d3d2da8.98605033_zPGYxLzTQc.jpg)
काठमाडौँ: एमाले निकट विद्यार्थी संगठन अनेरास्ववियु अध्यक्ष नविना लामा र महासचिव ऐन महरको टकरावले तीन चिरा भएको छ । एउटै प्यानलबाट महाधिवेशनमा विजयी भएका लामा र महरबीचको विवादले अनेरास्ववियु तीन चिरा भएको हो ।
६ महिनाअघि सम्पन्न राष्ट्रिय महाधिवेसनमा पार्टी अध्यक्ष केपी शर्मा ओली पक्षको एक समूह र पार्टीका वरिष्ठ नेताद्धय माधवकुमार नेपाल तथा झलनाथ खनालको अर्को समूहबीच प्रतिस्पर्धा भएको थियो ।
महाधिवेसनमा एकै प्यानलबाट चुनाव जितेका ओली पक्षीय अध्यक्ष लामा र महासचिव महरबीच अहिले फाटो आएको छ । अध्यक्ष लामाले महाविधेसन सम्पन्न भएको ६ महिना बितिसक्दा पनि विभिन्न विभागमा जिम्मेवारी नतोकेको, आफू निकट नेतालाई मात्र जिम्मेवारी दिएको भन्दै महासचिव महर पक्ष असन्तुष्ट बनेको हो ।
अध्यक्ष लामाको कार्यशैलीप्रति आपत्ति जनाउदै महर पक्षले अध्यक्षसँग अनुमति नलिई एकलौटी निर्णयबाट भदौ ४ गतेका लागि राष्ट्रिय भेला आयोजना गरेको छ । भेला बोलाएको विषयमा अध्यक्ष लामालाई महरले टेलिफोनबाट मात्र जानकारी गराएका छन् ।
‘दुई वर्षको कार्यकालका लागि निर्वाचित साथीले ६ महिनासम्म पनि जिम्मेवारी पाएका छैनन् । त्यसैमाथि अध्यक्षले कुनै पनि बैठकबाट निर्णय नगराई केहि साथीलाई आफूखशी जिम्मेवारी तोकेकी छन्,’ महरले भने, ‘यस्ता गतिविधिले कार्यकर्तालाई अन्यौलमा पारेको छ । यस्ता अन्योलता हटाउनु महासचिव भएको नाताले मेरो जिम्मेवारी हो । त्यही भएर भेला बोलाएको हुँं ।’
लामा र महर पक्षको मिलनबाट गत फागुनमा सम्पन्न २२ औं महाविधेसनमा लामा पक्षले बहुमत पदमा विजयी हासिल गरेको थियो । भेलामा ७५ प्रतिशत भन्दा धेरै कार्यकर्ता उपस्थित हुने महरको दाबी छ । अध्यक्ष लामाले भने महरले भेला बोलाएको विषयमा आफूलाई जानकारी नभएको बताइन् । हाल उपत्यका बाहिर रहेकी लामाले भनिन्,‘म संगठनकै कामको सिलसिलामा सुर्खेत आइपुगेको छु । मेरो अनुपस्थितिमा महासचिवले कुनै पनि निर्णय गर्न सक्दैनन् । यदि भेला बोलाइएको भए पनि यो अनेरास्ववियुको आधिकारिक भेला होइन ।’
अध्यक्ष लामाले भने संगठन विधान अनुसार चलेको दाबी गरेकी छन् । अहिले महरको भेला बोलाउने निर्णयमा उपाध्यक्षद्धय सुनिता बराल र महेश बर्तौला तथा सचिवहरु अमृत बुढा, आरसी लामिछाने र समिक बडाल, धर्मेन्द रोकाय तथा निर्वाचन आयोगका अध्यक्ष तुलसी मैनाली लगायतको समूहले समर्थन जनाएका छन् ।
अनेरास्ववियुमा कार्यविभाजनको विषयमा विवाद भएको सचिव आरसी लामिछाने स्वीकार गर्छन् । ‘कार्यविभाजनको विषयवस्तुमा अनेरास्ववियुमा केही विवाद अवश्य देखिएका छन्’ लामिछानेले भने ।
‘कार्यविभाजनको विवाद अन्त्य गर्दै केन्द्रीय सदस्य, सचिवालय सदस्य र पदाधिकारीको सहमतिसहित कार्यविभाजनको निर्णय सार्वजनिक गर्ने र स्वतन्त्र विद्यार्थी युनियनको निर्वाचनको तयारीका लागि भेला गर्ने योजनामा छौँ,’ सचिव लामिछानेले भने, ‘यी सबै योजनासहितको भेलाको अध्यक्षता नविना लामालाई गराउने, सबै खाले विवादलाई अन्त्य गर्ने र अस्थिरताभित्र अस्तित्व खोज्ने क्रियाशिल तत्वलाई निस्तेज पार्न हामी लागिपरेका छौँ ।
एकै प्यानलबाट चुनाव तिजेका अध्यक्ष र महासचिव जितेका लामा र महरबीच फुट आएपछि माधव नेपाल नेपाल पक्षको समर्थनमा सचिव बनेका सुदेश पराजुलीले भने महासचिवले बोलाएको भेला अवैधानिक भएको बताएका छन् । पराजुलीले भने, ‘महासचिवजस्तो व्यक्तिले यस्तो भेला बोलाउनु भनेको संगठनकै बदनाम गराउनु हो । महासचिवले पदीय मर्यादालाइ ख्याल गर्न जानेनन् ।’
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)