जीवनको बिसौनीमा मानिस के सोच्छ ?
काठमाडौंः जीवनको बिसौनीमा पुग्दै गर्दा मानिस के सोच्छ ? फर्केर आफ्नो जीवनलाई कसरी हेर्छ ? उसमा अस्तित्वबोध र क्रोध कसरी उत्पन्न हुन्छ ? यस्तै प्रश्नको जवाफ खोज्दै ‘थिएटर मल'मा नाटक प्रदर्शन भइरहेको छ ।
आइरिस नाटककार स्यामुएल बेकेटको नाटक ‘क्र्याप्स लास्ट टेप'को नेपाली सन्दर्भमा गरिएको रूपान्तरण ‘एकलव्यको अन्तिम टेप'को प्रदर्शन सुरु भएको हो । नाटकको नेपाली रूपान्तरण शंकर रिजालले गरेका हुन् ।
करिब ५० मिनेट लामो नाटक एउटै दृश्यमा सकिन्छ । त्यो पनि एकै पात्रमा । मञ्चमा देखिने वृद्ध पात्रले बाकसमा राखिएका टेप खोतल्दै रक्सीको तालमा बजाउँदै जान्छ । हरेक टेपमा उसको किशोरावस्था र जीवनका अन्य चरणहरूको स्मृति कैद गरिएको छ ।
जीवनका पुराना दिनहरू सम्झँदै आफ्ना अप्राप्ति, गुमाइ र कमजोरीहरूप्रति रिसाउँदै मुमुर्रिरहेको पात्रले हरेक दर्शकलाई आफ्नै जीवनबोध उधिन्न उत्प्रेरित गर्दछ । विगको पीडाले नेपाली विगत समेट्छ । द्वन्द्वको आलो घाउ, राजनीतिक निराशा, विकृत वर्तमान र अन्धकार भविष्यको पीडामा अल्झिएको वृद्ध पात्रको मुखबाट अन्तिममा निस्कन्छ- ‘हे भगवान् ! मेरो जीवनबाट यी उमेरहरू लैजाऊ ।'
अस्तित्ववादी लेखक बेकेटको अब्सर्ड नाटक नेपाली दर्शकका लागि भिन्दै स्वाद हुनसक्छ । सन् १९५८ मा पहिलो प्रदर्शन गरिएको नाटकको नेपाली रूपान्तरणमा मौलिक लेखनलाई न्याय गरिएको टिप्पणी गर्छन् लेखक कुमार नगरकोटीको । थिएटर मलमा भेटिएका कुमारले बेकेटको उक्त नाटक निकै मनपर्ने भएकाले हेर्न आइपुगेको बताए ।
अस्तित्वको खोज गरिएको नाटक आफ्नो रुचि अनुकूल भएकाले नेपाली रूपान्तरण गरिएको नाटक निर्देशक शंकर रिजालले बताए । साउनको अन्तिम सातासम्म प्रदर्शन हुने नाटकको मुख्य भूमिकामा सुदम सिकेलाई देख्न पाइन्छ ।
निखारिएको अभिनयले उनी दर्शकलाई मञ्चमा तानिरहन सफल देखिन्छन् । संगीत र प्रकाशको कुशल संयोजनले नाटकलाई थप आकर्षक बनाएको छ ।