भारतीय सुरक्षाकर्मी पोशाकसहित नेपाल छिरेपछि निगरानी बढ्यो
![भारतीय सुरक्षाकर्मी पोशाकसहित नेपाल छिरेपछि निगरानी बढ्यो](https://annapurnapost.prixacdn.net/media/albums/Border-Security-force-india-57ac37ba4d13a6.70452757_g8QjWuYN1U.jpg)
विराटनगरः ड्युटीमा खटिने भारतीय सुरक्षाकर्मी पोशाकसहित नेपालतर्फ आउने क्रम बढेपछि मोरङको सीमावर्ती क्षेत्रमा निगरानी बढाइएको छ ।
भारतीय सुरक्षाकर्मी पोशाक र हतियारसहित अर्को देशमा आउजाउ गर्न नपाइने नियम छ । पूर्व क्षेत्रीय प्रहरी कार्यालय विराटनगरका प्रमुख डिआइजी केशरीराज घिमिरेले भने, ‘नियम मिचेर भारतीय सुरक्षाकर्मी पोशाकसहित नेपाल छिर्ने क्रम बढेपछि निगरानी बढाइएको छ ।’
खुल्ला सीमानाको फाइदा उठाउँदै भारतीय सुरक्षाकर्मी पोशाकसहित नेपाल आउने र आफ्ना व्यक्तिगत कामकारबाही तथा गतिविधी गरेर फर्कने गरेका छन् । कतिपय स्थानबाट हतियारसहित भारतीय सुरक्षाकर्मी नेपाल आउने गरेका छन् ।
मोरङ प्रहरी प्रमुख एसपी सन्दीप भण्डारीका अनुसार कुनै पनि देशका सुरक्षाकर्मीले पोशाक र हतियारसहित अर्को देशमा प्रवेश गर्न पाउँदैनन् । ‘पोशाक र हतियारसहित आउन नपाउने नियम त छँदैछ,’ उनले भने, ‘त्यही नियमको पालना गर्न गराउन भनेर बिना काम पोशाकसहितका सुरक्षाकर्मी आउजाउमा कडाई गरिएको हो ।’
एसपी भण्डारीले अन्जानमा पोशाकसहित आउने भारतीय सुरक्षाकर्मीलाई भने सम्झाएर फिर्ता पठाइने बताए । ‘जानीजानी आउनेलाई भने नियन्त्रणमा लिएर भारतीय उच्च सुरक्षा अधिकारीको जिम्मा लगाउने छौँ,’ उनले भने, ‘नेपाली सुरक्षाकर्मीलाई पनि पोशाकसहित भारततर्फ नजान निर्देशन दिइसकिएको छ ।’
कुनै अफिसियल काममा आउँदा जाँदा दुबै देशका सुरक्षाकर्मीले अनुमति लिनु पर्ने नियम छ। पोशाकसहित आउनु पर्दा अनुमति लिनु पर्ने भए पनि भारतीय सुरक्षाकर्मी बिना अनुमति आँफूखुसी आउजाउ गर्ने गरेका छन् । यसले दुई देशबीचको कुटनीतिक मर्यादा र नियमको उल्लंघन भएको ठहर गर्दै सीमावर्ती क्षेत्रमा कडाई थालिएको नेपाली सुरक्षा अधिकारीको भनाइ छ ।
सामान्य अवस्थामा व्यवहारिक कठिनाई हेरेर सीमावर्ती क्षेत्रमा दुवै देशका सुरक्षाकर्मीलाई हतियार र पोशाकसहित आउजाउ गर्न पाउने व्यवस्था मिलाइए पनि त्यसको फाइदा उठाएर गलत गतिविधी हुन सक्ने सम्भावना बढेपछि पोशाकसहित आउजाउमा पूर्ण रुपमा प्रतिबन्ध लगाइएको सीमावर्ती क्षेत्रका सुरक्षा अधिकारीको भनाइ छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)