भारत र चीनमा विशेषदूत पठाउदै प्रधानमन्त्री प्रचण्ड

काठमाडौँः प्रधानमन्त्री पुष्पकमल दाहाल ‘प्रचण्ड’ले भारत र चीनमा विशेष दूत पठाउने भएका छन् । दुई छिमेकीसँगको सम्बन्धलाई सुदृढ र सन्तुलित बनाउने उद्देश्यका साथ सरकारले दुई उपप्रधानमन्त्रीलाई विशेष दूतका रुपमा छिमेकी मुलुकमा पठाउने निर्णय गरेको छ । मन्त्रिपरिषदको बिहिबार सिंहदरवारमा बसेको बैठकले प्रधानमन्त्रीका विशेषदूतका रुपमा उपप्रधानमन्त्री बिमलेन्द्र निधिलाई भारत र अर्का उपप्रधानमन्त्री कृष्णबहादुर महरालाई चीनमा पठाउने निर्णय गरेको हो ।

अघिल्लो सरकारका पालामा भारतसँग बिग्रिएको सम्बन्ध सुधार्न र नयाँ सरकार गठन भएपछि चिनियाँमा बढेको आशंका मेटाउन सरकारले उपप्रधानमन्त्री निधि र महरालाई भारत र चीन पठाउने निर्णय गरेको हो । नयाँ सत्ता समीकरणको औचित्यसहितको सन्देश प्रवाह गराउन र दुवै छिमेकी मुलुकमा रहेको अविश्वास र आशंकालाई मेटाउन सरकारले दुई उपप्रधानमन्त्रीलाई छुट्टा छुट्टै मुलुकमा प्रधानमन्त्रीको बिशेषदूतका रुपमा पठाउने निर्णय गरिएको कृषिमन्त्री गौरीशंकर चौधरीले जानकारी दिए ।

चीनका राष्ट्रपति सी जिनपिङको नेपाल भ्रमणलाई सुनिश्चित गराउन, भारतका राष्ट्रपति प्रणव मुखर्जीलाई नेपाल भ्रमण गर्ने वातावरण बनाउन, नेपालका प्रधानमन्त्रीको भारत भ्रमणको माहोल तयार गर्न र दुवै मुलुकमा रहेको अविश्वास र आशंका मेटाउन मन्त्रिपरिषदले भारत र चीनमा प्रधानमन्त्री दाहालको बिशेष दूतमा आफूहरुलाई पठाउने निर्णय गरेको उपप्रधान तथा गृहमन्त्री निधिले जानकारी दिए ।

निधिका अनुसार बिशेषदूतका रुपमा पठाउनु अघि प्रधानमन्त्री दाहालले छुट्टै विशेष निर्देशन दिनेछन् । त्यसबारेमा गृहकार्य भइरहेको निधिले बताए । निधि र महरालाई एक साता भित्रै भारत र चीनमा विशेषदूतका रुपमा पठाउने गृहकार्य शुरु गरिएको परराष्ट्र मन्त्रालयले जनाएको छ । उपप्रधानमन्त्री निधिले भने आफूहरु छिटै भारत र चीनमा प्रधानमन्त्रीको विशेषदूतका रुपमा जान लागेको जानकारी दिए । ‘हामी जानु भन्दा पहिला प्रधानमन्त्रीले हामीलाई बोलाएर छुट्टै निर्देशन दिनुहुनेछ’, निधिले भने । उनले भारत र चीनका कुन तहका नेतासँग भेटघाट हुने भन्नेबारेमा केहि बताउन चाहेनन ।

परराष्ट्र मन्त्रालयका अनुसार भारत र चीनमा बिशेषदूत पठाउन दुवै मुलुकसँग कुटनीतिक परामर्श गरी भ्रमणको मिति तय गरिनेछ । परराष्ट्र सचिव शंकरदास बैरागीले मन्त्रिपरिषदले गरेको निर्णय बमोजिम दुवै मुलुकको भ्रमणको मिति आपसी परामर्शमा तय हुने बताए । ‘नयाँ सरकार गठनको सन्देश प्रवाह गर्न र सम्बन्ध विस्तारका लागि’निधिलाई भारत र महरालाई चीन भ्रमणमा पठाउने निर्णय गरिएको कृषि मन्त्री चौधरीले जानकारी दिए ।

मन्त्री चौधरीका अुनसार दुवै उपप्रधानमन्त्रीलाई बाटोको म्याद बाहेक दुई —दुई दिनको समय सम्बन्धित मुलुकको राजनीतिक नेतृत्वसँग भेटवार्ता गरी सम्बन्ध सुधार्न केन्द्रित गर्नेछन । ‘उहाँहरुलाई बाटोको म्याद बाहेक दुई दिनको समय दिइएको छ’, मन्त्री चौधरीले अन्नपूर्णसँग भने । दुवै उपप्रधानमन्त्रीले सम्बन्धित मुलुकको भ्रमण गर्दा परराष्ट्र मन्त्रालयका अधिकारीसहितको सानो टोली लिएर जानेछन् ।

प्रधानमन्त्रीमा निर्वाचित भए लगत्तै दाहाललाई भारतीय प्रधानमन्त्री नरेन्द्र मोदी र चिनियाँ प्रधानमन्त्री ली खछियाङले बधाई तथा शुभकामना दिएका थिए । भारतीय प्रधानमन्त्री मोदीले प्रधानमन्त्री दाहाललाई भारत भ्रमणको निमन्त्रणा नै दिएका छन् । चिनियाँ राजदूत ऊ चुन्ताईले प्रधानमन्त्रीमा निर्वाचित भए लगत्तै दाहाललाई उनकै निवासमा भेटेर बुकी फूलका साथै शुभकामना दिएका थिए भने भारतीय राजदूत रन्जित रेले भोलिटपल्ट निवासमै पुगेर प्रधानमन्त्री दाहालसँग भेटवार्ता गरी बधाई दिएका थिए ।