आकर्षण डिजिटल पुस्तकतिर

काठमाडौंः पछिल्लो समय नेपालमा डिजिटल पुस्तक पढ्ने क्रम बढेको छ । त्यसमा पनि मोबाइलमार्फत पुस्तक पढ्ने युवा पुस्ताको जमात ठूलो भएको कथालय इंकका कार्यकारी निर्देशक राजीवधर जोशीले बताए । उनका अनुसार नेपालमा कुल इन्टरनेट प्रयोगकर्ताको ८० प्रतिशतले मोबाइलमार्फत इन्टरनेट प्रयोग गर्ने गरेका छन् ।

यही जमातलाई लक्षित गर्दै कथालय इंकले आफ्नो प्रोडक्ट ‘वी रिड' एपमार्फत बिहीबार किशोर नेपालको ‘मिडिया सिद्धान्त सूत्र र प्रयोग' तथा जनकराज सापकोटाको ‘कहर' वैदेशिक रोजगारीले बिथोलिँदो समाजलाई डिजिटल रूपमा सार्वजनिक गरेको छ । केही समयअघि सार्वजनिक भइसकेका यी पुस्तकलाई कथालयले ‘वी रिड'मार्फत डिजिटल रूपमा सार्वजनिक गरेको हो ।

किशोर नेपालद्वारा लिखित ‘मिडिया सिद्धान्त सूत्र र प्रयोग' नेपाली मिडियाको स्वरूप, विकासक्रम र भूमिकामा आधारित भएर लेखिएको छ । नेपाली मिडियामा लामो समय बिताएको अनुभवलाई उनले पुस्तकमा प्रस्तुत गरेका छन् । कार्यक्रममा नेपालले कथालयले सुरु गरेको ‘वी रिड' एउटा आँटिलो काम भएको बताए ।

जनकराज सापकोटाद्वारा लिखित पुस्तक ‘कहर' वैदेशिक रोजगारीमा गएका मानिसको कथा समेटिएर लेखिएको पुस्तक हो । सापकोटाका अनुसार यो पुस्तकमा वैदेशिक रोजगारीमा गएका मानिसले भागेको दुःखका कथालाई समेटिएको छ ।

पुस्तकमार्फत पाठकले वैदेशिक रोजगारीमा गएका मानिसको पीडालाई प्रत्यक्ष रूपमा अनुभव गर्न पाउनेछन् । ‘सरकारलाई वैदेशिक रोजगारीमा गएका मानिसको अवस्था र पीडा ज्ञात गराउन र उचित कदम चाल्न पुस्तक लेखिएको हो', सापकोटाले भने ।

एन्ड्रोइड र आईओएस दुवैमा उपलब्ध ‘वी रिड' एप्समा अहिले तीन सयभन्दा बढी पुस्तक राखिसकिएको छ । विभिन्न नौवटा प्रकाशनका किताब ‘वी रिड'मा छन् । त्यहाँ उपलब्ध किताब कतिपय निःशुल्क उपलब्ध छन् भने कतिपय किनेर पढ्न सकिने बनाइएको छ । नेपाली किताबको विश्व बजारमा बढ्दो माग हेरेर कम्पनीले ‘वी रिड'मार्फत पुस्तक पाठकमाझ पुर्‍याउने कोसिस गरेको कथालय इंकका कार्यकारी निर्देशक जोशीले बताए ।

किशोर नेपालको ‘मिडिया सिद्वान्त  सूत्र र प्रयोग’ र जनकराज सापकोटाको ‘कहर’ अनलाइनमा । 

पुस्तकलाई डिजिटल रूपमा विकास गर्नुको कारण डिजिटल टेक्नोलोजीमा भएका पाठकलाई तान्नु रहेको छ । यसले किताब बोकेर हिँड्ने झन्झट कम गर्नुका साथै पाठकलाई पुस्तकप्रति आकर्षण गर्नसमेत सहयोग हुने जोशीले बताए । बजारमा किन्दा पर्ने मूल्यभन्दा ५० रुपैयाँ घटाएर कम्पनीले डिजिटल पुस्तक प्रदान गर्नेछ । यो अझ घट्नसक्ने जोशीले बताए ।

पुस्तक पढ्न सजिलो होस् भन्ने उद्देश्यले देवनागरी लिपिकै एपमा पुस्तक राखिएको छ । डिजिटल रूपमा पुस्तक पढ्न पाठकले नेपालभित्र रहेका १६ हजार भन्दा धैरै ई सेवाजोनमार्फत डिजिटल पुस्तक किन्न सक्नेछन् भने विदेशमा रहेकाले डेबिट÷क्रेडिट कार्डमार्फत पे-पालबाट किन्न सक्नेछन् ।

कम्पनीले ‘वी रिड', ‘वी रिड एप' र ‘वी रिड' कथालय' भनेर तीन फरक सेग्मेन्टमा एपको विकास गरेको छ; जसमा ‘वी रिड'मा समसामयिक पुस्तक समेटिएका छन् । ‘वी रिड एप'मा युवालक्षित पुस्तक छन् भने ‘वी रिड कथालय'मा बालबालिकालाई लक्षित पुस्तक राखिएको छ ।