मन्दिर अघि बस्ने सबै बाबा सद्दे हुँदैनन्

मन्दिरको वरिपरि बसेर हेरिरहेका बाबा र साधुलाई ढोगिहाल्ने बानी र आफ्नो मनको कुरा भनेर आशीर्वाद लिने चक्करले कतिजनाको पारिवारिक जीवन नै खत्तम हुन पुगेका घटना समाजमा धेरै पाइन्छन् । तर ती घटना प्रकाशमा आउँदैनन् । मलाई पनि एकचोटी बाबाले भनेका थिए, 'तिमीमा योगी बन्न सक्ने योग्यता छ, 'तर तिमीले आफ्नो परिवार त्यागेर लोग्नेलाई दाजु मान्नुपर्छ ।' बाबाको कुराले मलाई वाक्कदिक्क लाग्यो । म त्यो ठाउँमा जानै सकिनँ ।

तर पछिल्लो समयमा जब 'बाबा', 'योगी र बाबुहरूको अश्लील काम उनीहरूले किशोरी र महिलाहरूलाई गरेको यौनशोषण, यौन दुव्र्यवहार र ठगीका घटना देखेपछि 'बाबा'लाई देखेर मनमा श्रद्धा उब्जिनुको सट्टा धिक्कारको लाग्न थालेको छ ।

भारतका 'भगवान्' मानिने आशारामको किशोरी र महिलाको यौनशोषण गरेको समाचारले केही समयअघि आमसञ्चारमा निकै चर्चा पाएको थियो । नेपालबाट पनि कति महिला आशारामलाई ढोग्न जान्थे । अहिले ती भक्तजनको के हालात् भएको होला ?

के उनीहरू अहिले पनि बाबा रे बाबा, छिटो आएर हामीलाई मुक्ति दिनुस् भन्लान् कि ?

आशारामले २०१२ डिसेम्बर २६ मा एक युवतीमाथि बलत्कार हुँदा भनेका थिए 'यदि ती युवतीले सरस्वतीको मन्त्र पढेको भए, बलात्कारीलाई तिमीहरू मेरो दाजुभाइ हो, मलाई छोडिदेउ भनेको भए र केटा साथीसँग बसमा नचढेको भए उनको बलात्कार हुँदैनथ्यो' यस्ता बाबाको अश्लील बोली र विचार चिन्न कति लामो समय लागेको होला हाम्रो समाजमा ?

धार्मिक गुरुहरू भन्दैमा उनीहरूले यौनहिंसा गर्न सक्दैनन्, बदमासी गर्न जान्दैनन्, ठगी गर्न सक्दैनन् भन्ने विचारलाई परिवर्तन गरौं र ठगीको सिकार नबनौं ।

अरूलाई नैतिकताको पाठपाठ पढाउने यी धर्मगुरु कति यौनपिपासु रहेछन् र कसरी महिला आफ्नो जालमा पार्दा रहेछन् भन्ने कुरा खुलेपछि त अहिले कति जनालाई योगी र सन्तप्रति नै शंका लाग्न थालेको छ ।

१२ वर्षअघिको कुरा हो मातातीर्थमा बस्ने एकदम ठूला ज्योतिषी बाबा छन् रे भनेको सुनेको थिएँ । मेरी एकजना दिदी ज्योतिषी र बाबाहरूमा असाध्यै श्रद्धा राख्ने हुनाले उनले मलाई पनि लिएर गइन् ती बाबाकहाँ । 'प्रकाण्ड ज्योतिषी, त्रिकालदर्शी' जे भन्यो त्यही ठ्याक्कै मिलाउने ती बाबाको कुरा सुन्ने लोभले मलाई पनि तानेको थियो ।

बिहान ६ बजे घरबाट जाँदा झुटो बोलियो । मातातीर्थको बाबाकहाँ पुगेपछि एक घन्टा कुर्नुपर्‌यो । बाबाले मलाई पनि दर्शन दिए । 'दक्षिणा राख्नुहोस्' भनेपछि मैले २० रुपैयाँ राखेँ । रकम थोरै भयो कि क्यारे उनले बांगो नजरले हेर्दै भने 'तपाईंको आर्थिक अवस्था राम्रो रहेनछ ।

तपाईंलाई आर्थिक संकट भविष्यमा परिरहनेछ ।श्रीमान्ले दिए खान पाउने नत्र भोकै पर्ने स्थिति रहेछ । तर त्यसबाट मुक्ति दिलाउन म प्रयत्न गर्छु । एक महिनापछि यहाँ जप हुँदैछ । २५ सय दियो बाल्नको लागि पैसा छोड्नु होला, सबै ठीक हुन्छ ।'

मेरो अवस्था नराम्रो थिएन । म आफैं कमाउँथे । मैले लगाएको पुरानो लुगाले बाबालाई मेरो निजी कमाइ छैन भन्ने लागेछ क्यारे । ती बाबाको 'त्रिकालदर्शी' चर्चा त गलत रहेछ भन्ने भान भयो । एक सातापछि नै एक पत्रिकामा ती बाबाको नालीबेलीसहित फोटो र जालझेलको घटना छापियो । त्यसपछि म कति मूर्ख भएकी रहिछु भनेर रिस उठ्यो ।

२० दिनपछि सोही आ श्रमबाट तपाईंको २५ हजार जप गर्नको लागि पैसा छोडिदिनुस् भनेर फोन आयो । मैले 'भइहाल्यो जपसप गर्नु पर्दैन' भनेर फोन राखेँ ।

अर्का निर्मल बाबाको लड्डु खाउ, गोलकप्पा खाउ, अनि सबै राम्रो हुन्छ भन्ने विज्ञापन र पैसाको ठगी भएको कुरा भारतीय सञ्चारमा आएपछि ती बाबाको विज्ञापन रोकियो । नेपालमा पनि निर्मल बाबाका धेरै महिला भक्त थिए । पैसा कालो पर्समा राखे बढ्छ भन्ने बाबाको भनाइलाई स्वीकारेर कालो रङको पर्स किन्ने धेरै महिला थिए । ती बाबाको 'ठगी' पछि कति जनाले धत्तेरिका भनेका थिए । तर नेपालको एक टीभीमा निर्मल बाबाको विज्ञापन अझै पनि आइरहन्छ ।

अर्का बाबा छन् । चानचुने होइन, भगवान् रूपका रे ! कति जना नाम कहलिएका बाबाहरूमध्ये कति त आफ्ना भक्तिनीसँग 'यौनसम्बन्ध' राख्छन् र त्यसको कारण चाहिँ भक्तिनीहरूको पापमोचन गर्ने तरिका हो' भनेर बाबाले भन्छन् । त्यसो भए पुरुष भक्तहरूको पापमोचन कसरी हुने ? किनभने बाबाले पुरुषसँग यौनसम्बन्ध राख्दैनन् ।

ती बाबामध्ये कति त मरेर गइसके । तर भक्तजन् अझै उनको नाम जपेर भजन र रमाइलो गर्छन् । ती बाबाको मायाको बन्धनमा कहिलेसम्म पर्ने होला ?

हुन त एक दुई वर्षअघि युरोप र अमेरिकाका गिर्जाघरका पादरीहरूले बालकहरूलाई शारीरिक र यौनशोषण गरेको कुरा सार्वजनिक भएपछि यसले भ्याटिकनलाई आच्छुआच्छु परेको थियो । पादरीहरूले यौनशोषण गरेका कतिपय बालकहरू वयस्क भएपछि, टीभी र पत्रपत्रिकामा आएर कसरी धर्म गुरुहरूबाट यौनहिंसाको सिकार भइयो त्यसको शारीरिक र मानसिक रूपमा कस्तो असर गर्‌यो भन्ने कुरा भनेका थिए ।

धार्मिक गुरुहरू भन्दैमा उनीहरूले यौनहिंसा गर्न सक्दैनन्, बदमासी गर्न जान्दैनन्, ठगी गर्न सक्दैनन् भन्ने विचारलाई परिवर्तन गरौं र ठगीको सिकार नबनौं ।

धर्मको दृष्टिकोणले हेर्ने हो भने त यो हाम्रो शरीर नै मन्दिर हो । यहीँभित्र ईश्वरको बास हुन्छ । अनि किन बाबाको चक्करमा परेर समय र पैसा बर्बाद गर्ने ? साँच्चिकै धार्मिक गुरु छन् भने उनीहरू न पैसाको माग गर्छन् न त आफ्नो पाउमा ढोग गर्न भन्छन् । सत्य बाबाले त गरिब र दुःखीको सेवा नै ईश्वरको सेवा हो भन्ने सिकाउँछन् ।