'कांग्रेस र माओवादीले षड्यन्त्र गरेर सरकारमा जान दिएनन्'
मोरङः मधेसी जनअधिकार फोरम (लोकतान्त्रिक)का अध्यक्ष विजयकुमार गच्छदारले नेपाली कांग्रेस–माओवादी केन्द्रले आफूलाई सरकारमा जान नदिन ठूलो षड्यन्त्र गरेको बताएका छन् ।
विराटनगरमा पत्रकारसँग कुरा गर्दै गच्छदारले घुमाउरो शैलीमा भने, ‘हाम्रो पार्टीलाई सरकारमा सहभागी हुन नदिएन केही ठूला पार्टी र केही व्यक्तिले षड्यन्त्र गरिरहेका छन् ।’
गच्छदारले मधेसी मोर्चाले गरेको तीनबुँदे सहमति मधेसको हितमा नभएको समेत बताएका छन् । उनले मधेसी मोर्चाले प्रधानमन्त्री हटाउन र प्रधानमन्त्री बनाउन मात्र तीनबुँदे सहमति गरेको आरोपसमेत लगाए ।
गच्छदारले मधेसको समस्या समाधान गर्न र संविधानको सफल कार्यान्वयनका लागि पनि नेपाली कांग्रेस, नेकपा (एमाले), नेकपा माओवादी र मधेसी मोर्र्चाबीच सहमति आवश्यक रहेको बताए ।
संविधान कार्यान्वयन र मुलुकको समस्या समाधानका लागि मुख्य दलहरुबीच राष्ट्रिय सहमति आवश्यक रहेको भन्दै अध्यक्ष गच्छदारले नेपाली कांग्रेस र नेकपा (माओवादी केन्द्र) मिलेर सरकार बनाउँदैमा समस्याको समाधान नहुने जिकिर गरे ।
प्रतिक्रिया दिनुहोस !
