सेयर बजारमा सुधार

काठमाडौंः पुँजी बजारमा यस साता सामान्य सुधार भएको छ । बजारमापक नेप्से परिसूचक अघिल्लो साताको तुलनामा ६.२७ अंकले बढेर १७७४.८७ विन्दुमा आइपुगेको छ ।

अघिल्लो साता बिहीबार नेप्से परिसूचक १७६८.६ विन्दुमा अडिएको थियो । यो साता सेयर बजारमा निकै उतारचढाव देखियो । पाँच प्रतिशतले बजार घट्ने र पाँच प्रतिशतले नै बजार बढ्ने प्रवृत्ति भयो । विभिन्न हल्लाको पछि लाग्दा साना र नयाँ लगानीकर्ता मारमा परेका छन् ।

बजार उतारचढाव भएका बेला साना लगानीकर्ता बढी आत्तिने भएकाले हतारमा बिक्री गर्दा गुमाउने अवस्था आएको हो । अब बिस्तारै बजार सामान्य अवस्थामा फर्किन थालेको विश्लेषकको अनुमान छ । तर, ब्रोकरहरू भने अझै ‘पर्ख र हेर' कै अवस्थामा रहेको दाबी गर्छन् । यस साता नेपाल स्टक एक्सचेन्जमा कुल एक सय ५४ कम्पनीको ६ अर्ब पाँच करोड ६ लाख ७४ हजार रुपैयाँमा एक करोड सात लाख ६ हजार नौ सय ९० कित्ता सेयर कारोबार भएका छन् ।

यस साता सेयर बजारमा निकै उतारचढाव देखियो । पाँच प्रतिशतले बजार घट्ने र पाँच प्रतिशतले नै बजार बढ्ने प्रवृत्ति भयो ।

कारोबार रकममा गत साताको भन्दा २२.२८ प्रतिशतले कमी आएको छ । गत साता एक सय ५२ कम्पनीको सात अर्ब ७९ करोड १८ लाख ५५ हजार रुपैयाँमा एक करोड ७२ लाख २४ हजार नौ सय ७० कित्ता सेयर खरिदबिक्री भएका थिए । ‘क' वर्गका कम्पनीको कारोबार मापन गर्ने सेन्सेटिभ परिसूचक ३८२.७८ अंकमा आएको छ ।

कारोबार रकम ४७ करोड ५२ लाख ६० हजार रुपैयाँको आधारमा नेपाल बंगलादेश बैंक सबैभन्दा अगाडि छ । यसैगरी कारोबार भएको सेयर संख्या २० लाख ७० हजार कित्ताको आधारमा लक्ष्मी भ्याल्यु फन्ड १ अघि छ । कारोबार संख्या २१ सय ८१ वटासहित नेपाल इन्भेस्टमेन्ट बैंक सबैभन्दा अगाडि छ । सातामा पाँचै दिन सेयर बजार खुला रह्यो । यस साता पनि संस्थागत तथा सरकारी ऋणपत्रको कारोबार भएन ।

यस साता माछापुच्छे बैंकको बोनस सेयर, इन्नोभेटिभ डेभलपमेन्टको बोनस र हकप्रद सेयर नेप्सेमा सूचीकृत भएको छ । यसैगरी नागरिक लगानी कोष, कृषि विकास बैंक, फेवा डेभलपमेन्ट बैंक र कास्की फाइनान्सका बोनस सेयर सूचीकृत भएका छन् ।