सरस्वतीले तोडिन् २६ वर्ष पुरानो कीर्तिमान
काठमाडौंः नेपाली धाविका सरस्वती भट्टराईले ३१औं ग्रीष्मकालीन रियो ओलम्पिक खेलकुदमा नयाँ राष्ट्रिय कीर्तिमान बनाएकी छन् । शनिबार बिहान भएको एथलेटिक्स महिला १५ सय मिटरको दौडको हिट चरणमा सरस्वतीले निर्धारित दूरी चार मिनेट ३३.९४ सेकेन्डमा पूरा गर्दै २६ वर्ष पुरानो राष्ट्रिय कीर्तिमान तोडेकी हुन् । तर, उनी अघिल्लो चरण पुग्न भने सकिनन् ।
नेपाललाई उपलब्ध अनिवार्य कोटामार्फत प्रतियोगितामा सहभागी सरस्वतीले यसअघि सन् १९९० को एसियन गेम्समा राजकुमारी पाण्डेले बनेको कीर्तिमान तोडेकी हुन् । राजकुमारीले निर्धारित दूरी चार मिनेट ३४.४७ सेकन्डमा पूरा गरी उक्त कीर्तिमान बनाएकी थिइन् ।
४१ जना सहभागी यस स्पर्धामा सरस्वतीले हिट वानबाट प्रतिस्पर्धा गरेकी थिइन् । हिट चरणबाट बाहिरिएकी सरस्वती आफ्नो हिटमा १३औं स्थानमा रहेकी थिइन् । उक्त हिटमा १४ खेलाडीले प्रतिस्पर्धा गरेका थिए । सरस्वतीको यसअघिको उत्कृष्ट समय चार मिनेट ४०.०३ सेकेन्ड थियो ।
‘१५ सय मिटर दौडमा राष्ट्रिय कीर्तिमान बनाउन पाउँदा म निकै खुसी भएकी छु । अझ ओलम्पिकमा आएर कीर्तिमान तोड्न पाउनु मेरा लागि ठूलो उपलब्धि हो । मेरो यो नतिजामा गुरु पुष्पराज ओझाको समेत धेरै मेहनत परेको छ । ओलम्पिकका लागि मैले पनि राम्रो तयारी गरेको थिएँ', सरस्वतीले भनिन् । यस स्पर्धाको हिट चरणमा इथियोपियाकी डविट सियम पहिलो हुँदै फाइनल चरणमा पुगिन् ।
डिविटले निर्धारित दूरी चार मिनेट ०५.३३ सेकेन्डमा पूरा गरेकी थिइन् । अमेरिकाकी सानोन रोबुरी दोस्रो भइन् । सानोनले निर्धारित दूरी चार मिनेट ०६.४७ सेकेन्डमा पूरा गरेकी थिइन् । तेस्रो भएकी बेलायतकी राउरा मुइरले चार मिनेट ०६.५३ सेकेन्डमा दौड पूरा गरेकी थिइन् ।
यसैगरी मोरक्कोकी रावावे अरफी चार मिनेट ०६.६४ मा दूरी पूरा गर्दै चौथो, नेदरल्यान्ड्सकी सिफन हुसन चार मिनेट ०६.६४ सेकेन्डमा दौडँदै पाँचौं भइन् ।
सरस्वतीको स्पर्धासँगै रियो ओलम्पिकमा सहभागी सात खेलाडीमध्ये पाँच खेलाडीको प्रतिस्पर्धा सकिएको छ । रियो ओलम्पिकमा अब नेपालबाट एथलेटिक्सअन्तर्गत हरिकुमार रिमालले पुरुष पाँच हजार मिटरमा प्रतिस्पर्धा गर्नेछन् । पाँच हजार मिटर हिट चरणको प्रतिस्पर्धा अगस्ट १७ मा हुनेछ । तेक्वान्दोमा निशा रावलले प्रतिस्पर्धा गर्दैछिन् ।
निशाले महिला ६७ केजीमाथि तौल समूहमा प्रतिस्पर्धा गर्नेछिन् । वाइल्ड कार्डमार्फत ओलम्पिकमा सहभागी निशाको स्पर्धा २० तारिखमा परेको छ । नेपालबाट सहभागी अन्य खेलाडी आर्चरीका जितबहादुर मोक्तान, जुडोमा फुपुल्हामु खत्री, पौडीकी गौरिका सिंह र शिरीष गुरुङले आआफ्नो स्पर्धामा प्रतिस्पर्धा गरिसकेका छन् ।
प्रतिक्रिया दिनुहोस !
