नेपालको कमजोर ब्याटिङ
काठमाडौंः आईसीसी वल्र्ड क्रिकेट लिग (डब्लूसीएल) च्याम्पियनसिपअन्तर्गत नेदरल्यान्ड्सविरुद्धको पहिलो एकदिवसीय खेलमा नेपाल सात विकेटले पराजित भएको छ । नेदरल्यान्ड्सको भीआरए ग्राउन्डमा शनिबार सम्पन्न खेलमा नेपाली टोलीले कमजोर ब्याटिङ गर्यो ।
टस जितेपछि नेदरल्यान्ड्सले नेपाललाई पहिला ब्याटिङ गर्ने जिम्मा दिएको थियो । नेपाली टोली ३८.१ ओभरमा ९४ रनमा समेटियो । ३८ रन जोड्दा केवल एक विकेट गुमाएको नेपाली टोली त्यसपछि लगातार दबाबमा रह्यो । नेपाली पालीमा प्रारम्भिक ब्याट्सम्यान अनिल मण्डलले सर्वाधिक २० रन जोडे ।
अर्का ओपनर ज्ञानेन्द्र मल्लले ११, तेस्रो क्रममा ब्याटिङ गर्न आएका शरद भेषावकरले १४ र तल्लो क्रमका सोमपाल कामीले १२ रन जोड्नुबाहेक अन्य नेपाली ब्याट्सम्यानले दोहोरो अंकमा रन जोड्न सकेनन् । कप्तान पारस खड्का गोल्डेन डक आउट भए ।
सागर पुनले सात, विकेटकिपर राजु रिजालले तीन, विनोद भण्डारीले नौ र वसन्त रेग्मीले सात (अविजित) रन जोडे । बलिङतर्फ डच टोलीका टिम भान डर गुग्टेन र माइकल रिप्पोनले तीन तीन विकेट लिए । रोएलोफ भान डर मार्वीले दुई तथा मुदासर बुखारी र पल भान मिकेरेनले एक एक विकेट लिए ।
घरेलु टोलीले १६.५ ओभरमा तीन विकेट गुमाएर लक्ष्य पूरा गर्यो । विकेटकिपर वेस्ली वारेस्सीले ३७ र प्रारम्भिक ब्याट्सम्यान स्टेफन माइबर्घले अविजित ३३ रन बनाए । अर्का ओपनर रिप्पोन ६ तथा मध्यक्रमका बेन कुपर पनि ६ रनमा आउट भए ।
पहिलो विकेटका लागि १३ रनको साझेदारी गरेको नेदरल्यान्ड्सले दोस्रो विकेटका लागि ५७ रनको साझेदारी । नेपाली बलर करण केसी, वसन्त रेग्मी र सागर पुनले एक एक विकेट लिए । नेपाली ब्याटिङमा शरदले ७१ , अनिलले ३९, सागरले ३१ र वसन्तले २१ बलको सामना गरेका थिए ।
प्रतियोगिताको चौथो चरणको खेलमा नेपालले नेदरल्यान्ड्ससँग प्रतिस्पर्धा गरेको हो । डच टोलीसँगको दोस्रो एकदिवसीय खेल सोमबार हुनेछ । प्रतियोगितामा आठ टोली छन् ।
हरेक टोलीले प्रत्येक टोलीसँग दुई दुईवटा एकदिवसीय खेल खेल्नेछन् । राउन्ड रोबिन लिग आधारमा सञ्चालन हुने प्रतियोगिताका शीर्ष चार टोली सन् २०१८ मा आयोजना हुने विश्वकप छनोटमा प्रवेश गर्नेछन् भने अन्तिम चार टोली डिभिजन दुईमा झर्नेछन् । डिभिजन दुईमा झर्ने टोलीले डिभिजन तीनबाट उक्लने दुई टोलीसँग विश्वकप छनोटको बाँकी दुई स्थानका लागि प्रतिस्पर्धा गर्नेछन् ।
नेपाल सात खेलबाट चार अंक जोडेर तालिकाको छैटौं स्थानमा छ । शीर्ष स्थानमा रहेको नेदरल्यान्ड्स अपराजित रहँदै सात खेलबाट १२ अंक जोड्न सफल छ । दोस्रो स्थानमा रहेको हङकङको नौ अंक छ ।
६ खेलपछि पपुआ न्युगिनीको आठ, स्कटल्यान्डको सात र केन्याको ६ अंक छ । ६ खेलपछि नामिबिया र यूएईको समान दुईदुई अंक छ । नेपाल पपुआन्युगिनी र स्कटल्यान्डसँग चारवटै खेलमा पराजित भएको थियो भने नामिबियालाई दुवै खेलमा हराएको थियो ।
प्रतिक्रिया दिनुहोस !
