प्रचण्डलाई चुनौती दिँदै दौरा सुरुवालमा माओवादी मन्त्री
काठमाडौँ: सामान्यतया सार्वजनिक कार्यक्रममा माओवादी नेताहरु दौरा सुरुवालमा देखिदैनन्, सर्ट, पाइन्ट, भादगाउँले कालो टोपी औपचारिक कार्यक्रममा माओवादी नेताले लगाउने पोशाक हुन् ।
तर, माओवादी केन्द्रीय कार्यालयका एक सदस्य सुरेन्द्र (राम) कार्कीले आइतबार सूचना तथा सञ्चार मन्त्रीको पद तथा गोपनियताको सपथ लिदा मौलिक नेपाली पोशाक दौरा सुरुवालमा प्रस्तुत भए । राष्ट्रपति निवास शितल निवासमा माओवादीका पाँच मन्त्रीले सपथ लिइरहदा भिन्न र फरक पोशाकमा रहेका कार्की प्रतिको आकर्षण घटेको थिएन, बरु बढेको थियो ।
बाबुराम भट्टराई प्रधानमन्त्री हुँदा भारतका लागि राजदूत सिफारिस गरिएका कार्कीलाई नयाँ दिल्लीले राजदूतको रुपमा स्वीकार गर्न नचाहेको सन्देश स्वरुप एग्रिमो पठाएको थिएन । कार्कीसँगै चीनका लागि राजदूत सिफारिस गरिएका महेश मास्के आफनो कार्यकाल पूरा गरी फर्किइसकेका छन् ।
भट्टराई नेतृत्वको मन्त्रिपरिषद्ले कार्कीलाई भारत र मास्केलाई चीनका लागि राजदूत सिफारिस गरेको थियो । दाहालले आफू प्रधानमन्त्री हुँदा कार्कीलाई सूचना तथा सञ्चारमन्त्रालयको जिम्मेवारी सुम्पेर सरकारको प्रवक्ता बनाउन लागेका छन् । ०६३ यता माओवादीका नेताहरु ६ पटक सरकारमा सहभागी भएपनि कार्की मन्त्री बन्ने अवसरबाट बन्चित हुँदै आएका थिए ।
माओवादी पहिलो पटक सरकारमा सहभागी हुँदा स्वर्गीय गिरिजाप्रसाद कोइराला नेतृत्वको सरकारले कार्कीलाई फ्रान्सका लागि राजदूत सिफारिस गरेको थियो । फ्रान्सले कार्कीलाई राजदूतको रुपमा स्वीकार गरी एग्रिमो पठाएपनि नेपाल सरकारका कर्मचारीहरुले एग्रिमो लुकाइदिएका कारण उनी राजदूत हुनबाट बन्चित भएका थिए ।
त्यतिबेला नेपालका लागि फ्रेन्च राजदूतावासले विज्ञप्ति जारी गरी आफूहरुले कार्कीका नाममा एग्रिमो पठाएको जानकारी गराएको थियो । समानुपातिक सभासद् कार्की व्यवस्थापिका संसदका बैठकमा सर्ट पाइन्टमा देखिन्थे । दौरा सुरुवाल लगाउनै नपाउने नियम माओवादीमा छैन तर प्रमुख नेताहरुले लगाएको पोशाकलाई पछयाउने उनीहरुको परम्परा नै हो ।
युद्धमा नेता तथा कार्यकर्ता एकै प्रकृतिका कम्ब्याक्ट पोशाक लगाएको अनुभव लिएर आएका माओवादीका नेताद्धय पुष्पकमल दाहाल ‘प्रचण्ड’ र बाबुराम भट्टराई ०६३ मा पहिलो पटक प्रधानमन्त्री निवास बालुवाटारमा सार्वजनिक हुँदा खरानी रंगको सर्ट पाइन्टमा प्रस्तुत भएका थिए ।
त्यतिवेला केहि समयसम्म माओवादीका नेता कार्यकर्ताले सोही पोशाकलाई मात्रै पछयाएनन् । नेताका बोल्ने शैलीलाई पनि कार्यकर्ताले पछयाउने गरेका थिए । सशस्त्र संघर्ष र सेना समायोजन हुनु अघिसम्म कम्ब्याक्ट पोशाकमा देखिने नन्दबहादुर पुन पासाङले पनि उपराष्ट्रपति पदमा सपथ लिएदेखि यता भएका हरेक औपचारिक कार्यक्रममा दौरासुरुवालको पोशाकलाई छोडेका छैनन् ।
रोल्पाका पुनमगरलाई दौरासुरुवाल सुहाएको पनि छ । पूर्वउपप्रधानमन्त्रीद्धय नारायणकाजी श्रेष्ठ र टोपबहादुर रायमाझीले पनि कुनै समारोहमा दौरासुरुवाल लगाएको देख्न पाइन्थ्यो । त्यसैगरी पूर्व गृहमन्त्री शक्तिबहादुर बस्नेतले पनि दौरासुरुवाल लगाउने गरेका थिए ।
प्रतिक्रिया दिनुहोस !
